၂၀၁၈ ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်ကြမည့် အမျိုးသားဒီမိုကရေစီအဖွဲ့ချုပ် (NLD) ပါတီမှ လွှတ်တော်ကိုယ်စားလှယ်လောင်းများ အနေဖြင့် ပြည်ထောင်စုရွေးကောက်ပွဲ ကော်မရှင်ထံသို့ ကိုယ်စားလှယ်လောင်း အမည်စာရင်း အချိန်မီ တင်သွင်းနိုင်ရေးအတွက် သက်ဆိုင်ရာ အလုပ်အမှုဆောင်အဖွဲ့က ကြီးကြပ်ရမည်ဖြစ်ပြီး ကိုယ်စားလှယ်လောင်း အမည်စာရင်း တင်သွင်းရန် ပျက်ကွက်ပါက အရေးယူမည်ဟု NLD ပါတီ ပြောရေးဆိုခွင့်ရှိသူ ဒေါက်တာမျိုးညွန့်က ပြောကြားသည်။
ဇွန် ၂၄ ရက်တွင် ပြုလုပ်ခဲ့သော အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင်အဖွဲ့၏ အစည်းအဝေး ဆုံးဖြတ်ချက်အရ လွှတ်တော်ကိုယ်စားလှယ်နေရာ လစ်လပ်နေသည့် မဲဆန္ဒနယ်များအတွက် ကျင်းပမည့် ၂၀၁၈ ခုနှစ် ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်ရန် NLD ပါတီ ကိုယ်စားပြု လွှတ်တော်ကိုယ်စားလှယ်လောင်း ၁၃ ဦး၏ အမည်စာရင်းကို NLD ပါတီ ဗဟိုအလုပ်အမှုဆောင်အဖွဲ့က ဇွန် ၂၉ ရက်တွင် အတည်ပြု ထုတ်ပြန်ခဲ့သည်။
“ကျွန်တော်တို့က ပထမဆုံး ဒီကိုယ်စားလှယ်လောင်း စာရင်းတွေကို ကိုယ်စားလှယ်တွေဆီကို အဖွဲ့ချုပ်ကနေပြီးတော့ အတည်ပြုလိုက်တယ်ဆိုတဲ့ စာရင်းကို အခု အကုန်ပို့နေပါပြီ။ နောက်ပြီးတော့ အဲဒီလို လျှောက်လွှာတင်ဖို့ အချိန်မီတင်ဖြစ်တာကို သက်ဆိုင်ရာ အလုပ်အမှုဆောင်အဖွဲ့က ကြီးကြပ်ပြီးတော့ အစီရင်ခံဖို့လည်း ကျွန်တော်တို့ မှာကြားထားပါတယ်ခင်ဗျာ့။ ကျွန်တော်တို့ ပျက်ကွက်မှု ရှိရင်တော့ အရေးယူမှာပါ။ ဒါ အရေးကြီးတဲ့ တာဝန်ပါ” ဟု ဒေါက်တာမျိုးညွန့်က ပြောကြားသည်။
၂၀၁၇ ကြားဖြတ်ရွေးကောက်ပွဲတွင် ကယားပြည်နယ်၊ ဖရူဆိုမြို့နယ်၊ ပြည်နယ် မဲဆန္ဒနယ် အမှတ် (၁) အတွက် ကိုယ်စားလှယ်လောင်း လျှောက်လွှာကို အချိန်မီတင်သွင်းရန် ပျက်ကွက်ခဲ့သည့်အတွက် ပြည်နယ် NLD ပါတီ ဥက္ကဋ္ဌဒေါက်တာ ဒေါ်ခင်စည်သူနှင့် ဖရူဆိုမြို့နယ် NLD ပါတီဥက္ကဋ္ဌ ဦးပဲ့ဒူတို့ကို ၂၀၁၇ ခုနှစ် ဧပြီလတွင် ပါတီတာဝန်များမှ ရပ်ဆိုင်းခဲ့သည်။
