<

ဇူလိုင် ၃၁ ရက်တွင် သက်တမ်းကုန်ဆုံးမည့် ဗဟိုဘဏ်ဥက္ကဋ္ဌနေရာတွင် ယခင်အစိုးရ ခန့်အပ်ခဲ့သည့် လက်ရှိဥက္ကဋ္ဌ ဦးကျော်ကျော်မောင်ကိုသာ NLD အစိုးရက ဆက်လက်တာဝန်ပေးအပ်ဖွယ်ရှိဟု သိရ

မြန်မာနိုင်ငံတော်ဗဟိုဘဏ် (ရန်ကုန်ဘဏ်ခွဲ)အား တွေ့ရစဉ်

မြန်မာနိုင်ငံ၏ ငွေရေးကြေးရေးကဏ္ဍအတွက် အရေးပါပြီး ဇူလိုင် ၃၁ ရက်တွင် သက်တမ်းကုန်ဆုံးမည့် မြန်မာနိုင်ငံတော် ဗဟိုဘဏ်ဥက္ကဋ္ဌနေရာတွင် ယခင်အစိုးရ ခန့်အပ်ခဲ့သည့် လက်ရှိ ဗဟိုဘဏ်ဥက္ကဋ္ဌ ဦးကျော်ကျော်မောင်ကိုသာ NLD အစိုးရက ဆက်လက်တာဝန်ပေးအပ်ဖွယ်ရှိကြောင်း သိရသည်။

“ကျွန်တော်သိသလောက်တော့ လက်ရှိအချိန်အထိ ဗဟိုဘဏ်ဥက္ကဋ္ဌနေရာအတွက် ခေါ်ယူမေးမြန်းထားသူ မရှိသေးဘူး။ အရင်က လျာထားတဲ့ ဦးစိုးဝင်းကလည်း အရေးပေါ် လိုအပ်ချက်ကြောင့် စီမံ/ဘဏ္ဍာဝန်ကြီး ဖြစ်သွားတာကြောင့် လတ်တလောမှာ ဗဟိုဘဏ်ဥက္ကဋ္ဌနေရာအတွက် ခေါ်မေးထားတာ ဘယ်သူမှ မရှိသေးဘူး။ လက်ရှိ ဒုဥက္ကဋ္ဌသုံးယောက်ထဲက တစ်ယောက်ကို ပြန်ပြီးတော့ ဥက္ကဋ္ဌနေရာပေးဖို့လည်း မကြားမိတာနဲ့ လက်ရှိအချိန်မှာ ဦးကျော်ကျော်မောင်ကို မီတဲ့ သင့်တော်သူ ရှားပါးနေတာကြောင့်လည်း ဗဟိုဘဏ်ဥက္ကဋ္ဌနေရာက ဦးကျော်ကျော်မောင်ကိုပဲ ဆက်ခန့်ဖြစ်ဖို့များတယ်” ဟု NLD ပါတီမှ စီးပွားရေးကော်မတီဝင်တစ်ဦးက ပြောကြားသည်။

၂၀၁၃ ခုနှစ် ဇူလိုင် ၁၁ ရက်တွင် အသစ်ထပ်မံပြဌာန်းခဲ့သည့် မြန်မာနိုင်ငံတော် ဗဟိုဘဏ် ဥပဒေအရ ဗဟိုဘဏ်၏ ဒါရိုက်တာအဖွဲ့ကို ဒါရိုက်တာအဖွဲ့ဝင်အဖြစ် ပုဂ္ဂိုလ်ကိုးဦးဖြင့် ဖွဲ့စည်းရမည်ဖြစ်ပြီး ဗဟိုဘဏ် ဥက္ကဋ္ဌ တစ်ဦး၊ ဒုတိယဥက္ကဌ သုံးဦး၊ အစိုးရအဖွဲ့က ရွေးချယ်ပေးသော ပြင်ပမှ ဘာသာရပ်ဆိုင်ရာ ကျွမ်းကျင်သူ ငါးဦးတို့ဖြင့် ဖွဲ့စည်းရမည်ဖြစ်ကာ ဒါရိုက်တာအဖွဲ့ဝင်ကိုးဦးမှ တစ်ဦးသည် ဒါရိုက်တာအဖွဲ့၏ ဥက္ကဋ္ဌအဖြစ် တာဝန်ထမ်းဆောင်ရမည်ဖြစ်သည်။

