လူသုံးနှင့် အိမ်သုံးကုန် ပစ္စည်းများတွင် သုံးစွဲပုံနှင့် ပတ်သက်သော သတင်းအချက်အလက်နှင့် ညွှန်ကြားချက်များကို မြန်မာဘာသာဖြင့် ဖြစ်စေ၊ မြန်မာနှင့် အခြားဘာသာ တွဲလျက်ဖြစ်စေ ဖော်ပြန်ရန် အမိန့်ကြော်ငြာစာ ထုတ်ပြန်မည်ဖြစ်ကြောင်း စားသုံးသူ ကာကွယ်ရေး ဗဟိုကော်မတီရုံးမှ သိရသည်။
“ကုန်စည်များနဲ့ ပတ်သက်ပြီး ကုန်စည်များဆိုတာ လူသုံးနဲ့ အိမ်သုံးကုန်ပစ္စည်းတွေကို ဒီအမိန့်နဲ့ ကြော်ငြာပြီး ထုတ်ပြန်သွားမှာပါ။ မကြာခင် အချိန်အတွင်းမှာ ထုတ်ပြန်နိုင်ဖို့ ဆောင်ရွက်နေပါတယ်။ အဓိကက တရားမဝင် ဝင်ရောက်လာတဲ့ ကုန်စည်များနဲ့ ပြည်တွင်းထုတ်လုပ်တဲ့ ကုန်စည်တွေ ဈေးကွက်အတွင်း ယှဉ်ပြိုင်ရောင်းချရာမှာ ပြည်တွင်း ထုတ်လုပ်သူတွေ ပိုမိုအကျိုးဖြစ်ထွန်းစေတယ်။ နောက်တစ်ချက်က အရည်အသွေးပိုင်းကို ပိုမိုဂရုစိုက်လာပြီး တန်ဖိုးမြင့် ထုတ်ကုန်တွေ တိုးတက်ဖွံ့ဖြိုးလာမှာ ဖြစ်ပြီး နယ်စပ်ဒေသ ဒါမှမဟုတ် တစ်ဖက်နိုင်ငံက တခြားဘာသာ နဲ့ ရိုက်နှိက်တဲ့ တရားမဝင် တင်သွင်းလာတဲ့ ကုန်စည်တွေကို ဖမ်းဆီး အရေးယူရာမှာ ပိုမို ထိရောက်စေတဲ့အပြင် သုံးစွဲပုံတွေကို မြန်မာလို သိရတော့ အန္တရာယ်ကင်းစေနိုင်တယ်” ဟု စားသုံးသူ ကာကွယ်ရေး ဗဟိုကော်မတီရုံး အဖွဲ့တာဝန်ခံ၊ စားသုံးသူရေးရာ ဦးစီးဌာန ဒုတိယညွှန်ကြားရေးမှူး ဦးစိုးအောင်က ဆိုသည်။
စားသုံးသူ အကာအကွယ်ပေးရေး ဥပဒေ ၏ အခန်း(၇) စီးပွားရေး လုပ်ငန်းရှင်အတွက် တားမြစ်ချက် အခန်းမှ ပုဒ်မ ၈ (ဃ) တွင် သုံးစွဲပုံနှင့် ပတ်သက်သော သတင်းအချက်အလက် သို့မဟုတ် ညွှန်ကြားချက်များကို ဗဟိုကော်မတီက သတ်မှတ်ထားသော နေ့ရက်မှစ၍ မြန်မာဘာသာဖြင့် ဖြစ်စေ၊ မြန်မာနှင့် အခြားဘာသာ တွဲလျက်ဖြစ်စေ ဖော်ပြထားခြင်း မရှိသော ကုန်စည်ဟု ပြဋ္ဌာန်းခဲ့သည်။
ထို့ပြင် လူသုံးနှင့် အိမ်သုံးကုန်ပစ္စည်းများတွင် သုံးစွဲပုံနှင့် ပတ်သက်သော သတင်းအချက်အလက်နှင့် ညွှန်ကြားချက်များကို မြန်မာဘာသာဖြင့် ဖြစ်စေ၊ မြန်မာနှင့် အခြားဘာသာ တွဲလျက်ဖြစ်စေ ဖော်ပြန်ရန် အမိန့်ကြော်ငြာစာ ထုတ်ပြန်ပြီးချိန်တွင် လိုက်နာခြင်းမရှိပါက ဥပဒေပါ ပုဒ်မ ၁၉ ဖြင့် အရေးယူမည် ဖြစ်ကြောင်း ၎င်းကဆိုသည်။ စားသုံးသူ အငြင်းပွားမှု ဖြေရှင်းရေးအဖွဲ့သည် စီးပွားရေးလုပ်ငန်းရှင်က ပုဒ်မ ၇၊ ပုဒ်မခွဲ(ခ) တွင် ဖော်ပြထားသည့် တာဝန်တစ်ရပ်ကို လိုက်နာရန် ပျက်ကွက်ကြောင်း သို့မဟုတ် ပုဒ်မ ၈ တွင် ဖော်ပြထားသည့် တားမြစ်ချက် တစ်ရပ်ရပ်ကို ဖောက်ဖျက်ကြောင်း စစ်ဆေးတွေ့ရှိပါက သတိပေးခြင်း၊ ပြင်းထန်စွာ သတိပေးခြင်း၊ လျော်ကြေးပေးခြင်း၊ အငြင်းပွားလျက်ရှိသော ကုန်စည်ကို ရောင်းချ ဖြန့်ဖြူးခြင်းအား ကာလ အကန့်အသတ်ဖြင့် တားမြစ်ခြင်း၊ ဈေးကွက်အတွင်းမှ ပြန်လည် သိမ်းဆည်းစေခြင်း၊ စားသုံးသူတို့အား ဘေးဥပဒ်ဖြစ်စေနိုင်သော ကုန်စည်များကို ဖျက်ဆီးစေခြင်းနှင့် လုပ်ငန်းလိုင်စင် ယာယီ ပိတ်သိမ်းခြင်း သို့မဟုတ် အမြဲပိတ်သိမ်းခြင်းတို့ကို ဆောင်ရွက်ရန် လိုအပ်ပါက သက်ဆိုင်ရာ ဝန်ကြီးဌာနများနှင့် ညှိနှိုင်း ဆောင်ရွက်ခြင်း စသည်ဖြင့် ပုဒ်မ ၁၉ တွင် ပြဋ္ဌာန်းထားသည်။
