နိုင်ငံတကာစက်သုံးဆီဈေးနှုန်းနှင့် နိုင်ငံခြားငွေလဲနှုန်း မြင့်တက်လာခြင်းကြောင့် ပြည်တွင်းစက်သုံးဆီဈေးနှုန်းကို ထိန်းညှိနိုင်ရန်အတွက် ဇူလိုင် ၁ ရက်မှစတင်ကာ နိုင်ငံပိုင် စက်သုံးဆီအရောင်းဆိုင် ရှစ်ဆိုင်က သင့် တော်သောဈေးနှုန်းဖြင့် တိုက်ရိုက်ပိတ်ရက်မရှိ လက်လီဖြန့်ဖြူးရောင်းချသွားမည်ဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာနမှ သိရသည်။
နိုင်ငံတကာစက်သုံးဆီဈေးနှုန်းနှင့် နိုင်ငံခြားငွေလဲနှုန်း မြင့်တက်လာခြင်းကြောင့် ပြည်တွင်းစက်သုံးဆီဈေးနှုန်းကို ထိန်းညှိနိုင် ရန်ရည်ရွယ်၍ လျှပ်စစ်နှင့်စွမ်းအင်ဝန်ကြီးဌာန၊ မြန်မာ့ရေနံဓာတုဗေဒလုပ်ငန်း၊ ရေနံ ဓာတုဗေဒစက်ရုံစု (သံပုရာကန်) မှ ထုတ်လုပ်သည့် ပြည်တွင်းထုတ်ဓာတ်ဆီများအား သင့်တော်သောဈေးနှုန်းဖြင့် ဇူလိုင် ၁ ရက်မှ စတင်၍ မြန်မာ့ရေနံထွက်ပစ္စည်း ရောင်းဝယ်ရေး လုပ်ငန်း၏ နိုင်ငံပိုင်စက်သုံးဆီအရောင်း ဆိုင် ရှစ်ဆိုင်မှတစ်ဆင့် မော်တော်ယာဉ်ငယ်များ၊ ဆိုင်ကယ်များသုံးစွဲရန် တိုက်ရိုက်ရောင်းချသွားမည်ဖြစ်ကြောင်း ထုတ်ပြန်ထားသည်။
ယင်းကဲ့သို့ ရောင်းချပေးရာတွင် နိုင်ငံပိုင် စက်သုံးဆီအရောင်းဆိုင် ရှစ်ဆိုင်ဖြစ် သည့် နေပြည်တော် (၀၃၅၄)၊ ရန်ကုန် (၀၂၇၅)၊ ရန်ကုန် (၀၂၅၄)၊ ရန်ကုန် (၀၂၄၇)၊ မန္တလေး (၀၆၁၁)၊ မန္တလေး (၀၆၁၄)၊ ပဲခူး (၀၁၉၂) နှင့် ဟင်းငုတ်ပင် (တောင်ငူ) (၀၁၆၀) နိုင်ငံပိုင်စက်သုံးဆီဆိုင်များမှ တိုက်ရိုက် ရောင်းချပေးသွားမည်ဖြစ်ကြောင်း သိရသည်။
လျှပ်စစ်နှင့် စွမ်းအင်ဝန်ကြီးဌာနအနေ ဖြင့် ပြည်တွင်းစက်သုံးဆီဈေးနှုန်း ကြီးမြင့်နေခြင်းကို လျှော့ချနိုင်ရေးအတွက် ဓာတ်ဆီ တစ်ဂါလန်ကို ကျပ် ၃၂၀၀ ဖြင့် ဂါလန်ပေါင်းသုံးသန်းကို မြန်မာနိုင်ငံစက်သုံးဆီ တင်သွင်း ဖြန့်ဖြူးရောင်းချရေးအသင်းထံသို့ ဧပြီလအကုန်ပိုင်းမှ စတင်ဖြန့်ဖြူးရောင်းချပေးထားကြောင်း ဇွန် ၇ ရက်က လျှပ်စစ်နှင့် စွမ်းအင် ဝန်ကြီးဌာန၏ သတင်းထုတ်ပြန်ချက်အရ သိရသည်။
လျှပ်စစ်နှင့် စွမ်းအင်ဝန်ကြီးဌာနက မြန်မာနိုင်ငံစက်သုံးဆီတင်သွင်း ဖြန့်ဖြူး ရောင်းချရေးအသင်းသို့ ရောင်းချပေးထားသော စက်သုံးဆီဈေးနှုန်းသည် ဓာတ်ဆီတစ်လီတာလျှင် ကျပ် ၇၁၀ ကျော်သာ ကျသင့်မည် ဖြစ်သည်။
