ကျန်းမာရေးဝန်ထမ်းများအတွက် ဆောက်လုပ်ထားသည့် ဝန်ထမ်းအိမ်ရာများကို တွေ့ရစဉ်
ကျန်းမာရေးနှင့်အားကစားဝန်ကြီးဌာနအောက်ရှိ ဝန်ထမ်းများအတွက် ဝန်ထမ်းအိမ်ရာများ ဆောက်လုပ်လျက်ရှိရာ ၂၀၁၈ ခုနှစ် ဧပြီမှ စက်တင်ဘာလအတွင်း အိမ်ရာအလုံးပေါင်း ၃၈၀ ကျော် ဆောက်လုပ်လျက်ရှိကြောင်း သိရသည်။
တိုင်းဒေသကြီးနှင့်ပြည်နယ် အားလုံးတွင် ဆောက်လုပ်လျက်ရှိသည့် အိမ်ရာများအနက် ပြည်သူ့ကျန်းမာရေး/ကုသရေးဦးစီး ဌာန၊ ဆေးရုံဝန်ထမ်းနှင့်ကုသရေးပိုင်းမှဝန်ထမ်းများအတွက် အိမ်ရာပေါင်း ၂၉၄ ခု (အိမ်ခန်းပေါင်း၂၉၇၇ ခန်း)၊ ပြည်သူ့ကျန်းမာရေး ဝန်ထမ်းများအတွက် အိမ်ရာ ၅၈ ခု (အိမ် ခန်းပေါင်း ၁၆၂ ခန်း)၊ ကျန်းမာရေးလူ့စွမ်းအား အရင်းအမြစ် ဦးစီးဌာနအတွက် အိမ်ရာတစ်ခု (အိမ်ခန်းပေါင်း ၃၆ ခန်း)၊ အစားအသောက်နှင့်ဆေးဝါးကွပ်ကဲရေးဦးစီးဌာနအတွက်အိမ်ရာ ၂၇ ခု (အိမ်ခန်းပေါင်း ၄၀၀)၊ အားကစားနှင့် ကာယပညာဦးစီးဌာနအတွက် အိမ်ရာတစ်ခု (အိမ်ခန်းတစ်ခန်း) ဆောက်လုပ်လျက်ရှိကြောင်း သိရသည်။
“ဝန်ကြီးဌာနအနေနဲ့ ဝန်ထမ်းတွေရဲ့ နေထိုင်ရေးအဆင်ပြေစေဖို့ ဒီ ၂၀၁၈ ခုနှစ်ကို ဝန်ထမ်းအိမ်ရာများ ဦးစားပေးဆောက်လုပ်မည့်နှစ်အဖြစ် သတ်မှတ်လုပ်ဆောင်နေပါတယ်။ ဒီ လိုဆောက်လုပ်တဲ့အခါ သတ်မှတ်ချက်နှင့်အညီ နိုင်ငံတော်က ခွင့်ပြုခွဲဝေရရှိသော ဘဏ္ဍာငွေအပေါ်မူတည်ပြီး ၂၀၁၈ ခုနှစ် ဧပြီ မှစက်တင်ဘာလ ဘဏ္ဍာနှစ်နဲ့ ၂၀၁၈-၂၀၁၉ ဘဏ္ဍာနှစ်တွေမှာ ဦးစီးဌာနအသီးသီးက ဆောက်လုပ်ရန်လျာထားတဲ့ ဝန်ထမ်းအိမ်ရာနဲ့ ပြီးစီးမယ့်ခန့်မှန်းဝန်ထမ်းအိမ်ရာစာရင်းကို တွက်ချက်ထားပါတယ်။ အခု ခြောက်လကာလတို ဘဏ္ဍာနှစ်မှာ တိုင်းဒေသကြီး/ပြည်နယ်အားလုံးမှာ ဝန်ထမ်းအိမ်ရာပေါင်း ၃၈၁ ခု ဆောက်လုပ်နေပါတယ်။ လာမယ့်ဘဏ္ဍာနှစ်မှာလည်း ဆက်လက်ဆောင်ရွက်မယ့် အိမ်ရာတွေကိုလည်း တွက်ချက်ထားပြီးဖြစ်ပါတယ်” ဟု ကျန်းမာရေးနှင့်အားကစားဝန်ကြီးဌာနမှ တာဝန်ရှိသူတစ်ဦးက ပြောကြားသည်။
လက်ရှိ ကျန်းမာရေးနှင့် အားကစား ဝန်ကြီးဌာနအနေဖြင့် ကျန်းမာရေးအသိပညာ မြှင့်တင်ရေးလုပ်ငန်း၊ ကျောင်းကျန်းမာရေး လုပ်ငန်း၊ ထုတ်ပြန်ထားသောလုပ်ငန်းလမ်းညွှန်များ၊ ညွှန်ကြားချက်များကို ခေတ်မီ အောင် Update ပြုလုပ်ခြင်းနှင့် မလိုအပ်သည်များကို ပယ်ဖျက်ခြင်း၊ ကျန်းမာရေး ဝန်ထမ်းများနှင့် လူနာများ၊ လူနာ၏မိသားစုဝင်များအကြား ဆက်ဆံရေးပိုမိုကောင်းမွန်လာစေရေး၊ ပြည်သူလူထု အခြေပြုကျန်းမာရေးစောင့်ရှောက်မှု ဆေးခန်းများကို ဖွင့်လှစ်၍ မကူးစက်သော ရောဂါနှိမ်နင်းရေးကို အားဖြည့်ဆောင်ရွက်ရေး၊ အခြေခံကျန်းမာရေးဝန်ထမ်းများဖြင့် ရွေ့လျားကျန်းမာရေးဆေးခန်းများ ဖွင့်လှစ်ရေး၊ တိုင်းဒေသကြီး/ပြည်နယ်သင်ကြားရေးအ ဖွဲ့များကို ပြန်လည်ဖွဲ့စည်း၍ တာဝန် ခံများထားရှိရေးတို့ဖြစ်ကြောင်းနှင့် ဝန်ကြီးဌာနအနေဖြင့် ၂၀၁၈ ခုနှစ်ကို သတင်းအချက် နှစ် (Year of Data and Information)၊ ဘဏ္ဍာနှစ် ရန်ပုံငွေများကို အကျိုးရှိစွာ ခွဲဝေသုံးစွဲ သည့်နှစ် (Year of Budget)နှင့် ဝန်ထမ်းအိမ်ရာ ဦးစားပေးဆောက်လုပ်သည့်နှစ် (Year of Staff Housing) ဟု သတ်မှတ်လုပ်ဆောင် နေကြောင်း သိရသည်။
