ကြားဖြတ်ရွေးကောက်ပွဲကျင်းပမည့် တာမွေမြို့နယ် ရပ်ကွက်ရွေးကောက်ပွဲကော်မရှင်အဖွဲ့ခွဲရုံးတစ်ခုတွင် မဲစာရင်းများကြည့်နေသည်ကို တွေ့ရစဉ်
ပြည်ထောင်စုရွေးကောက်ပွဲကော်မရှင်အနေဖြင့် ကြားဖြတ်ရွေးကောက်ပွဲအတွက် ကျန်ရှိနေသည့် အချိန်ဇယားများကို တတ်နိုင်သမျှ ဆောလျင်စွာ ကြေညာပေးရန် တိုက်တွန်းကြောင်း ရွေးကောက်ပွဲဆိုင်ရာပြည်သူ့လှုပ်ရှားမှုအဖွဲ့ (PACE) အမှုဆောင်ဒါရိုက်တာ ဦးစိုင်းရဲကျော်စွာမြင့်က ပြောကြားသည်။
PACE အဖွဲ့၏ ကြားဖြတ်ရွေးကောက် ပွဲအကြိုကာလသဘောထားအမြင်စစ်တမ်း ကနဦး အစီရင်ခံစာအား ရှင်းလင်းတင်ပြခြင်းအခမ်းအနားကို ဇူလိုင် ၁၃ ရက်က ရန်ကုန်မြို့ ရှိ Park Royal ဟိုတယ်တွင် ပြုလုပ်ခဲ့ရာ အခမ်းအနားတွင် ဦးစိုင်းရဲကျော်စွာမြင့်က အထက်ပါအတိုင်း တိုက်တွန်းပြောကြားခဲ့ ခြင်းဖြစ်သည်။
ကြားဖြတ်ရွေးကောက်ပွဲတွင် သက်ဆိုင်ရာအဖွဲ့အစည်းများ၏ ပူးပေါင်းပါဝင်မှုနှင့် နိုင်ငံသားများ၏ ပူးပေါင်းပါဝင်မှု ပိုမိုမြင့်မားလာစေရန်အတွက် ကျန်ရှိနေသေးသည့် အချိန်ဇယားများကို ဆောလျင်စွာအသိပေးထုတ် ပြန်သင့်ကြောင်း ဦးစိုင်းရဲကျော်စွာမြင့်က ပြောကြားသည်။
“ပြည်ထောင်စုရွေးကောက်ပွဲကော်မရှင်ကို တိုက်တွန်းချင်တာ နှစ်ချက်။ တစ်အချက်က ဘာလဲဆိုတော့ကျန်ရှိနေတဲ့ အချိန်စာရင်းတွေကို စောစောကြေညာတာကောင်းမယ်။ ဘာကျန်သလဲဆိုတော့ မဲဆွယ်စည်းရုံး ရေးကာလဘယ်တော့စမလဲ၊ နောက်ပြီးကြိုတင်မဲပေးတဲ့ကိစ ္စမဲဆန္ဒနယ်ပြင်ပ ကြိုတင်မဲပေးတဲ့ ကိစ္စနဲ့ မဲဆန္ဒနယ်တွင်း ကြိုတင်မဲပေးတဲ့ကိစ္စ၊ အဲဒါတွေကို မသိရသေးဘူး။ ဆိုတော့ ဒါတွေက စောစောစီးစီး ကြေညာနိုင်လေ ကောင်းလေ၊ နောက်တစ်ခါ ကော်မရှင်ကြေညာထားတာက မဲဆန္ဒရှင်စာရင်းကြေညာပြသမှုကို နောက်တစ်ကြိမ် ထပ်လုပ်မယ်လို့ပြောတယ်။ အဲဒါကလည်း ဘယ်တော့လုပ်မလဲဆိုတာ တိတိကျကျကြေညာထားလေ အသိပညာပေးလုပ်ငန်းတွေလုပ်မယ်ဆိုရင် အခုကတည်းက စလုပ်လို့ရမယ်။ ဒီဇိုင်းဆွဲလို့ရမယ်။ မဟုတ်ရင် ကျွန်တော်တို့က ပါဝင်ချင်တယ်ဆိုရင်တော့ ဘယ်လိုပါဝင်ရမလဲဆိုတာ မသိဘူး” ဟု ဦးစိုင်းရဲကျော်စွာမြင့်က ပြောကြားသည်။
