နှစ်နှစ်ကြာ ပိတ်ထားသည့် သတ္တုတွင်း လိုင်စင်ချပေးမှုကို ဇူလိုင်လကုန်ပိုင်းမှစ၍ လျှောက်လွှာများ ပြန်လည်လက်ခံမည် ဖြစ်ကြောင်း သတ္တုတွင်း ဦးစီးဌာန ဒုတိယညွှန်ကြားရေးမှူးချုပ် ဦးကျော်သက်က ဆိုသည်။
“သတ္တုတွင်း လိုင်စင်တွေကို ဇူလိုင် ၂၆ ကနေစပြီးတော့ လျှောက်လွှာလက်ခံမှာ ဖြစ်တယ်။ သတ္တုထုတ်လုပ်မှုကတော့ ရပ်ထားလို့မရဘူး။ ရပ်ထားရင် သူများက ဝင်တူးမှာလေ။ လက်ရှိမှာ လုပ်ကွက်အသစ် ချမပေးတာပဲ။ လုပ်ကွက်လိုင်စင် ချထားပေးတဲ့ သူတွေကတော့ တူးနေကြတာပေါ့။ သက်တမ်းကုန်သွားရင်လည်း တိုးပေးတယ်။ လုပ်ကွက်အသစ် လိုင်စင်ထုတ်မပေး တာကတော့ ၂၀၁၆ ဇူလိုင် ၂၇ ရက်ကတည်းက ပိတ်ထားတာ။ လျှောက်လွှာလက်ခံမယ်။ သေချာစိစစ်ပြီးတော့ လက်ခံမယ်။ လိုင်စင်အသစ် ထုတ်ပေးတဲ့ လုပ်ငန်းစဉ်ကတော့ အချိန်ယူရဦးမှာပေါ့” ဟု ဦးကျော်သက်က ပြောကြားသည်။
သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာနက ခွင့်ပြုမိန့် ထုတ်ပေးထားသည့် သတ္တုတွင်း လုပ်ငန်းပေါင်း ၁၃၉၃ တွင်းရှိပြီး အကြီးစား ၁၄၈ တွင်း၊ အသေးစား ၇၈၅ တွင်း၊ စမ်းသပ် ၃၂၃ တွင်း၊ စမ်းသပ်ဖြစ်မြောက် ၂၃ တွင်း၊ လက်လုပ်လက်စား ၂၂ တွင်းနှင့် အသေးစားဆင့်တက် ၉၂ တွင်း ရှိကြောင်း သိရသည်။
အဆိုပါ ခွင့်ပြုမိန့် ထုတ်ပေးထားသည့် သတ္တုတွင်းများသည် ကချင်ပြည်နယ်တွင် ၁၁၈ တွင်း၊ ကယားပြည်နယ်တွင် ၂၁ တွင်း၊ ကရင်ပြည်နယ်တွင် ၅၇ တွင်း၊ ချင်းပြည်နယ်တွင် သုံးတွင်း၊ စစ်ကိုင်းတိုင်း ဒေသကြီးတွင် ၂၁၈ တွင်း၊ တနင်္သာရီတိုင်း ဒေသကြီးတွင် ၉၇ တွင်း၊ နေပြည်တော်တွင် သုံးတွင်း၊ ပဲခူးတိုင်း ဒေသကြီးတွင် ခြောက်တွင်း၊ မကွေးတိုင်း ဒေသကြီးတွင် တွင်း ၆၀၊ မန္တလေးတိုင်း ဒေသကြီးတွင် တွင်း ၄၅၀၊ မွန်ပြည်နယ်တွင် ၂၅ တွင်း၊ ရခိုင်ပြည်နယ်တွင် လေးတွင်း၊ ရှမ်းပြည်နယ်တောင်ပိုင်းတွင် ၁၄၆ တွင်း၊ ရှမ်းပြည်နယ် မြောက်ပိုင်းတွင် ၈၈ တွင်း၊ ရှမ်း ပြည်နယ် အရှေ့ပိုင်းတွင် ၉၃ တွင်း၊ ဧရာဝတီတိုင်း ဒေသကြီးတွင် သုံးတွင်းနှင့် ရန်ကုန်တိုင်း ဒေသကြီးတွင် တစ်တွင်း ခွင့်ပြုထားကြောင်း သိရသည်။
