၂၀၁၈ ခုနှစ် ဇွန်လ အာဆီယံနိုင်ငံများ ထုတ်လုပ်မှု PMI ညွှန်းကိန်း PMI (Manufacturing Purchasing Manager's Index-ဝယ်ယူရေးမန်နေဂျာများ၏ အညွှန်းကိန်း) တွင် မြန်မာက နှစ်လဆက်တိုက်ကျဆင်း၍ နိုင်ငံပေါင်း ခုနစ်နိုင်ငံအနက် အဆင့် (၆) နေရာအထိရောက်ပြီး နိုင်ငံခြားငွေလဲနှုန်း ဆိုးဝါးစွာ မြင့်တက်မှုကြောင့် မြန်မာနိုင်ငံတွင် ဈေးနှုန်းဖောင်းပွမှုနှုန်း အပြင်းထန်ဆုံးဖြစ်ကြောင်း Nikkei ၏ ပံ့ပိုးမှုဖြင့်ပြုလုပ်သော IHS Markit စစ်တမ်းတွင် ဖော်ပြချက်အရ သိရသည်။

၂၀၁၈ ခုနှစ် ဇွန်လအာဆီယံထုတ်လုပ်မှု PMI ညွှန်းကိန်းတွင် ဗီယက်နမ်နိုင်ငံက ၅၅ ဒသမ ၇၊ စင်ကာပူနိုင်ငံက ၅၃ ဒသမ ၆၊ ဖိလစ်ပိုင်နိုင်ငံက ၅၂ ဒသမ ၉၊ အင်ဒိုနီးရှားနိုင်ငံက ၅၀ ဒသမ ၃၊ ထိုင်းနိုင်ငံက ၅၀ ဒသမ ၂၊ မြန်မာနိုင်ငံက ၅၀၊ မလေးရှားနိုင်ငံက ၄၉ ဒသမ ၅ ရရှိခဲ့ပြီး စစ်တမ်းကောက်ယူသည့် အာဆီယံနိုင်ငံခုနစ်နိုင်ငံတွင် မြန်မာနိုင်ငံက အဆင့်ခြောက်သာ ရပ်တည်နိုင်ခဲ့ခြင်းဖြစ်သည်။

၂၀၁၈ ခုနှစ် မတ်၊ ဧပြီ အာဆီယံနိုင်ငံများ ထုတ်လုပ်မှု PMI ညွှန်းကိန်းတွင် နှစ်လဆက်တိုက် ထိပ်ဆုံး၌ ရပ်တည်ခဲ့သော မြန်မာနိုင်ငံသည် စီးပွားရေး အရှိန်ပျော့လာခြင်းကြောင့် မေတွင် အဆင့်လေး၊ ဇွန်တွင် အဆင့်ခြောက်နေရာအထိ ဆက်တိုက်ကျဆင်းခဲ့ခြင်းဖြစ်သည်။

၂၀၁၈ ခုနှစ် ဇွန်လအတွင်း မြန်မာအပါအဝင် အချို့နိုင်ငံများတွင် နိုင်ငံခြားငွေလဲနှုန်းများ ဆိုးဝါးလာ၍ သွင်းကုန်များဆိုင်ရာ ငွေကြေးဖောင်းပွမှုမှာ ပိုမိုမြင့်လာခဲ့သည်။ စစ်တမ်းမှ စောင့်ကြည့်နေသည့် ခုနစ်နိုင်ငံစလုံး ထည့်သွင်းကုန်ဈေးနှုန်းများ မြင့်တက်လာသည်ကို တွေ့ရှိခဲ့ရပြီး မြန်မာနိုင်ငံတွင် တွေ့မြင်ရသည့် ဈေးနှုန်းဖောင်းပွမှုမှာ အပြင်းထန်ဆုံးဖြစ်ခဲ့ကြောင်း စစ်တမ်းသုံးသပ်ချက်တွင် ဖော်ပြထားသည်။

