မဒေး ၆၆ကေဗွီဓာတ်အားခွဲရုံမှ မဒေးကျွန်းပေါ်ရှိ ကျေးရွာများ ဓာတ်အားစနစ်မှ ၂၄ နာရီ ဓာတ်အားဖြန့်ဖြူးပေးနိုင်ရေးအတွက် ပြင်ဆင်နေစဉ် (Photo: Kyaukphyu ESE)
ကျောက်ဖြူမြို့နယ် မဒေးကျွန်းပေါ်ရှိ ကျေးရွာများအား ဓာတ်အားစနစ်ဖြင့် ဇူလိုင် ၈ ရက်မှ စတင်၍ ၂၄နာရီ ဓာတ်အားဖြန့်ဖြူး ပေးတော့မည်ဖြစ်ကြောင်း သိရသည်။
လက်ရှိတွင် ကျောက်ဖြူခရိုင် လျှပ်စစ်အင်ဂျင်နီယာနှင့် အငယ်တန်းအင်ဂျင်နီယာ ၂ တို့မှ မဒေးကျွန်းပေါ်ရှိ ကျေးလက်နေ ပြည်သူများအား လျှပ်စစ်အန္တရာယ်ကင်းရှင်းရေး အသိပညာများ ဟောပြောခြင်း၊ လက်ကမ်း စာစောင်များဖြန့်ဝေခြင်း၊အိမ်တွင်း Wiring သွယ်တန်းမှုများအကြောင်း အသိပညာပေးခြင်းနှင့် မြန်မာနိုင်ငံရဲတပ်ဖွဲ့မှ ပူးပေါင်း၍ မှုခင်းအသိပညာပေးများ ဆောင်ရွက်ခြင်းတို့ ပြုလုပ်ခဲ့ကြောင်း သိရသည်။
၎င်းအပြင် အဆိုပါ ၆၆ကေဗွီဓာတ်အားလိုင်း ဖြတ်သန်းရာ တစ်လျှောက်ရှိ ကျေးရွာများအနေဖြင့် မလိုလားအပ်သော လျှပ်စစ်အန္တရာယ်များ မကျရောက်စေရေးအတွက် ဓာတ်အားလိုင်းအနီးရှိ သစ်ပင်၊ သစ်ကိုင်းများ ခုတ်ခြင်း၊ ဓာတ်တိုင်များပေါ်သို့တက်ရောက်ခြင်းများ မပြုလုပ်ကြပါရန်လျှပ်စစ်ဓာတ်အား ဖြန့်ဖြူးရေးလုပ်ငန်း (ကျောက်ဖြူမြို့)မှ သတိပေးထားသည်။
ကျောက်ဖြူ-မဒေး အမှတ် (၁၊၂ )၆၆ ကေဗွီဓာတ်အားလိုင်း တည်ဆောက်ခြင်းလုပ်ငန်းများအား ဓာတ်အားပို့လွှတ်ရေးစီမံကိန်း (တောင်ပိုင်း)၊ စီမံကိန်းမန်နေဂျာရုံး (၃) ရွှေ တောင်မှကြီးကြပ်၍ အောင်ကောင်းကျော် ကုမ္ပဏီနှင့် ဓနရာဇာကုမ္ပဏီတို့မှ တာဝန်ယူ တည်ဆောက်ခဲ့ကြောင်း သိရသည်။
မဒေးကျွန်းဒေသခံ ဦးထွန်းကြွယ်က “မဒေးကျွန်းပေါ်မှာ ကျေးရွာ လေးရွာရှိပါတယ်။ လေးရွာလုံးမီးပေးမှာပါ။ မဒေးကျွန်းမှာက ကိုယ့်အားကိုယ်ကိုး စက်တွေနဲ့ မီးရအောင် လုပ်နေရာကနေ SEZ အတွက် ဓာတ်အားခွဲရုံ တည်ဆောက်ခဲ့တာပါ။ အခုတော့ ဓာတ်အားခွဲရုံကနေ မီးပေးတော့မှာဖြစ်ပါတယ်” ဟု ပြောကြားသည်။
တရုတ်ရေနံတင် သင်္ဘောများ ဆိုက်ကပ်သည့် ဆိပ်ကမ်းတည်ရှိသော မဒေးကျွန်းပေါ်ရှိ ရွာမကျေးရွာ ၊ ကျတန်းကျေးရွာ၊ ပြိန်ကျေးရွာ နှင့် ပန်းထိန်ဆည်ကျေးရွာတို့ လျှပ်စစ်မီးရကြမည်ဟု သိရသည်။