ထို့အတူ ပြည်ထောင်စုရွေးကောက်ပွဲကော်မရှင်အနေဖြင့် နိုင်ငံသားများပိုမိုစိတ်ဝင်စားလာရေးနှင့်သိရှိရေးအတွက် ဆောင်ရွက်နေသည့် မဲဆန္ဒရှင်အသိပညာပေးလုပ်ငန်းစဉ်များတွင် အမျိုးသမီးများ၊ ကျေးလက် ဒေသနှင့်အသက် ၁၈-၃၅ နှစ်အကြား လူငယ်များကို ဦးတည်သည့် လုပ်ငန်းစဉ်များတိုးမြှင့်ဆောင်ရွက်ရန်နှင့် မဲဆန္ဒရှင်စာရင်းပိုမိုမှန်ကန်တိကျလာရေးအတွက် သတင်းအချက်အလက်နှင့် ဆက်သွယ်ရေးနည်းပညာကို အသုံးပြုပြီး ၊ SMS ၊ မိုဘိုင်း-အပ်ပ် (Mobile App )၊ အွန်လိုင်း(အင်တာနက်၊ ဝက်ဘ်ဆိုက်ဒ်) စသည်တို့မှတစ်ဆင့် မဲစာရင်းကို အလွယ်တကူစစ်ဆေးနိုင်သည့်နည်းလမ်းများကို အသုံးပြုရန်စသည့်အချက်များကိုလည်း PACE အဖွဲ့၏ ရွေးကောက်ပွဲအကြိုကာလ သဘောထားအမြင်စစ်တမ်း ကနဦးအစီရင်ခံစာတွင် တိုက်တွန်းထားသည်။
PACE အဖွဲ့အနေဖြင့် ကြားဖြတ်ရွေးကောက်ပွဲ အကြိုကာလလေ့လာဆန်းစစ်မှုအဖြစ် ကြားဖြတ်ရွေးကောက်ပွဲဖြစ်စဉ်များအပေါ် နိုင်ငံသားများ၏ သိရှိမှုနှင့် ပါဝင်လိုစိတ် အတိုင်းအတာတို့ကို မဲဆန္ဒနယ် ၁၂ နေ ရာတွင် စစ်တမ်းကောက်ယူမှုပြုလုပ်ခဲ့သည်။
PACE အဖွဲ့က မဲဆန္ဒနယ် ၁၂ နေရာတွင် စစ်တမ်းကောက်ယူရာ၌ နိုင်ငံသားထက်ဝက်ခန့်ကသာ ကြားဖြတ်ရွေးကောက်ပွဲရှိသည်ကို သိရှိရကြောင်း၊ သုံးပုံတစ်ပုံခန့်က ဇူလိုင်လတွင် မဲစာရင်းကြေညာပြသမည်ကို သိရှိကြကြောင်း၊ မဲစာရင်းကြေညာပြသမှုတွင် မဲစာရင်းပါ အချက်အလက်များအား သွားရောက်ကြည့်ရှုရန် လိုက်လံနှိုးဆော်မှုများ ဆောင်ရွက်နေသည်မှာလည်း ဒေသအာဏာပိုင်နှင့် ရွေးကောက်ပွဲကော်မရှင်အဖွဲ့ခွဲ များသာဖြစ်သည်ကို တွေ့ရှိရကြောင်းနှင့် မဲစာရင်း သွားရောက်ကြည့်ရှုရန်အတွက်လည်း မဲဆန္ဒနယ်မြေများရှိ နိုင်ငံသားထက်ဝက်ကျော်ကသာ ကြည့်ရှုရန် အစီအစဉ်ရှိကြောင်း PACE အဖွဲ့၏ ရွေးကောက်ပွဲအကြိုကာလ သဘောထားအမြင်စစ်တမ်း ကနဦးအစီရင်ခံစာတွင် ဖော်ပြထားသည်။
နိုင်ငံရေးပါတီများအနေဖြင့်လည်း မဲဆန္ဒရှင်များ မဲစာရင်းသွားရောက်ကြည့်ရှုရန်အတွက် အသိပေးနှိုးဆော်ခြင်းများတွင် ပါဝင်ဆောင်ရွက်ကြရန်နှင့် ပြည်တွင်းအရပ်ဘက်အဖွဲ့အစည်းများကလည်း မဲဆန္ဒရှင် အသိပညာပေးလုပ်ငန်းများဆောင်ရွက်ရာတွင် နိုင်ငံသားအားလုံးဦးတည်သည့် အသိပညာပေးလုပ်ငန်းများအပြင် အမျိုးသမီးများ ကျေးလက်ဒေသနှင့်အသက် ၁၈-၃၅ နှစ် အကြား လူငယ်များကို အဓိကဦးတည်သည့် အစီအစဉ်များထည့်သွင်းဆောင်ရွက်ကြရန်လည်း တိုက်တွန်းဖော်ပြထားသည်။
၂၀၁၈ ကြားဖြတ် ရွေးကောက်ပွဲကို နိုဝင်ဘာ ၃ ရက်တွင် မဲဆန္ဒနယ်မြေ ၁၃ နေရာ၌ ကျင်းပပြုလုပ်သွားမည်ဖြစ်သော်လည်း PACE အဖွဲ့အနေဖြင့် မန္တလေးတိုင်းဒေသကြီး လွှ် တော်ရှမ်းတိုင်းရင်းသားလူမျိုးရေးရာမဲဆန္ဒနယ်(ရှမ်းတိုင်းရင်းသားလူမျိုးရေးရာဝန်ကြီး)တွင် စစ်တမ်းကောက်ယူမှုပြုလုပ်မည်မဟုတ်ကြောင်း ဦးစိုင်းရဲကျော်စွာမြင့်က ပြောကြားထားသည်။
