<

ကန့်ကွက်မှုများကြောင့်ဟုဆိုကာ ပြည်ထောင်စု ရွေးကောက်ပွဲကော်မရှင် က အသုံးပြုခွင့်မပေးခဲ့သည့် ရှစ်လေးလုံးပြည်သူ့ပါတီအမည်အား ပြည်သူ့ပါတီဟု ပြောင်းလဲသတ်မှတ်

နိုင်ငံရေးပါတီဖြစ်မြောက်ရေးကော်မတီ၏ တတိယအကြိမ်စုံညီအစည်းအဝေးကို ဇူလိုင် ၈ ရက်က မန္တလေးမြို့ရှိ Golden City Light Hotel တွင် ပြုလုပ်စဉ်

ကန့်ကွက်မှုများကြောင့်ဟုဆိုကာ ပြည်ထောင်စုရွေးကောက်ပွဲကော်မရှင်က အသုံးပြုခွင့် မပေးခဲ့သည့် ရှစ်လေးလုံးပြည်သူ့ပါတီအမည်ကို ပြည်သူ့ပါတီဟု အမည်ပြောင်းလဲသတ်မှတ်ခဲ့ကာ ပါတီ၏အမှတ်တံဆိပ်၊ အလံတို့ကိုပါ အတည်ပြုဆုံးဖြတ်ခဲ့ပြီး ဇူလိုင် ၉ ရက်(ယနေ့)တွင် နေပြည်တော်ရှိ ပြည်ထောင်စု ရွေးကောက်ပွဲကော်မရှင်ထံသို့ အကြောင်းကြားစာ တင်ပြသွားမည်ဖြစ်ကြောင်း မန္တလေးမြို့၌ ဇူလိုင် ၈ ရက်က ပြုလုပ်ခဲ့သည့် နိုင်ငံရေးပါတီဖြစ်မြောက်ရေး ကော်မတီ၏ တတိယအကြိမ် စုံညီအစည်းအဝေး ဆုံးဖြတ်ချက်များအရ သိရသည်။

နိုင်ငံရေးပါတီဖြစ်မြောက်ရေးကော်မတီ၏ တတိယအကြိမ် စုံညီအစည်းအဝေးကို ဇူလိုင် ၈ ရက်က မန္တလေးမြို့ရှိ Golden City Light Hotel တွင် နံနက် ၉ နာရီမှစတင်ကာ မွန်းလွဲ ၃ နာရီအထိပြုလုပ်ခဲ့ပြီး အဆိုပါစုံ ညီအစည်းအဝေးမှ ရှစ်လေးလုံးပြည်သူ့ပါတီကို ပြည်သူ့ပါတီဟု ပါတီအမည်ကိုပြောင်းလဲ သတ်မှတ်ခဲ့ကာ အဆိုပါပြည်သူ့ပါတီအား ဆက်လက်ကန့်ကွက်လာပါက ဒုတိယအဆင့်အနေဖြင့် ပါတီအမည်နောက်တစ်မျိုးအား အရန်အဖြစ် ထည့်သွင်းစဉ်းစားထားပြီးဖြစ်ကြောင်း နိုင်ငံရေးပါတီဖြစ်မြောက်ရေးကော်မတီ၏ အဖွဲ့ခေါင်းဆောင် ဦးကိုကိုကြီးက ပြောကြားသည်။

