၂၀၁၈ ခုနှစ် ဧပြီလအထိ မြန်မာနိုင်ငံတွင် Brand New ကားသစ် ၃၇၁၅ စီးရောင်းချခဲ့ပြီး တပ်ဆင်ထုတ်လုပ်မှု အစီးရေ ၂၆၇၀ အထိရှိကာ တိုးတက်မှုနှုန်းမြင့်မားနေ

၂၀၁၈ ခုနှစ် ဧပြီလအထိ မြန်မာနိုင်ငံတွင် Brand New ကားသစ် ၃၇၁၅ စီးရောင်းချခဲ့ပြီး တပ်ဆင်ထုတ်လုပ်မှု အစီးရေ ၂၆၇၀ အထိရှိကာ တိုးတက်မှုနှုန်းမြင့်မားနေ
Published 1 July 2018

ဂျပန်အခြေစိုက် Mazda ၏ အရောင်းမြှင့်တင်ရေး အခမ်းအနားတစ်ခုကို တွေ့ရစဉ်

၂၀၁၈ ခုနှစ် ဧပြီလအထိ မြန်မာနိုင်ငံတွင် Brand New ကားသစ်စီးရေ ၃၇၁၅ စီး ရောင်းချနိုင်ခဲ့ပြီး ယခင်နှစ်ကာလတူထက် ၉၃ ရာခိုင်နှုန်းကျော် များပြားခဲ့ကာ အာဆီယံနိုင်ငံများအနက် တိုးတက်မှုနှုန်းအမြင့်ဆုံး ဖြစ်နေကြောင်း ASEAN Automotive Federation မှ သိရသည်။

၂၀၁၈ ခုနှစ် ဧပြီလကုန်အထိ အာဆီယံနိုင်ငံများအလိုက် ကားသစ်ရောင်းချမှု ပမာဏမှာ အင်ဒိုနီးရှားတွင် ၃၉၄၄၂၁ စီး၊ ထိုင်းတွင် ၃၁၆၂၉၉ စီး၊ မလေးရှားတွင် ၁၈၂၂၂၉ စီး၊ ဖိလစ်ပိုင်တွင် ၁၁၁၆၂၀ စီး၊ ဗီယက်နမ်တွင် ၈၀၆၈၁ စီး၊ စင်ကာပူတွင် ၂၈၀၂၅ စီး၊ မြန်မာတွင် ၃၇၁၅ စီး၊ ဘရူနိုင်းတွင် ၃၅၇၁ စီးဖြစ်သည်။

၂၀၁၇ ခုနှစ်အတွင်း မြန်မာနိုင်ငံတွင် Brand New ကားသစ်စီးရေ ၈၂၂၅ စီး ရောင်းချနိုင်ခဲ့ပြီး ၂၀၁၆ ခုနှစ်ကထက် ၉၇ ရာခိုင်နှုန်းကျော်များပြားခဲ့သည်။ လက်ရှိ ၂၀၁၈ ခုနှစ်တွင်လည်း ၂၀၁၇ ခုနှစ်ကာလတူထက်  ပိုမိုရောင်းချခဲ့ရသည်။ ၂၀၁၈ ဇန်နဝါရီတွင် ၈၉၁ စီး၊ ဖေဖော်ဝါရီတွင် ၁၀၇၉ စီး၊ မတ်တွင် ၂၉၆၂ စီး၊ ဧပြီတွင် ၃၇၁၅ စီး ရောင်းချနိုင်ခဲ့ပြီး ယခင်နှစ်ကာလတူထက် ၁၇၉၇  စီး ပိုမိုရောင်းနိုင်ခဲ့ကာ တိုးတက်မှုနှုန်း ၉၃ ဒသမ ၇ ရာခိုင်နှုန်းအထိဖြစ်ပေါ်ခဲ့သည်။

