အစိုးရ၏ ငြိမ်းချမ်းရေးကော်မရှင်နှင့် မြောက်ပိုင်းတိုင်းရင်းသားလက်နက်ကိုင် အဖွဲ့များ တွေ့ဆုံ

အစိုးရ၏ ငြိမ်းချမ်းရေးကော်မရှင်နှင့် မြောက်ပိုင်းတိုင်းရင်းသားလက်နက်ကိုင် အဖွဲ့များ တွေ့ဆုံ
Published 14 July 2018

အစိုးရ၏ ငြိမ်းချမ်းရေးကော်မရှင်နှင့် NCA မထိုးရသေးသည့် မြောက်ပိုင်းတိုင်းရင်း သားလက်နက်ကိုင်အဖွဲ့များသည်  နေပြည်တော်ရှိ Horizon Lake View ဟိုတယ်တွင် ဇူလိုင် ၁၃ ရက် မွန်းလွဲပိုင်းက တွေ့ဆုံခဲ့သည်။

ထိုသို့တွေ့ဆုံမှုအပြီးတွင်  ငြိမ်းချမ်းရေး ကော်မရှင် ဒုတိယဥက္ကဋ္ဌ ဦးသိန်းဇော်က ငြိမ်းချမ်းရေးလုပ်ငန်းစဉ် ဖော်ဆောင်နိုင်ရေးအတွက် NCA လက်မှတ်ရေးထိုးထားခြင်း မရှိသေးသော တိုင်းရင်းသားလက်နက်ကိုင်အဖွဲ့များနှင့် မကြာခဏတွေ့ဆုံရန် စီစဉ်ထားကြောင်း ပြောကြားသည်။

“မကြာမကြာတွေ့မှပဲ ငြိမ်းချမ်းရေးဆိုတာ ဖော်ဆောင်လို့ရမှာပေါ့။ ဟုတ်တယ်မလား။ အဲဒီတော့ မကြာမကြာတွေ့ဖို့လည်း ကျွန်တော်တို့ အစီအစဉ်လုပ်ပြီးသားပါ။ နောက်လာခဲ့တဲ့ တိုင်းရင်းသားခေါင်းဆောင်တွေအနေနဲ့ နိုင်ငံတော်အတိုင်ပင်ခံနဲ့ တွေ့ပြီးတော့  နိုင်ငံတော်အစိုးရရဲ့ သဘောထားတွေလည်း သူတို့အားလုံးသိသွားပြီ။ တပ်မတော်ကာ ကွယ်ရေးဦးစီးချုပ်နဲ့ ဒုတိယတပ်မတော်ကာကွယ်ရေး ဦးစီးချုပ်တို့နဲ့တွေ့ဆုံပြီးတော့လည်း တပ်မတော်ရဲ့ သဘောထားတွေလည်း သူတို့အားလုံးသိသွားပြီ။ ဆိုတော့ ဒီဘက်က သဘောထားတွေ သိပြီးသွားလို့ သူတို့ဘက်က သဘောထားကလည်း ဒီဘက်ကသဘောထားနဲ့ ညှိနှိုင်းလို့ရသွားပြီဆိုရင်တော့ အခြေအနေကောင်းတွေ ထွက်ပေါ်လာမှာပေါ့” ဟု ဦးသိန်းဇော်က ပြောကြားသည်။

NCA လက်မှတ်ရေးထိုးထားခြင်း မရှိသေးသော တိုင်းရင်းသားလက်နက်ကိုင်အဖွဲ့များနှင့် မကြာခဏ တွေ့ဆုံ၍ ယုံကြည်မှု တည်ဆောက်ပြီးမှသာ ငြိမ်းချမ်းရေး ဖော်ဆောင်၍ရမည်ဖြစ်သည်ဟု  ၎င်းက ဆိုသည်။

ထိုသို့ တွေ့ဆုံရာတွင် ကိုးကန့်အဖွဲ့ (MNDAA) ၊ တအန်းအဖွဲ့ (TNLA) ၊ ရခိုင်အဖွဲ့ (AA) တို့နှင့်လည်း တွေ့ဆုံသွားမည်ဖြစ်ပြီး မြောက်ပိုင်းမဟာမိတ် တိုင်းရင်းသား လက်နက်ကိုင်အဖွဲ့ခုနစ်ဖွဲ့ကို တစ်ဖွဲ့ချင်းစီ လည်းကောင်း စုပေါင်း၍လည်းကောင်း တွေ့ဆုံသွားမည်ဟု ဦးသိန်းဇော်က ပြောကြားသည်။

ငြိမ်းချမ်းရေးလုပ်ငန်းစဉ်သည် နိုင်ငံတော်၏ လုံခြုံရေးနှင့် ပတ်သက်နေသော ကိစ္စဖြစ်သည့်အတွက် သတင်းထုတ်ပြန်၍ရသည့် အချက်များကို သတင်းထုတ်ပြန်ပေးသွားမည်ဖြစ်ပြီး သတင်းထုတ်ပြန်၍ မရသည့် အချက်များ ရှိပါက သတင်းထုတ်ပြန်ပေးမည် မဟုတ်ကြောင်း ပြောကြားသည်။ မင်းနိုင်စိုး

Most Read

Most Recent