“ကျွန်တော်တို့ပါတီနဲ့ပတ်သက်ပြီး မီဒီယာ မိတ်ဆွေတွေလည်း စိတ်လှုပ်ရှားကြပုံရပါတယ်။ ဘာကြောင့်လဲဆိုတော့ ပါတီအမည်နဲ့ပတ်သက်ပြီး တစ်ကြိမ်ခေါ်ပြောတယ်၊ ပြင်ပေးလိုက်တယ်။ နောက်တစ်ကြိမ် ထပ်ပြီးတော့ပြောင်းခိုင်းတယ်။ ပါတီ စတင် ထူထောင်စဉ်ကတည်းက သူများနဲ့မတူတဲ့ အခြေအနေဖြစ်တော့ ဒီတစ်ကြိမ်ရော ကန့်ကွက်ခံရဦးမလားလို့ စိတ်လှုပ်ရှားပုံရပါတယ်။ ဒါတွေနဲ့ပတ်သက်ပြီး ကျွန်တော်တို့ ပြင်ဆင်ထားပါတယ်။ ကျွန်တော်တို့ သန္နိဋ္ဌာန်ချထားတာက နိုင်ငံရေးပါတီ မဖြစ်ဖြစ်အောင် ကြိုးစားသွားမယ်။ ဘာကြောင့်လဲဆိုတော့ ၈၈ မျိုးဆက် ရဲဘော်တွေရော ကျွန်တော်တို့နဲ့လက်တွဲလုပ်နေတဲ့ လူငယ်မျိုးဆက်တွေရော အားလုံးအတွက် နိုင်ငံရေးပါတီ တစ်ရပ်အနေနဲ့ နိုင်ငံရေးကိုဆက်လက် ဆောင်ရွက်ဖို့ သန္နိဋ္ဌာန်ချထားပြီးဖြစ်တဲ့အတွက် မဖြစ်ဖြစ်အောင် ဆက်ပြီးဆောင်ရွက်သွားမှာပါ။ ဒီတစ်ကြိမ်ထပ်ပြီး ပြင်ပေးတဲ့အခါမှာလည်း ရှိပြီးသားနိုင်ငံရေးပါတီ အမည်၊ အလံ၊ တံဆိပ်တွေကို လေ့လာပြီးတော့ ဆင်တူရိုးမှားမရှိတဲ့ အမည်၊ အလံ၊ တံဆိပ်တွေကို ရွေးချယ်ထားတာဖြစ်ပါတယ်။ ဒါကြောင့် ဒီတစ်ကြိမ်တော့ ထပ်ပြီး ကန့်ကွက်တာမျိုး မဖြစ်နိုင်လောက်တော့ဘူးလို့ မျှော်လင့်ပါတယ်။ သို့သော် ကျွန်တော်တို့က Plan B အတွက်ပါ ဆွေးနွေးဆုံးဖြတ်ထားပြီးသားဖြစ်ပါတယ်။ နောက်ထပ် နာမည်တစ်ခုကိုလည်း အရန်အနေနဲ့ စဉ်းစားထားတာရှိပါတယ်။ အခု ပါတီမည် ပြောင်းလဲတာနဲ့ပတ်သက်ပြီး မနက်ဖြန်မှာ(ဇူလိုင် ၉ ရက်) နေပြည်တော်ကိုသွားပြီးတော့ စာရွက်စာတမ်းတွေနဲ့အတူ တင်ပြသွားမှာပါ” ဟု နိုင်ငံရေးပါတီဖြစ်မြောက်ရေးကော်မတီ၏ အဖွဲ့ခေါင်းဆောင် ဦးကိုကိုကြီးက ပြောကြားသည်။

ထို့ပြင် ရှစ်လေးလုံးပြည်သူ့ပါတီအမည်ကို ပြောင်းလဲပေးခဲ့ရမှုနှင့် ပတ်သက်၍ ကန့်ကွက်နေသူများမှာ မည်သူမည်ဝါက ကန့်ကွက်ကြောင်း အမည်အတိအကျမသိရှိသေးကြောင်း၊ နိုင်ငံရေးပါတီတစ်ခု မှတ်ပုံတင်ခြင်းနှင့် ပတ်သက်၍ ဥပဒေကြောင်းအရ ကန့်ကွက်လိုပါက အခြားသောနိုင်ငံရေး ပါတီများအချင်းချင်းကသာ ကန့်ကွက်ခွင့်ရှိကြောင်း ဆက်လက်ပြောကြားသည်။ ရှစ်လေးလုံးပြည်သူ့ပါတီ၏ အမည်မှာ ကန့်ကွက်သူများရှိခဲ့သည့်အပြင် နေ့ထူးနေ့မြတ်ဖြစ်သည့်အတွက် စာဖြင့်သော်လည်းကောင်း၊ ဂဏန်းဖြင့်သော်လည်းကောင်း ယင်းအမည်ကို ပြည်ထောင်စုရွေးကော်ပွဲကောက်မရှင်က အသုံးပြုခွင့်မပေးခဲ့ခြင်းဖြစ်ကြောင်း သိရသည်။