မြန်မာနိုင်ငံတော်ဗဟိုဘဏ်ဥက္ကဋ္ဌအဖြစ် လက်ရှိတွင် စစ်အစိုးရလက်ထက်၌ ဗဟိုဘဏ်ဥက္ကဋ္ဌအဖြစ် တာဝန်ယူခဲ့ဖူးသူ ဦးကျော်ကျော်မောင်က တာဝန်ထမ်းဆောင်နေပြီး အဆိုပါ ပုဂ္ဂိုလ်ကို ၂၀၁၃ ခုနှစ် သြဂုတ် ၁ ရက်က ခန့်အပ်ခဲ့၍ ၂၀၁၈ ခုနှစ် ဇူလိုင် ၃၁ ရက်တွင် ဥပဒေက ခွင့်ပြုသည့် ငါးနှစ်သက်တမ်းပြည့်မည်ဖြစ်သည်။ ထိုသို့ ပထမအကြိမ် ငါးနှစ်သက်တမ်းပြည့်၍ ဒုတိယအကြိမ် ဆက်လက်တာဝန် ထမ်းဆောင်နိုင်မည်ဖြစ်သော်လည်း ဒါရိုက်တာအဖွဲ့၏ ဥက္ကဋ္ဌနှင့် အဖွဲ့ဝင်များသည် ဆက်တိုက် သက်တမ်းနှစ်ခုထက်ပို၍ တာဝန်ထမ်းဆောင်ခွင့်မရှိကြောင်း မြန်မာနိုင်ငံတော် ဗဟိုဘဏ်ဥပဒေအရ သိရသည်။

လက်ရှိ မြန်မာနိုင်ငံတော်ဗဟိုဘဏ် ဥက္ကဋ္ဌအဖြစ် ဦးကျော်ကျော်မောင်၊ ဒုတိယဥက္ကဋ္ဌများအဖြစ် ဦးစိုးမင်း၊ ဦးစိုးသိန်း၊ ဦးဘိုဘိုငယ်တို့က တာဝန်ယူထားပြီး ဒါရိုက်တာအဖွဲ့ဝင်များအဖြစ် ဦးကျော်မင်းထွန်း၊ ဦးမြင့်သိန်းထွန်း၊ ဦးစိုးပိုင်၊ ဒေါ်ရီရီဝင်း၊ ဒေါ်ခင်မေလှတို့ကို တာဝန်ပေးအပ်ထားကာ ဒုတိယဥက္ကဋ္ဌသုံးဦးနှင့် ဒါရိုက်တာ အဖွဲ့ဝင်ငါးဦးမှာ NLD အစိုးရလက်ထက် ၂၀၁၇ ခု နှစ် ဇူလိုင်တွင် ထပ်မံခန့်အပ်ထားခြင်းဖြစ်သည်။

ဗဟိုဘဏ်ဥက္ကဌ ဦးကျော်ကျော်မောင်ကို စတင်ခန့်အပ်ခဲ့သည့် ၂၀၁၃ ခုနှစ် သြဂုတ် ၁ ရက်တွင် ဗဟိုဘဏ်၏ ရည်ညွှန်းငွေလဲနှုန်းမှာ ၉၇၅ ကျပ်ဖြစ်ပြီး လက်ရှိရည်ညွှန်း ငွေလဲနှုန်းမှာ ၁၄၀၂ ကျပ်အဖြစ် ဇူလိုင် ၁၁ ရက်တွင် သတ်မှတ်ထားသဖြင့် ဦးကျော်ကျော်မောင် တာဝန်ယူနေသည့် ကာလအတွင်း မြန်မာကျပ်ငွေတန်ဖိုး ရာခိုင်နှုန်း ၄၀ ကျော် ကျဆင်းခဲ့သည်။

