မြန်မာ့ကမ်းလွန်ရှိ ရတနာ သဘာဝဓာတ်ငွေ့ စီမံကိန်းကို တွေ့ရစဉ် (ဓာတ်ပုံ- MOEE)

မြန်မာနိုင်ငံရှိ သဘာဝဓာတ်ငွေ့ စီမံကိန်းများ၏ ထုတ်လုပ်မှု သက်တမ်းအရ လာမည့် နှစ်နှစ်မှ ခြောက်နှစ်အတွင်း ထွက်ရှိမှု ကျဆင်းလာမည်ဖြစ်၍ လုပ်ကွက်သစ် မရှာနိုင်ပါက ထုတ်လုပ်မှုနှင့် သုံးစွဲမှုကွာဟချက် များလာမည်ဖြစ်ကြောင်း မြန်မာ့ရေနံနှင့် သဘာဝဓာတ်ငွေ့လုပ်ငန်း အကြံပေးပုဂ္ဂိုလ် ဦးသန်းထွန်းက ၎င်း၏ Facebook စာမျက်နှာတွင် ရေးသားဖော်ပြထားသည်။

ပြည်တွင်းအတွက် သဘာဝဓာတ်ငွေ့ကို ရတနာ၊ ရွှေနှင့် ဇောတိက စီမံကိန်းများမှ တစ်ရက်လျှင် ကုဗပေသန်း ၄၀၀ ခန့် ပို့လွှတ်လျက်ရှိပြီး ကုဗပေသန်း ၂၀၀ ကျော် ပို့လွှတ်ပေးနေသည့် ရတနာစီမံကိန်းမှ ထုတ်လုပ်မှုမှာ ၂၀၂၀ ပြည့်နှစ်နောက်ပိုင်းတွင် ကျဆင်းလာမည်ဖြစ်သည်။ ထို့အတူ ဇောတိကနှင့် ရွှေစီမံကိန်းတို့လည်း ၂၀၂၄ ခုနှစ်နောက်ပိုင်းတွင် ထုတ်လုပ်မှု ကျဆင်းလာမည်ဖြစ်ရာ ၂၀၂၀ ပြည့်နှစ်နောက်ပိုင်းတွင် လောင်စာစွမ်းအင် ထုတ်လုပ်နိုင်မှုနှင့် သုံးစွဲမှု ကွာဟချက် များလာမည်ဖြစ်ကြောင်း ၎င်းကဆိုသည်။

မြန်မာနိုင်ငံတွင် ကုန်တွင်းပိုင်းရေနံနှင့် သဘာဝဓာတ်ငွေ့ရှာဖွေရေး လုပ်ကွက် ၅၃ ကွက်နှင့် ကမ်းလွန်လုပ်ကွက် ၅၁ ကွက် သတ်မှတ်ထားပြီး ကုန်တွင်းလုပ်ကွက် ၃၅ ကွက်နှင့် ကမ်းလွန်လုပ်ကွက် ၃၈ ကွက်တွင် ရှာဖွေရေးနှင့် ထုတ်လုပ်ရေး ဆောင်ရွက်လျက်ရှိသည်။ ၂၀၁၁ ခုနှစ်တွင် ပထမဦးဆုံး နိုင်ငံတကာ တင်ဒါခေါ်ယူမှုကို ကုန်တွင်းပိုင်းတွင် စတင်ဆောင်ရွက်ခဲ့ရာ နိုင်ငံခြားကုမ္ပဏီ ခုနစ်ခုမှ လုပ်ကွက်ကိုးကွက်တွင် လုပ်ငန်းဆောင်ရွက်ခဲ့သည်။ ၂၀၁၃ ခုနှစ် ဒုတိယအကြိမ် နိုင်ငံတကာတင်ဒါ ခေါ်ယူမှုတွင် နိုင်ငံခြားကုမ္ပဏီ ရှစ်ခုမှ လုပ်ကွက် ၁၂ ကွက်တွင် လုပ်ငန်းဆောင်ရွက်ခဲ့ကာ ၂၀၁၄ ခုနှစ်တွင် ကမ်းလွန်လုပ်ကွက်များကို ပထမအကြိမ် နိုင်ငံတာကတင်ဒါ ခေါ်ယူခဲ့ရာ လုပ်ကွက် ၂၀ ကို လုပ်ငန်းချထား နိုင်ခဲ့ကြောင်း သိရသည်။