၂၀၁၆ ခုနှစ်တွင် မြန်မာနိုင်ငံအတွင်း ကားသစ်စီးရေ ၄,၁၆၈ စီး ရောင်းချခဲ့ရပြီး ၂၀၁၇ ခုနှစ်အတွင်း မြန်မာအစိုးရ၏ ကားတင်သွင်းမှုဆိုင်ရာမူဝါဒ အပြောင်းအလဲကြောင့် ကားသစ်စီးရေ ၈,၂၀၀ ကျော်အထိ ရောင်းချခဲ့ရခြင်းဖြစ်သည်။ ကားသစ်များ ရောင်းချမှုနှင့် ထုတ်လုပ်မှုများအတွက် မြန်မာဈေးကွက်သည် ထွန်းသစ်စဈေးကွက်တစ်ခုဖြစ်လာပြီး နှစ်အလိုက်တိုးတက်မှုနှုန်း ဆက်လက်မြင့်မားမည်ဟု ခန့်မှန်းထားသည်။

ကားသစ်ရောင်းချမှုပမာဏတိုးတက်မှုနည်းတူ မြန်မာနိုင်ငံတွင် ကားသစ်ထုတ်လုပ်မှု ပမာဏတိုးတက်မှုလည်း အာဆီယံနိုင်ငံများအနက် အမြင့်ဆုံးဖြစ်နေသည်။ အာဆီယံနိုင်ငံများတွင် မြန်မာနိုင်ငံအပါအဝင် နိုင် ငံခြောက်နိုင်ငံတွင် ကားသစ်တပ်ဆင်ထုတ်လုပ်မှုများပြုလုပ်နေပြီး အာဆီယံဒေသတစ်ခုလုံး အနေဖြင့် ၂၀၁၇ ခုနှစ်တွင် ၀ ဒသမ ၆ ရာခိုင်နှုန်းသာ တိုးတက်မှုရှိသော်လည်း မြန်မာနိုင်ငံက ရာခိုင်နှုန်း ၃၂၀ ကျော် တိုးတက် ခဲ့သည်။

၂၀၁၈ ခုနှစ် မတ်လကုန်အထိ အာဆီယံနိုင်ငံများအလိုက် ကားတပ်ဆင်ထုတ်လုပ်မှု ပမာဏမှာ ထိုင်းက ၆၇၄၄၆၉ စီး၊ အင်ဒိုနီးရှားက ၄၄၆၈၅၅ စီး၊ မလေးရှားက ၁၉၈၀၅၃ စီး၊ ဗီယက်နမ်က ၆၅၉၇၇ စီး၊ ဖိလစ်ပိုင်က ၃၁၀၆၄ စီး၊ မြန်မာက ၂၆၇၀ ဖြစ်သည်။

မြန်မာနိုင်ငံတွင် ၂၀၁၇ ခုနှစ်အတွင်း တပ်ဆင်ထုတ်လုပ်သည့် ကားသစ်စီးရေမှာ ၄၉၃၀ စီးဖြစ်ပြီး ၂၀၁၆ ခုနှစ်ကထက် ၃၇၇၈ စီး ပိုမိုခဲ့ကာ တိုးတက်မှုပမာဏ ၃၂၈ ရာခိုင် နှုန်းရှိခဲ့သည်။ ၂၀၁၈ ခုနှစ်တွင်လည်း ဇန်နဝါရီ တွင် ၆၁၀ ၊ ဖေဖော်ဝါရီတွင် ၇၇၇ စီး၊ မတ်တွင် ၆၆၅ စီး၊ ဧပြီတွင် ၆၁၈ စီး တပ်ဆင် ထုတ်လုပ်နိုင်ခဲ့ပြီး ယခင်နှစ်ကာလတူထက် ၁၈၄၁ စီးပိုမိုခဲ့ကာ တိုးတက်မှုနှုန်း ၂၂၂ ဒသမ ၁ ရာခိုင်နှုန်းအထိရှိခဲ့သည်။

Most Read

Most Recent