၂၀၁၅-၂၀၁၆ ဘဏ္ဍာနှစ်တွင် လုပ်ငန်းအမျိုးအစားများနှင့် သက်ဆိုင်သော အခွန်အခရငွေအားလုံး၏ သုံးရာခိုင်နှုန်းကို သတ္တုကဏ္ဍမှ ကောက်ခံရရှိကြောင်း၊ အစိုးရအနေဖြင့် သတ္တုကဏ္ဍမှ ကျပ် ၉၈၅၈၃ သန်း ကောက်ခံရရှိခဲ့ကြောင်း၊ ၂၀၁၅-၂၀၁၆ ဘဏ္ဍာနှစ်တွင် သတ္တုကဏ္ဍမှ ကုမ္ပဏီပေါင်း ၂၈ ခုအား စာရင်းတိုက်ဆိုင် စစ်ဆေးခဲ့ပြီး မြန်မာနိုင်ငံ၏ သတ္တုကဏ္ဍမှ ရရှိသော အခွန်ဘဏ္ဍာငွေ အားလုံး၏ ရာခိုင်နှုန်း ၄၀ ကို လွှမ်းခြုံကြောင်း၊ အဆိုပါ ကုမ္ပဏီများသည် အစိုးရသို့ အခွန်ငွေ အနည်းဆုံး ကျပ်သန်း ၂၅၀ နှင့် အထက် ပေးဆောင်သည့် ကုမ္ပဏီများဖြစ်ကြောင်း EITI ၏ တတိယအကြိမ် အစီရင်ခံစာတွင် ဖော်ပြထားသည်။
ထို့ပြင် အခြားသတ္တုများ ထုတ်လုပ်မှု တန်ဖိုးသည် ကျပ် ၄၁၇၁၇၅ သန်းရှိကြောင်း၊ တင်ပို့ရောင်းချ ခဲ့ခြင်းသည် ကျပ်၁၂၉၂၃ သန်းရရှိခဲ့ကြောင်း၊ အခြားသတ္တုကဏ္ဍရှိ နိုင်ငံပိုင်လုပ်ငန်းများမှ ဖြည့်သွင်းသော အစီရင်ခံစာအရ အစိုးရ၏ ထုတ်လုပ်မှုအပေါ် ခွဲဝေခံစားမှုအရပစ္စည်း (In Kind) ဖြင့် ရရှိသောသတ္တုကို ရောင်းချရာတွင် ၂၀၁၅-၂၀၁၆ ဘဏ္ဍာနှစ်တွင် ကျပ် ၃၅၇၆၈ သန်းရရှိပြီး ယင်းသည် အခြားသတ္တုကဏ္ဍမှ ရရှိသော ဘဏ္ဍာငွေ စုစုပေါင်း၏ ၃၆ ဒသမ ၃ ရာခိုင်နှုန်းကို ကိုယ်စားပြုကြောင်း အစီရင်ခံစာတွင် ဖော်ပြထားသည်။
၂၀၁၄-၂၀၁၅ ဘဏ္ဍာနှစ်တွင် တွင်းထွက်သယံဇာတ တူးဖော်ရေးလုပ်ငန်း ကုမ္ပဏီများက ပေးသွင်းအခွန်အခများနှင့် အစိုးရအေဂျင်စီများ လက်ခံရရှိသော အခွန်အခများ၏ အသားတင် ကွာဟချက်သည် ၂ ဒသမ ၈ ရာခိုင်နှုန်းဖြစ်ပြီး ၂၀၁၅-၂၀၁၆ ဘဏ္ဍာနှစ်တွင် အသားတင် ကွာဟချက်သည် ၁ ဒသမ ၈၈ ရာခိုင်နှုန်းရှိကြောင်း အစီရင်ခံစာတွင် ဖော်ပြထားသည်။
