မသန်စွမ်းသူများ အခွင့်အရေးဆိုင်ရာ နည်းဥပဒေကို ရေးဆွဲပြီးဖြစ်၍ လွှတ်တော်တွင် အတည်ပြုရန် တင်ပြထားကြောင်း ရန်ကုန်တိုင်းဒေသကြီး လူမှုဝန်ထမ်းဦးစီးဌာနမှ ညွှန်ကြားရေးမှူး ဒေါက်တာကေသီကျော်က ပြောကြားသည်။
မသန်စွမ်းသူများ အခွင့်အရေးဆိုင်ရာ ဥပဒေကို ၂၀၁၅ တွင် အတည်ပြုပြီးဖြစ်၍ နောက်ဆက်တွဲနည်းဥပဒေကို ရေးဆွဲပြီးဖြစ်ရာ အတည်ပြုရန် လွှတ်တော်တွင်တင်ပြထားကြောင်း၊ ကုလသမဂ္ဂမသန်စွမ်းသူများ အခွင့်အရေးဆိုင်ရာ သဘောတူစာချုပ်တွင် မြန်မာနိုင်ငံအနေနဲ့ လက်မှတ်ရေးထိုးပြီးဖြစ်ကြောင်းနှင့် ထိုသဘောတူစာချုပ်အရ မသန်စွမ်းသူများ အခွင့်အရေးအတွက် ယခုကဲ့သို့ ဥပဒေကို ရေးဆွဲရခြင်းဖြစ်သည်ဟုလည်း သိရသည်။
ထိုဥပဒေတွင် မသန်စွမ်းသူများအတွက် ပညာသင်ကြားခွင့်များ၊ သက်မွေးဝမ်းကျောင်းပညာရေးနှင့် ပတ်သက်သည်များနှင့် အလုပ်အကိုင် အခွင့်အလမ်းများ ရရှိရန်စသည့်အချက်များ ပါဝင်သည်ဟု သိရသည်။
“အဲဒီ ဥပဒေထဲမှာပါတာက သူတို့ရဲ့ ပညာသင်ကြားခွင့်တွေ ဥပမာ- မျက်စိမမြင်တဲ့သူတွေအတွက်ဆို သူ့နည်းသူဟန်နဲ့ နားမကြားတဲ့သူတွေဆို သူ့နည်းသူ့ဟန်နဲ့ အဲဒီလို ပညာရေးပိုင်းကို ပိုပြီးကြပ်ကြပ်မတ်မတ် လုပ်ဖို့တွေပါတယ်။ ပညာရေးပိုင်းမှာ မရရင် သက်မွေးဝမ်းကျောင်းပညာပိုင်းပေါ့။ ဒါတွေရလာပြီးရင် နောက်တစ်ခါ အလုပ်အကိုင် အခွင့်အလမ်းပိုင်း။ တချို့နိုင်ငံတွေမှာဆိုရှိတယ် အနည်းဆုံးအလုပ်မှာ တစ်ရာခိုင်နှုန်းကနေ နှစ်ရာခိုင်နှုန်းလောက်က မသန်စွမ်းသူတွေဖြစ်ရမယ်။ အဲဒီလိုမျိုးဆိုရင် မသန်စွမ်းသူတွေ အနေနဲ့ အလုပ်အကိုင် အခွင့်အလမ်းတွေ ရရှိလာမှာပါ။ ရေရှည်ဖွံ့ဖြိုးတိုးတက်ဖို့အတွက် သူတို့ကိုလည်း ဖယ်ထားလို့မရဘူး။ ဒီလို အလုပ်အကိုင် အခွင့်အလမ်း ဖန်တီးပေးလိုက်တဲ့အတွက် သူတို့တွေရဲ့ မိသားစုကလည်း ဝန်ထုပ်ဝန်ပိုး မဖြစ်စေတော့ဘဲ ဝင်ငွေလည်း ရရှိလာစေမှာပါ” ဟု ညွှန်ကြားရေးမှူးဒေါက်တာ ကေသီကျော်က ပြောကြားသည်။ နိုင်ငံ့လူဦးရေ၏ ၄ ဒသမ ၆ ရာခိုင်နှုန်းသည် မသန်စွမ်းသူများဖြစ်သည်။