၂၀၁၈ ခုနှစ် နိုဝင်ဘာ ၃ ရက်တွင် ကျင်းပရန် လျာထားသည့် ကြားဖြတ်ရွေးကောက်ပွဲတွင်လည်း အမည်စာရင်း တင်သွင်းရန် ပျက်ကွက်ခဲ့ပါက ထိုကဲ့သို့ပင် အရေးယူခံရမည်ဖြစ်ပြီး ကြားဖြတ်ရွေးကောက်ပွဲ ဝင်ရောက်ယှဉ်ပြိုင်ကြမည့် နိုင်ငံရေးပါတီများ အနေဖြင့် ကိုယ်စားလှယ်လောင်း အမည်စာရင်းကို ယခုလ ၂ ရက်မှ ၁၁ ရက်အထိ တင်သွင်းနိုင်ကြောင်း ပြည်ထောင်စုရွေးကောက်ပွဲ ကော်မရှင်က ကြေညာထားသည်။
ကိုယ်စားလှယ်လောင်း အမည်စာရင်း တင်သွင်းလွှာများကို ပြန်လည်ရုပ်သိမ်းလိုပါက ယခုလ ၁၃ ရက် နောက်ဆုံးထား၍ ရုပ်သိမ်းနိုင်ပြီး ကိုယ်စားလှယ်လောင်း အမည်စာရင်း တင်သွင်းလွှာများကို ယခုလ ၁၆ ရက်မှ ၂၂ ရက်အတွင်း စိစစ်သွားမည်ဖြစ်ကြောင်း သိရသည်။
၂၀၁၈ ကြားဖြတ်ရွေးကောက်ပွဲတွင် NLD ပါတီအနေဖြင့် လစ်လပ်မဲဆန္ဒနယ် ၁၃ နေရာစလုံးတွင် ဝင်ရောက်ယှဉ်ပြိုင်သွားမည်ဖြစ်ပြီး တိုင်းရင်းသားနယ်မြေများတွင်မူ အောင်မြင်မှု ရာနှုန်းပြည့်ရရှိရန် မသေချာကြောင်း ဒေါက်တာမျိုးညွန့်က ပြောကြားသည်။
“ကျွန်တော်တို့ကတော့ အောင်နိုင်တဲ့ အလားအလာရှိလို့ ပြိုင်တာပေါ့ဗျာ။ ဒါပေမဲ့ တိုင်းရင်းသားနယ်မြေတွေ တော်တော်လေးပါတဲ့အတွက် တိုင်းရင်းသားနယ်မြေတွေမှာတော့ ကျွန်တော်တို့အောင်မြင်မှုက ရာနှုန်းပြည့် ရချင်မှ ရပါလိမ့်မယ်” ဟု ၎င်းက ပြောကြားသည်။
ကြားဖြတ်ရွေးကောက်ပွဲတွင် နေရာအားလုံး ရွေးချယ်ခံရန် ဆုံးဖြတ်ထားပြီး နေရာတိုင်း အောင်မြင်ရေးအတွက် ညီညီညွတ်ညွတ်ဖြင့် ကြိုးစားဆောင်ရွက်မှသာ ၂၀၂၀ အထွေထွေ ရွေးကောက်ပွဲ၌ အောင်မြင်မှုများ ထပ်မံရရှိနိုင်မည်ဖြစ်ကြောင်း အမျိုးသားဒီမိုကရေစီ အဖွဲ့ချုပ် (NLD) ပါတီ၏ ဒုတိယအကြိမ် နိုင်ငံလုံးဆိုင်ရာညီလာခံ၌ သဘာပတိအဖြစ် ဆောင်ရွက်သည့် ပါတီ၏ ဗဟိုအလုပ်အမှုဆောင်အဖွဲ့ဝင် ဦးညီပု (ရခိုင်ပြည်နယ်ဝန်ကြီးချုပ်) က ပြောကြားသည်။
ဇွန် ၂၃ ရက်တွင် ရန်ကုန်မြို့ မရမ်းကုန်းမြို့နယ်ရှိ Myanmar Convention Center (MCC) ခန်းမ၌ ပြုလုပ်သည့် အမျိုးသားဒီမိုကရေစီအဖွဲ့ချုပ် ဒုတိယအကြိမ် နိုင်ငံလုံးဆိုင်ရာ ပါတီညီလာခံတွင် သဘာပတိအဖြစ် ဆောင်ရွက်သည့် ဦးညီပုက မိန့်ခွန်းပြောရာ၌ အထက်ပါကဲ့သို့ ထည့်သွင်းပြောကြားခဲ့ခြင်း ဖြစ်သည်။
