ကြားဖြတ်ရွေးကောက်ပွဲ ဝင်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်းများ၏ အမည်စာရင်းကို ဇွန် ၂၉ ရက်တွင် အမျိုးသားဒီမိုကရေစီအဖွဲ့ချုပ် (NLD) ပါတီက ထုတ်ပြန်ကြေညာသည်။
အဆိုပါ ကိုယ်စားလှယ်လောင်းများအား ရွေးချယ်ရာတွင် ပြည်သူ့အကျိုးဆောင် ရွက်နိုင်ရေးအဓိကကျသည့်အတွက် အရည်အချင်းပြည့်ဝရေးကို ဦးစားပေးရွေးချယ်ထားကြောင်း NLD ပါတီ၏ ပြောရေးဆိုခွင့်ရှိသူ ဒေါက်တာမျိုးညွန့်က ပြောကြားသည်။
ဇွန် ၂၄ ရက်တွင် ပြုလုပ်ခဲ့သော အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင်အဖွဲ့၏ အစည်းအဝေး ဆုံးဖြတ်ချက်အရ လွှတ်တော်ကိုယ်စားလှယ်နေရာ လစ်လပ်နေသည့် မဲဆန္ဒနယ်များအတွက် ကျင်းပမည့် ၂၀၁၈ ခုနှစ် ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်ရန် NLD ပါတီကိုယ်စား ပြုလွှတ်တော်ကိုယ်စားလှယ်လောင်းများကို ဗဟိုအလုပ်အမှုဆောင်အဖွဲ့က ဇွန် ၂၉ ရက် တွင် အတည်ပြုထုတ်ပြန်ခဲ့ခြင်း ဖြစ်သည်။
ယခု အတည်ပြုထုတ်ပြန်ခဲ့သော ကိုယ်စားလှယ်လောင်းများကို NLD ပါတီ၏ ကိုယ်စားလှယ်ဖြစ်ကြောင်း ထောက်ခံစာများကိုလည်း တစ်ပြိုင်တည်းထုတ်ပေးနေပြီး ၎င်းတို့ အနေဖြင့် သက်ဆိုင်ရာ မဲဆန္ဒနယ်မြေများတွင် အကောင်းဆုံး ဆောင်ရွက်ကြရန် မှာကြားနေသည်ဟု ဒေါက်တာမျိုးညွန့်က ဆိုသည်။
၂၀၁၅ အထွေထွေရွေးကောက်ပွဲတွင် လိုအပ်ချက်အရ ပါတီတံဆိပ်ကြည့်၍ မဲပေးရန် ပါတီဥက္ကဋ္ဌ ဒေါ်အောင်ဆန်းစုကြည်က တိုက်တွန်းခဲ့သော်လည်း လက်ရှိအချိန်တွင်မူ ပြည်သူ့အကျိုးဆောင်ရွက်ရန် အရည်အချင်းကို ဦးစားပေးရွေးချယ်ထားကြောင်း ဒေါက်တာမျိုးညွန့်က ပြောကြားသည်။
“ပြည်သူတွေရဲ့ အကျိုးကိုဆောင်ရွက်ဖို့က အခုအခါမှာ ပိုပြီးတော့ အဓိကကျလာတဲ့အတွက် အရည်အချင်း ပြည့်ဝဖို့ကို ကျွန်တော်တို့ ဦးစားပေးရွေးချယ်ထားပါတယ်” ဟု ၎င်းက ပြောကြားသည်။
၂၀၁၈ ခုနှစ် ကြားဖြတ်ရွေးကောက်ပွဲကို နိုဝင်ဘာ ၃ ရက်တွင် ကျင်းပရန် ပြည်ထောင်စုရွေးကောက်ပွဲကော်မရှင်က ကြေညာထားပြီး ချင်းပြည်နယ်၊ရှမ်းပြည်နယ်၊ ရန်ကုန်တိုင်း ဒေသကြီး၊ မန္တလေးတိုင်းဒေသကြီး၊ ကချင်ပြည်နယ်၊ စစ်ကိုင်းတိုင်းဒေသကြီးစသည့် တိုင်းဒေသကြီးနှင့်ပြည်နယ်များရှိ လစ်လပ်မဲ ဆန္ဒနယ် ၁၃ နေရာတွင် ကြားဖြတ်ရွေးကောက်ပွဲ ပြုလုပ်ပေးမည် ဖြစ်သည်။
NLD ပါတီအနေဖြင့် လက်ရှိရွေးချယ်ထားသော ကိုယ်စားလှယ်လောင်းများသည် NLD ပါတီ၏ နိုင်ငံရေးတွင် ထဲထဲဝင်ဝင် ပါဝင်ဆောင်ရွက်ခဲ့သူများကို ရွေးချယ်ထားခြင်းဖြစ်ပြီး တိုင်းရင်းသားဒေသများအတွက် ဒေသဆိုင်ရာ ဘာသာစကား ကျွမ်းကျင်သူကို ဦးစားပေးရွေးချယ်ထားကြောင်း ဒေါက်တာမျိုးညွန့်က ပြောကြားသည်။
