အေးရှားဝေါလ်ဖောင်ဒေးရှင်းက ဖောက်လုပ်လျက်ရှိသည့် လမ်းပိုင်းတစ်နေရာအား တွေ့ရစဉ်
အေးရှားဝေါလ်ဖောင်ဒေးရှင်းမှ ဖောက်လုပ်လှူဒါန်းသည့် အမေရိကန်ဒေါ်လာ ၂၂ သန်းအထက် ကုန်ကျမည့် အငူမော်-မောင်တောလမ်း အဆင့်မြှင့်တင်ရေးစီမံကိန်း ၃၃ ကီလိုမီတာအထိ ပြီးစီးပြီဖြစ်ကြောင်း အေးရှားဝေါလ်ဖောင်ဒေးရှင်းမှ သတင်းရရှိသည်။
အငူမော်-မောင်တောလမ်း အဆင့်မြှင့်တင်ရေး စီမံကိန်းသည် ကီလိုမီတာ ၈၀ အရှည်ရှိပြီး ပဏာမတွက်ချက်မှုများအရ အမေရိကန်ဒေါ်လာ ၂၂ သန်းအထက် ကုန်ကျမည်ဖြစ်ပြီး လက်ရှိတွင် ၃၃ ကီလိုမီတာအထိ ဖောက်လုပ်ပြီးစီးပြီဖြစ်ကြောင်း သိရသည်။
အေးရှားဝေါလ်ဖောင်ဒေးရှင်းသည် အငူမော်-မောင်တောလမ်း အဆင့်မြှင့်တင်ရေး စီမံကိန်းအား ၂၀၁၇ ခုနှစ် နိုဝင်ဘာတွင် စတင်ခဲ့ခြင်းဖြစ်ပြီး စီမံကိန်း၏ ပထမလမ်းပိုင်းဖြစ်သည့် အငူမော်-ကိုးတန်ကောက် လမ်းပိုင်း (၂၁ ကီလိုမီတာ) အား ၂၀၁၈ ခုနှစ် မေ ၁ ရက်တွင် ဖွင့်လှစ်ခဲ့ကြောင်း သိရသည်။
စီမံကိန်းလုပ်ငန်းများ ဆောင်ရွက်ရာတွင် လက်ရှိအငူမော်ဆိပ်ခံတံတားသည် လုပ်ငန်းသုံးပစ္စည်းများ အတင်အချပြုလုပ်ရာတွင် သင့်လျော်မှုမရှိခြင်းကြောင့် ကုန်တင်သင်္ဘောကြီးသုံးစင်း တစ်ပြိုင်နက်ဆိုက်ကပ်နိုင်သည့် ဆိပ်ခံတံတားသစ်အား တိုးချဲ့တည်ဆောက်ခဲ့ကြောင်း အေးရှားဝေါလ် ဖောင်ဒေးရှင်းမှ သိရသည်။ ယင်းသို့ဆိပ်ခံတံတားအား တိုးချဲ့တည်ဆောက်ခဲ့သဖြင့် စက်ယန္တရားများနှင့် ဆောက်လုပ်ရေးကုန်ကြမ်း ပစ္စည်းများကို လုပ်ငန်းခွင်သို့ လွယ်ကူစွာ သယ်ယူပို့ဆောင်နိုင်သဖြင့် စီမံကိန်းလုပ်ငန်းများကြောင်း သိရသည်။
အေးရှားဝေါလ်ဖောင်ဒေးရှင်းသည် အငူမော်-မောင်တောလမ်း အဆင့်မြှင့်တင်ရေး စီမံကိန်းလုပ်ငန်းတွင် ပါဝင်လှူဒါန်းလိုသည့် အလှူရှင်များကိုလည်း ဖိတ်ခေါ် ကြိုဆိုထားကြောင်း သိရသည်။
“အခြားသောအလှူရှင်တွေ ပါဝင်ချင်တယ်ဆိုရင်လည်း ကြိုဆိုပါတယ်လို့ ပြောချင်ပါတယ်။ ကျွန်တော်တို့ ဖောင်ဒေးရှင်းက ဒီလမ်းအတွက် ဦးစီးလုပ်ဆောင်ပေးနေပြီး အခြားအလှူရှင်တွေလည်း ပူးပေါင်းပါဝင်ကြဖို့ ကြိုဆိုဖိတ်ခေါ်ပါတယ်” ဟု အေးရှားဝေါလ်ဖောင်ဒေးရှင်းမှ တာဝန်ရှိသူတစ်ဦးက ပြောကြားသည်။
အေးရှားဝေါလ် ဖောင်ဒေးရှင်းသည် အငူမော်-မောင်တောလမ်း အဆင့်မြှင့်တင်ရေး စီမံကိန်းအား လက်ရှိတွင် လုပ်သားအင်အား ၁၂၃၁ ဦး၊ စက်ယန္တရားအင်အား ၁၇၀ အထိ အသုံးပြုကာ စီမံကိန်းလုပ်ငန်းများ ပြီးစီးရန် နေ့ညဆောင်ရွက်နေခြင်းဖြစ်ကြောင်း သိရသည်။
အငူမော်-မောင်တောလမ်းသည် စစ်တွေမြို့နှင့် မောင်တောမြို့အား ဆက်စပ်ပေးသည့် လမ်းတစ်ခုဖြစ်ပြီး အဆိုပါ လမ်းပိုင်းဖောက်လုပ်ခြင်းလုပ်ငန်း ပြီးစီးပါက စစ်တွေမှ မောင်တောသို့ လွယ်ကူလျင်မြန်စွာ သွားလာနိုင်မည်ဟု သိရသည်။
လက်ရှိသည် မိုးရာသီကာလဖြစ်သည့်အတွက် တည်ဆောက်ရေးလုပ်ငန်းများ ဆောင်ရွက်ရာတွင် လမ်းပေါ်တွင် ရေမဝပ်စေဘဲ လမ်းအောက်ခြေမှ ရေစီးဆင်းနိုင်စေရန် ဆောင်ရွက်ထားပြီး လမ်းတစ်ဖက် တစ်ချက်တွင် မြောင်းများဖော်၍ ရေစီးရေလာ ကောင်းမွန်အောင် ဆောင်ရွက်ဖောက်လုပ်နေကြောင်း အေးရှားဝေါလ်ဖောင်ဒေးရှင်းမှ သိရသည်။
