မြန်မာဝန်ကြီးဌာန နှစ်ခုအပေါ် ဇူလိုင် ၉ ရက်မှစ၍ ပြည်ဝင်ခွင့်ဗီဇာ ပိတ်ပင်လိုက်ကြောင်း အမေရိကန်နိုင်ငံ အမိမြေ လုံခြုံရေးဌာနက ထုတ်ပြန်ထားသည်။

မြန်မာအစိုးရက ပြည်နှင်ဒဏ်ပေးသော မြန်မာနိုင်ငံသားများအား လက်ခံရေးအတွက် ပူးပေါင်းဆောင်ရွက်ခြင်း လုံးဝမရှိဟုဆိုကာ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနနှင့် ပြည်ထဲရေးဝန်ကြီးဌာနများမှ ညွှန်ကြားရေးမှူးချုပ်မှစ၍ ဝန်ကြီးရာထူးအထိ တာဝန်ထမ်းဆောင်နေသော ပုဂ္ဂိုလ်များနှင့် အဆိုပါပုဂ္ဂိုလ်များ၏ မိသားစုဝင်များအား အမေရိကန်အမိမြေလုံခြုံရေးဌာနက အမေရိကန်နိုင်ငံခြားရေးဝန်ကြီးဌာနနှင့် ပူးပေါင်းပြီး ပြည်ဝင်ခွင့်ဗီဇာ ပိတ်ပင်လိုက်ခြင်း ဖြစ်သည်ဟု သိရသည်။

ထိုသို့ မြန်မာဝန်ကြီးဌာန နှစ်ခုမှ တာဝန်ရှိသူများနှင့် မိသားစုဝင်များအား ပြည်ဝင်ခွင့်ဗီဇာ ပိတ်ပင်ခြင်းကို အမေရိကန် အမိမြေလုံခြုံရေးဌာနနှင့် အမေရိကန်နိုင်ငံခြားရေးဝန်ကြီးဌာနတို့ ပူးပေါင်းဆောင်ရွက်ခဲ့ခြင်းဖြစ်ပြီး  ပိတ်ပင်ခံရသော ပုဂ္ဂိုလ်များသည် အမေရိကန်နိုင်ငံသို့ ဝင်ရောက်ရန် ဗီဇာမျိုးစုံအား လျှောက်ခွင့်ရမည် မဟုတ်ကြောင်း အမေရိကန်နိုင်ငံ အမိမြေ လုံခြုံရေးဌာန၏ ထုတ်ပြန်ချက်တွင် ဖော်ပြထားသည်။

အလားတူ မြန်မာနိုင်ငံနှင့်အတူ အိမ်နီးချင်း လာအိုနိုင်ငံ အကြီးအကဲအချို့နှင့် ဝန်ကြီးဌာန တစ်ခုကိုလည်း အမေရိကန်နိုင်ငံ ပြည်ဝင်ခွင့်ဗီဇာ ပိတ်ပင်ခဲ့ကြောင်း သိရသည်။

အမေရိကန်နိုင်ငံခြားရေး ဝန်ကြီးဌာနက အမေရိကန်အခြေစိုက် မြန်မာနှင့် လာအိုနိုင်ငံ သံရုံးများသို့ ပေးပို့ထားသော ညွှန်ကြားမှုနှင့် အမိမြေလုံခြုံရေးဌာနက ထုတ်ပြန်ထားသော ကြေညာချက်တွင် ဗီဇာပိတ်ပင်သော ဆုံးဖြတ်ချက် မရောက်ခင် အမေရိကန်အစိုးရက သံတမန်နည်းလမ်းများနှင့် ပြည်နှင်ဒဏ် ပေးခံရသော ပုဂ္ဂိုလ်များအား မြန်မာနှင့်လာအိုမှ လက်ခံရန် ကြိုးပမ်းဆွေးနွေးခဲ့ကြောင်း၊ သို့ရာတွင် နှစ်နိုင်ငံလုံးမှ ပြည်နှင်ဒဏ် ပေးခံရသော ပုဂ္ဂိုလ်များအတွက် ခရီးသွားလက်မှတ်၊ Passport စသည့် စီစဉ်မှုများအား မလုပ်ဆောင်ပေးသောကြောင့် အမေရိကန်နိုင်ငံ လူဝင်မှုကြီးကြပ်ရေးနှင့် နိုင်ငံသားရေးရာ ဥပဒေပုဒ်မ ၂၄၃ (ဃ) အရ ဗီဇာပိတ်ပင်ခဲ့ကြောင်း သိရသည်။