မြန်မာနိုင်ငံ၏ စက်မှုကုန်ထုတ်လုပ်ငန်းများ၏ ထုတ်လုပ်မှုပမာဏများမှာ ဆက်လက်တိုးတက်လာခဲ့သော်လည်း အော်ဒါသစ်များများမှာမူ ၂၀၁၇ ခုနှစ် သြဂုတ်လမှစပြီး ပထမဦးဆုံး ကျဆင်းလာပြီး လက်ကျန် အလုပ်များပါ ကျဆင်းလာခဲ့သည်။

ဇွန်လအတွက် နစ်ကေးမြန်မာ့စက်မှုကုန်ထုတ်လုပ်ငန်း PMI အညွှန်းကိန်းမှာ ၅၀ ဖြစ်ပြီး မေလရှိ ၅၂ ဒသမ ၆ မှ ကျဆင်းခဲ့ခြင်းဖြစ်ပြီး PMI တန်ဖိုးမှာ ၂၀၁၇ ခုနှစ် စက်တင်ဘာလမှစပြီး အနိမ့်ဆုံးနှုန်းဖြစ်သည်။ ထုတ်လုပ်မှု တိုးတက်နှုန်းသည် ဇွန်လထဲတွင် နှစ်လဆက်တိုက် အားပျော့လာပြီး ၂၀၁၆ ခုနှစ် ဧပြီလမှစပြီး အားအပျော့ဆုံး တိုးတက်မှုနှုန်းဖြစ်သည်။ ကုန်ကြမ်းပစ္စည်းများ ရှားပါးလာခြင်းနှင့် သယ်ယူပို့ဆောင်ရေး ကြန့်ကြာမှုများက ထုတ်လုပ်မှု တိုးတက်နှုန်းကို ထိခိုက်စေခဲ့ကြောင်း စစ်တမ်းတွင် ပါဝင်သည့် လုပ်ငန်းများက ဆိုသည်။

ထုတ်လုပ်သူများ ရရှိခဲ့ကြသည့် အော်ဒါသစ်များမှာ ၂၀၁၇ ခုနှစ် သြဂုတ်လမှစပြီး ပထမဦးဆုံးအကြိမ် ကျဆင်းလာခဲ့ပြီး နောက်ဆုံးကျဆင်းမှုမှာ အနည်းငယ်မျှသာဖြစ်သော်လည်း ထုတ်ကုန်များရောင်းချမှု အရှိန်အဟုန် သိသာစွာ ကျဆင်းမှုကို အချက်ပြလိုက်သည်။ လုပ်ငန်းဆိုင်ရာ အခွင့်အလမ်းသစ်များ ကျဆင်းလာမှုနှင့်အတူ ပို့ဆောင်ရေးကြန့်ကြာမှုများကြောင့် အော်ဒါသစ်များရရှိမှုပါ နည်းလာကြောင်း အများစုက ညွှန်ပြခဲ့ကြသည်။

ဈေးနှုန်းများကို ဆန်းစစ်ကြည့်လျှင် ထည့်သွင်းကုန်ဈေးများ၏ ဖောင်းပွမှုနှုန်းမှာ စစ်တမ်း၏ ယခင်ကာလများတွင် မြင်ခဲ့ရသည့်နှုန်းများနှင့်ကိုက်ညီခဲ့ပြီး ကုန်ကြမ်းပစ္စည်းများ ရှားပါးလာခြင်း၊ နိုင်ငံခြားငွေလဲနှုန်းများ ဈေးကစားခဲ့ခြင်းနှင့် တရုတ်နိုင်ငံမှ ထည့်သွင်းကုန်တိုးမြှင့်ဝယ်ယူရန် လိုအပ်လာခြင်းတို့က ကုန်ကျစရိတ်များကို သိသာစွာ မြင့်မားလာအောင် တွန်းပို့ခဲ့ခြင်းဖြစ်သည်။