“ကျွန်တော်တို့ကတော့ ဥပဒေကြောင်းအရ ဆက်ပြီးတော့ သွားရမှာပဲ။ ကျွန်တော်တို့နားလည်ထားတာက မှတ်ပုံတင်ဥပဒေရဲ့ ပင်မဥပဒေတွေမှာ နိုင်ငံရေးပါတီအချင်းချင်းပဲ ကန့်ကွက်လို့ရတယ်။ သူ့ပါတီရဲ့ အမည်၊ အလံ၊ တံဆိပ်နဲ့ တူညီလျှင် ဆင်တူယိုးမှားဖြစ်လျှင် ကော်မရှင်ကနေပြီး ပြင်ဆင်ပြောင်းလဲပေးဖို့ ညွှန်ကြားနိုင်ပါတယ်။ အဲဒီတော့ ကန့်ကွက်တယ်ဆိုရင် ကျွန်တော်တို့ပါတီရဲ့ အမည်၊ အလံ၊ တံဆိပ်တွေက သူတို့ပါတီရဲ့ အမည်၊ အလံ၊ တံဆိပ်တွေနဲ့ တူညီနေတယ်ဆိုရင် ခိုင်လုံတဲ့ အထောက်အထားပြပြီးတော့ ကန့်ကွက်ရမှာဖြစ်ပါတယ်။ အခု ရွေးချယ်ထားတာက လက်ရှိနိုင်ငံရေးပါတီတွေရဲ့ အလံ၊ အမည်၊ တံဆိပ်တွေနဲ့ ဆင်တူရိုးမှာ မဖြစ်အောင် သေချာကြည့်ပြီးတော့ ရွေးချယ်ထားတာဖြစ်ပါတယ်။ နောက်ထပ် ထပ်ပြီးဖြစ်လာဦးမယ်ဆိုရင် ကျွန်တော်တို့ကတော့ ဥပဒေကြာင်းအရပဲ သွားမှာဖြစ်ပါ တယ်။ ကျွန်တော်တို့ကတော့ ဥပဒေကြောင်းအရ ဒါက မညီညွတ်ဘူးဆိုပြီး ရှင်းပြမယ်။ အဲဒီလို ရှင်းပြနေတာမှ ဆုံးဖြတ်လိုက်တယ်ဆိုရင် ဆုံးဖြတ်သူတွေရဲ့ သမိုင်းမှတ်တိုင်ဖြစ်သွားပါလိမ့်မယ်” ဟု ဦးကိုကိုကြီးက ပြောကြားသည်။

ကန့်ကွက်မှုများကြောင့် ရှစ်လေးလုံး ပြည်သူ့ပါတီမှ ပြည်သူ့ပါတီဟု အမည် ပြောင်းလဲသတ်မှတ်ခဲ့ရပြီး အမည်ပြောင်းလဲ သတ်မှတ်မှုနှင့်ပတ်သက်၍ ပြည်ထောင်စု ရွေးကောက်ပွဲကော်မရှင်ထံသို့ ဆက်လက် တင်ပြသွားရမည်ဖြစ်ကာ နိုင်ငံရေးပါတီတစ်ရပ် ပေါ်ပေါက်လာရန် ဆက်လက်ကြိုးပမ်းသွားမည်ဖြစ်ကြောင်း ဦးကိုကိုကြီးက ပြောကြားသည်။ ထို့ပြင် ၂၀၁၈ ခုနှစ် နိုဝင်ဘာတွင် ကျင်းပမည့် ကြားဖြတ်ရွေးကောက်ပွဲ ၀င်ရောက်ယှဉ်ပြိုင်ရန်အတွက်မှာ အချိန်မမီတော့သဖြင့် ၀င်ရောက်ယှဉ်ပြိုင်နိုင်မည် မဟုတ်ကြောင်း ၎င်းက ဆက်လက်ပြော ကြားသည်။

မန္တလေးမြို့တွင် ပြုလုပ်ခဲ့သည့် နိုင်ငံရေးပါတီ ဖြစ်မြောက်ရေးကော်မတီ၏ တတိယအကြိမ် စုံညီအစည်းအဝေးသို့ ကော်မတီမှ ခေါင်းဆောင်များ၊ တိုင်းဒေသကြီး ခြောက်ခုမှ ပါတီကိုယ်စားလှယ်များ၊ ရှမ်းပြည်နယ်နှင့် မွန်ပြည်နယ်တို့မှ ပါတီကိုယ်စားလှယ်များ၊ နေပြည်တော်ကောင်စီနယ်မြေမှ ကိုယ်စားလှယ်များ တက်ရောက်ဆွေးနွေးခဲ့ကြောင်း သိရသည်။

 

 

July 8, 2018














Copy Protected by Chetan's WP-Copyprotect.