တိုင်းရင်းသားများအနေဖြင့် ဒီမိုကရေစီရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့် အခြေခံမူသုံးချက်အား မရမချင်း ဆက်လက်တောင်းဆိုမည်ဖြစ်ပြီး တောင်းဆိုမှုများတွင် ခွဲထွက်ခွင့်ပါမည်မဟုတ်ကြောင်း UPDJC ဒုတိယဥက္ကဋ္ဌ ဒေါက်တာဆလိုင်းလျန်မှုန်းဆာခေါင်းက ပြောကြားသည်။
ဇွန် ၂၉ ရက်က နေပြည်တော်ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန (NRPC) တွင် ပြုလုပ်သည့် ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အစည်းအဝေးတွင် ဒေါက်တာဆလိုင်းလျန်မှုန်းဆာခေါင်းက အဖွင့်အမှာစကား ပြောကြားရာတွင် အထက်ပါကဲ့သို့ ထည့်သွင်းပြောကြားခဲ့ခြင်း ဖြစ်သည်။
“အခုမနှစ်ကထိန်းချုပ်မှုတွေကြောင့် တစ်နှစ်တာညီလာခံမကျင်းပသော်လည်း အခုအချိန်မှာ ကျွန်တော်တို့လို အပ်ရင်လိုအပ်သလို ကျွန်တော်တို့ကျော်လွှားပြီးတော့ တခြားအခြေခံမူတွေကို ဆွေးနွေးရမှာပဲဖြစ်ပါတယ်။ သို့သော် ကျွန်တော်တို့အနေနဲ့ကတော့ ကျွန်တော်တို့ တိုင်းရင်းသားတွေအနေနဲ့ကတော့ ဒီအခြေခံမူ သုံးခုမရမချင်းကတော့ ဆက်လက်ပြီးတော့ တောင်းဆိုနေဦးမှာပဲ ဖြစ်ပါတယ်တယ်လို့ ကျွန်တော်ရိုးသားစွာပဲ တင်ပြချင်ပါတယ်။ ဒီတောင်းဆိုမှုထဲမှာတော့ ခွဲထွက်ခွင့်တော့ပါမှာ မဟုတ်ပါဘူးဆိုပြီးတော့လည်း ကျွန်တော်တင်ပြချင်ပါတယ်” ဟု ဒေါက်တာဆလိုင်းလျန်မှုန်းဆာခေါင်းက ပြောကြားသည်။
တိုင်းရင်းသားလူမျိုးများ ပြည်ထောင်စုထဲမှ ခွဲထွက်ချင်စိတ်မရှိအောင် အာမခံချက်ပေးနိုင်သည့် နိုင်ငံရေးအခြေခံမူသည် ဒီမိုကရေစီရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်အခွင့် အရေးအပြည့်အဝရှိသည့် ပြည်ထောင်စုတည်ဆောက်ရေးဖြစ်ကြောင်း ဒေါက်တာဆလိုင်းလျန်မှုန်းဆာခေါင်းက ဆက်လက်ပြောကြားသည်။
ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်တီအစည်းအဝေးတွင် ပါဝင်သည့် အစိုးရ၊ လွှတ်တော်၊ တပ်မတော်နှင့် နိုင်ငံရေးပါတီမှ ခေါင်းဆောင်များအနေဖြင့် ဗိုလ်ချုပ်အောင်ဆန်းက ဗမာလူမျိုးများအား တာဝန်ပေးခဲ့သည့်အတိုင်း တိုင်းရင်းသားများ ပြည်ထောင်စုထဲမှ ခွဲထွက်ချင်စိတ်မရှိရန် ဆောင်ရွက်ပေးရေး အခြေခံမူများနှင့်အညီ အကောင်အထည်ဖော်ဆောင်ရွက်ပေးရန် အလေးအနက် မေတ္တာရပ်ခံလိုကြောင်း ဒေါက်တာဆလိုင်းလျန်းမှုန်းဆာခေါင်းက ပြောကြားသည်။
“ဒီနေ့ UPDJC အစည်းအဝေးမှာ အမျိုးသားတန်းတူရေး၊ ကိုယ်ပိုင်ပြဋ္ဌာန်းခွင့်နဲ့ ဖက်ဒရယ်မူတွေကိုဆွေးနွေးရ မှာမဟုတ်ပေမယ့် အခြားလိုအပ်တဲ့ ကျွန်တော်တို့ တိုင်းရင်းသား လူနည်းစုများရဲ့အခွင့်အရေးကို ကာကွယ်ခြင်း၊ အခြေခံအခွင့်အရေးများနဲ့ ကျား၊ မတန်းတူရေးဆိုင်ရာ ကိစ္စတွေကိုလည်း ကျွန်တော်တို့အလေးအနက်ထားပြီးတော့ ဆွေးနွေးရမှာ ဖြစ်ပါတယ်။ ဒီမှာ ကျွန်တော်တင်ပြလိုတာက တိုင်းရင်းသားအခွင့်အရေးကို နိုင်ငံသားအခွင့်အရေးတစ်ခုတည်းနဲ့ မကာကွယ်နိုင်ဘူး။ အလုံအလောက်ကျွန်တော်တို့ကို အကာကွယ်မပေးနိုင်ဘူး။ တိုင်းရင်းသားအခွင့်အရေး၊ တိုင်းရင်းသား လူနည်းစုအခွင့်အရေးတွေကို ကျွန်တော်တို့ ကျယ်ကျယ်ပြန့်ပြန့် ဆွေးနွေးဖို့ လိုအပ်ပါတယ်” ဟု ဒေါက်တာဆလိုင်း လျန်မှုန်းဆာခေါင်းက ဆက်လက်ပြောကြားသည်။
ယခုကျင်းပမည့် ပြည်ထောင်စုငြိမ်းချမ်းရေး ညီလာခံ- ၂၁ ရာစုပင်လုံ တတိယအစည်းအဝေးတွင် တိုင်းရင်းသားလူနည်းစုအခွင့်အရေး၊ ဒီမိုကရေစီအရေး၊ ကျား၊မ တန်းတူရေးနှင့် စသည့် အကြောင်းအရာများကို ဆွေးနွေးသွားမည်ဖြစ်ပြီး အစည်းအဝေးအား ဇူလိုင် ၁၁ ရက်တွင် စတင်ကျင်းပရန် UPDJC က အတည်ပြု ဆုံးဖြတ်ထားသည်။