ယခင် ဗဟိုဘဏ်ဒါရိုက်တာအဖွဲ့ဝင် ကိုးဦး တာဝန်ထမ်းဆောင်နေသည့် သုံးနှစ်တာကာလအတွင်း ၂၀၁၅ ခုနှစ် ဇူလိုင် ၁၃ ရက်တွင် လုပ်ငန်းရှင်များနှင့် အစိုးရအဖွဲ့ဝင်များကို တိုင်ပင်ကာ တစ်ဒေါ်လာလျှင် ကျပ် ၁၂၀၀ သို့ ရုတ်ခြည်းခုန်တက်ခဲ့မှုနှင့် ယခင်အစိုးရလက်ထက် ၂၀၁၅ ခုနှစ် ဒီဇင်ဘာ ၂၃၊ ၂၄၊ ၂၈ ရက်များတွင် တစ်ဒေါ်လာ ၁၃၁၁ ကျပ်အထိ အမြင့်ဆုံးဆွဲတင်ခဲ့ပြီး မြန်မာကျပ်ငွေစံချိန်တင် တန်ဖိုးကျဆင်းအောင် လုပ်ဆောင်ခဲ့မှုများကြောင့် ပြည်တွင်းဈေးနှုန်း တည်ငြိမ်အောင် လုပ်ဆောင်နိုင်ခြင်း မရှိကြောင်း ဝေဖန်မှုများ ရှိခဲ့သည်။ ထို့ပြင် NLD အစိုးရလက်ထက်တွင် မြန်မာကျပ်ငွေတန်ဖိုး စံချိန်တင် ကျဆုံးမှုအဖြစ် ၂၀၁၆ ခုနှစ် ဒီဇင်ဘာ ၁၆ ရက်တွင် ပြင်ပငွေလဲဈေးကွက်၌ တစ်ဒေါ်လာ ၁၄၃၈ ကျပ်အထိ ဖြစ်ပေါ်ခဲ့ပြီး စံချိန်တင် ကျပ်ငွေတန်ဖိုး ကျဆင်းမှု ဖြစ်စေခဲ့ကာ ၂၀၁၈ ခုနှစ် ဇွန် ၂၉ ရက်တွင် ဗဟိုဘဏ်က သတ်မှတ်ခဲ့သည့် တစ်ဒေါ်လာ ၁၄၀၅ ကျပ် ရည်ညွှန်းငွေလဲနှုန်းမှာလည်း ခြောက်နှစ်အတွင်း အမြင့်ဆုံးနှုန်းထားဖြစ်သည်။

“မြန်မာနိုင်ငံတော်ဗဟိုဘဏ်ရဲ့ ဥက္ကဋ္ဌ သက်တမ်းဟာ ဒီလကုန်ပြည့်ပါတော့မယ်။ ကြားမိသလောက်တော့ လက်ရှိဥက္ကဋ္ဌ အန်ကယ်ဦးကျော်ကျော်မောင်ကိုပဲ သက်တမ်းတိုးပေးမယ်လို့ သိရပါတယ်။ အန်ကယ် ဦးကျော်ကျော်မောင်ဟာ ဦးသန်းရွှေအစိုးရ လက်ထက်၊ ဦးသိန်းစိန်အစိုးရလက်ထက်၊ ဦးထင်ကျော်အစိုးရလက်ထက်၊ ဦးဝင်းမြင့် အစိုးရလက်ထက် စသည်ဖြင့် အစိုးရအဆက်ဆက်တွေမှာ အင်မတန်အရေးကြီးတဲ့ မြန်မာနိုင်ငံတော်ဗဟိုဘဏ်ရဲ့ ဥက္ကဋ္ဌအဖြစ် တာဝန်ထမ်းဆောင်ခွင့်ရသူမို့ ဂုဏ်ယူဝမ်းမြောက်ကြောင်း ပြောချင်ပါတယ်” ဟု NLD ပါတီ၏ ဗဟိုစီးပွားရေးကော်မတီဝင် ဦးရဲမင်းဦး၏ Facebook တွင် ရေးသားဖော်ပြထားသည်။

July 11, 2018














Copy Protected by Chetan's WP-Copyprotect.