လက်ရှိတွင် မြန်မာ့ကမ်းလွန်မှ တစ်ရက်လျှင် သဘာဝဓာတ်ငွေ့ ကုဗပေ ၁ ဒသမ ၈ ဘီလျံခန့် ထုတ်လုပ်လျက်ရှိပြီး ပြည်တွင်းသုံးစွဲမှုအတွက် ကုဗပေသန်း ၄၀၀ ခန့်နှင့် ကျန်သဘာဝဓာတ်ငွေ့ ၁ ဒသမ ၄ ဘီလျံခန့်ကို ပြည်ပသို့ ပေးပို့ရောင်းချနေခြင်းဖြစ်ကာ မြန်မာ့ကမ်းလွန်ရှိ ရဲတံခွန်စီမံကိန်းမှ တစ်ရက်လျှင် လေဆီ စည် ၃၁၀၀ ခန့်ထွက်ရှိကြောင်း သိရသည်။

ကုန်းတွင်းရေနံမြေများမှ တစ်ရက်လျှင် ရေနံစည် ၆၅၀၀ ခန့်နှင့် သဘာဝဓာတ် ငွေ့ကုဗပေ သန်း ၅၀ ခန့် ထုတ်လုပ်လျက်ရှိပြီး သဘာဝအလျောက် ရေနံထုတ်လုပ်မှု ကျဆင်းနှုန်းမှာ တစ်နှစ်လျှင် ငါးရာခိုင်နှုန်းမှ ၁၀ ရာခိုင်နှုန်းအထိ ရှိနိုင်ရာ တွင်းသစ်များ ထပ်မံတူးဖော် ထုတ်လုပ်နိုင်မှသာ ယင်းကျဆင်းမှုကို ထိန်းပေးနိုင်မည်ဖြစ်သည်။ တွင်းသစ်များ တူးဖော်ထုတ်လုပ်ခြင်း မပြုနိုင်ပါက ရေနံထွက်ရှိမှု တဖြည်းဖြည်း ပိုမိုကျဆင်း သွားနိုင်ကြောင်း ဦးသန်းထွန်းက သုံးသပ်ထားသည်။

ကုန်တွင်းလုပ်ကွက်များအနက် အဖျောက်သဘာဝဓာတ်ငွေ့မြေ၊ ညောင်တုန်းနှင့် မအူပင် သဘာဝဓာတ်ငွေ့မြေတို့တွင် ပြည်တွင်းလိုအပ်ချက်အတွက် သဘာဝဓာတ်ငွေ့ ထုတ်လုပ်မှု တိုးတက်လာစေရန် တွင်းသစ်များ တူးဖော်လျက်ရှိကြောင်း သိရသည်။

ကမ်းလွန်လုပ်ကွက်များအနက် လုပ်ကွက် AD7 နှင့် A6 တို့၏ စီးပွားဖြစ် သဘာဝဓာတ်ငွေ့သိုက် ပမာဏကို အတည်ပြုနိုင်ရန် အကဲဖြတ်တွင်းနှင့် ရှာဖွေရေးတွင်းများ ထပ်မံတူးဖော်ရမည်ဖြစ်ပြီး ယခုနှစ်အတွင်း AD1 တွင် ရှာဖွေရေးတွင်း တူးဖော်ခဲ့ရာ သဘာဝဓာတ်ငွေ့ ခိုအောင်းမှု အလားအလာကောင်းကို တွေ့ရှိခဲ့သည်။ ထို့အတူ PTTEP၊ Petronas အစရှိသော ရေနံကုမ္ပဏီတို့ကလည်း ကမ်းလွန်လုပ်ကွက်များအတွင်း ရှာဖွေရေးတွင်းများ တူးဖော်ရန် စီစဉ်လျက်ရှိကြောင်း သိရသည်။