ယူကေနိုင်ငံ၏ နှစ်စဉ်ဖွံ့ဖြိုးရေးပံ့ပိုးမှုမှာ တစ်နှစ်လျှင် ဒေါ်လာသန်း ၁၃၀ ရှိပြီး လာမည့် ငါးနှစ်အတွက် ကျန်းမာရေး ရန်ပုံငွေ ဒေါ်လာ ၁၂၅ သန်းခန့် သုံးစွဲခွင့်ပြုထားကြောင်း ယူကေအပြည်ပြည်ဆိုင်ရာ နိုင်ငံတကာဖွံ့ဖြိုးရေးဌာန၏ ကျန်းမာရေးဆိုင်ရာ အတိုင်ပင်ခံ ဒေါက်တာ မြသက်စုမော်က ပြောကြားသည်။
နှစ်စဉ် ထောက်ပံ့နေသည့် သန်း ၁၃၀ အနက်မှ ၂၅ ရာခိုင်နှုန်းကို ကျန်းမာရေးကဏ္ဍအတွက် အသုံးပြုလျက်ရှိပြီး လာမည့် ၂၀၁၉ ခုနှစ်မှ ၂၀၂၃ ခုနှစ်အထိ ငါးနှစ်အတွင်း ကျန်းမာရေးအတွက် ဒေါ်လာ ၁၂၅ သန်းနီးပါးကို သုံးစွဲခွင့်ပြုထားခြင်း ဖြစ်သည်။
“ယူကေအစိုးရက ပြီးခဲ့တဲ့ ဇွန်လထဲမှာပဲ နောက် ငါးနှစ်ပေါ့နော်။ ၂၀၁၉ ကနေ ၂၀၂၃ ခုနှစ်အတွက် ကျန်းမာရေးနဲ့ ပတ်သက်တဲ့ ရန်ပုံငွေ နောက်ထပ် ယူကေ ပေါင်စတာလင် ၉၇ သန်းကို ထပ်ပြီး သုံးစွဲခွင့်ပြုထားတယ်။ ဒါက နောက်ငါးနှစ်ပေါ့နော်။ ယူကေရဲ့ တကယ် တမ်းကျတော့ တစ်နှစ် တစ်နှစ် မြန်မာနိုင်ငံ ဖွံ့ဖြိုးရေးအတွက် သုံးနေတာက ဒေါ်လာနဲ့ ပြောမယ်ဆို သန်း ၁၃၀ ရှိပါတယ်။ အဲဒီထဲမှာမှ ၂၅ ရာခိုင်နှုန်းကို ကျန်းမာရေးအတွက် အသုံးပြုပါတယ်။ ဒါက နှစ်စဉ် အသုံးစရိတ်နဲ့ ပြောတာ။ ငါးနှစ်အတွက် ၉၇ သန်းဆိုတာ ဒေါ်လာနဲ့ ပြောမယ်ဆိုရင် ၁၂၅ သန်းနီးပါးကို အခုရထားတယ်” ဟု ၎င်းက ပြောကြားသည်။
ယင်းကဲ့သို့ ကျန်းမာရေး စောင့်ရှောက်မှုများ ပေးရာတွင် ခက်ခဲဒေသများ၊ တိုင်းရင်းသားလူမျိုးများ ရှိသည့်နေရာများတွင် အခြေခံကျန်းမာရေး စောင့်ရှောက်မှုကို ရရှိစေရန် ပေးသွားမည်ဖြစ်ကြောင်း၊ မသန်စွမ်းသူများအတွက်လည်း အရေးကြီးကဏ္ဍတွင် ထည့်သွင်းထားပြီး ထောက်ပံ့ပေးမည် ဖြစ်ကြောင်း ၎င်းက ပြောကြားသည်။
ကျန်းမာရေးကဏ္ဍအတွက် ရန်ပုံငွေများကို ထောင်စုနှစ် ဖွံ့ဖြိုးတိုးတက်ရေး ရည်မှန်းချက် သုံးမျိုး ရန်ပုံငွေအဖွဲ့(3MDG Fund) နှင့် ရန်ကုန်ပြည်သူ့ဆေးရုံကြီး ပြန်လည်ပြုပြင်မွမ်းမံရေး ကုသိုလ်ဖြစ် ယုံမှတ်အပ်နှံမှုအဖွဲ့ (RGHRCT) တို့မှတစ်ဆင့် ပေးအပ်လျက်ရှိပြီး ငါးနှစ်တာ ငွေကြေးထောက်ပံ့မှုကို ကျန်းမာရေး စောင့်ရှောက်မှုများ လက်လှမ်းမီနိုင်ရရှိရေး ရန်ပုံငွေ (Access to Health Fund) နှင့် ယူကေ ကျန်းမာရေးအဖွဲ့အစည်းများနှင့် ပူးပေါင်းဆောင်ရွက်မည် ဖြစ်ကြောင်း သိရသည်။
၂၀၀၀ ပြည့်နှစ်မှစပြီး ယူကေနိုင်ငံမှ မြန်မာနိုင်ငံတွင် ပံ့ပိုးထောက်ပံ့မှုများ ပြုလုပ်ခဲ့ကြောင်း သိရသည်။
