<

ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ် ၁၃ နေရာ၌ ဇူလိုင် ၉ ရက်တွင် မဲဆန္ဒရှင်စာရင်းကို အိမ်ထောင်စုအလိုက် ကြေညာမည်

ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ် ၁၃ နေရာတွင် မဲဆန္ဒရှင် စုစုပေါင်း ကိုးသိန်းကျော်ရှိပြီး ဇူလိုင် ၉ ရက်၌ မဲဆန္ဒရှင်စာရင်းကို အိမ်ထောင်စုအလိုက် ကပ်ထားကြေညာမည်ဖြစ်ကြောင်း သတင်းရရှိသည်။

၂၀၁၈ ခုနှစ် နိုဝင်ဘာ ၃ ရက်တွင် လစ်လပ်မဲဆန္ဒနယ် (၁၃) နေရာ၌ ကြားဖြတ်ရွေးကောက်ပွဲတစ်ရပ် ကျင်းပမည်ဖြစ်ကြောင်း ပြည်ထောင်စုရွေးကောက်ပွဲ ကော်မရှင်က ကြေညာထားသည်။

ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ်များတွင် မဲဆန္ဒရှင် စာရင်းပြုစုခြင်းကို ဧပြီ ၁၉ ရက်မှ စတင်ကာပြုစုခဲ့ပြီး မဲဆန္ဒရှင်ဦးရေမှာ ၉၀၄၆၂၃ ဦးရှိကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ပြောရေးဆိုခွင့်ရှိသူ ဦးမြင့်နိုင်က ပြောကြားသည်။

“အခု ကောက်လို့ရထားတာပေါ့နော်။ ၉၀၄၆၂၃ ဦး။ ပထမတစ်ကြိမ် ကပ်ဦးမယ်လေ။ အဲဒီမှာ ပြင်ကြ၊ ဖြုတ်ကြ လုပ်ဦးမှာပေါ့နော်။ အဲဒီကျရင်တော့ ပြောင်းလဲနိုင်တာပေါ့။ အခုကတော့ အခြေခံပြုစုထားတာ” ဟု ပြည်ထောင်စုရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က ပြောကြားသည်။

အဆိုပါ မဲဆန္ဒရှင်စာရင်းကို ဇူလိုင် ၉ ရက်တွင် အိမ်ထောင်စုအလိုက် ကပ်ထားကြေညာမည်ဖြစ်ပြီး မဲဆန္ဒရှင်ပြည်သူများ အနေဖြင့် လာရောက်ကြည့်ရှုရန်လည်း ရွေးကောက်ပွဲကော်မရှင်အဖွဲ့ဝင် ဦးမြင့်နိုင်က ပြောကြားသည်။

“ဇူလိုင်ဒုတိယအပတ်ထဲဖြစ်မှာပါ။ ဒုတိယအပတ် စစချင်းပေါ့။ ၉ ရက်နေ့ ကပ်မှာပေါ့နော်။ ၁၄ ရက်ကြာမှာပေါ့နော်။ ၉ ရက်နေ့စပြီး လာကြည့်လို့ရပြီ။ အောက်တိုဘာလမှာ နောက်ဆုံးတစ်ကြိမ် ထပ်ကပ်မှာပါ” ဟု ပြည်ထောင်စုရွေးကောက်ပွဲကော်မရှင် အဖွဲ့ဝင် ဦးမြင့်နိုင်က ဆက်လက်ပြောကြားသည်။

လက်ရှိတွင် နိုဝင်ဘာ ၃ ရက်၌ ကျင်းပမည့် ကြားဖြတ်ရွေးကောက်ပွဲနှင့် ပတ်သက်၍ မဲဆန္ဒရှင်စာရင်းပြုစုရာတွင် မတူပီ မဲဆန္ဒနယ်တွင် မဲဆန္ဒရှင် ၁၇၄၈၉ ဦး၊ ကန်ပက်လက် မဲဆန္ဒနယ်တွင် ၁၂၄၇၅ ဦး၊ တမူးမဲဆန္ဒနယ်တွင် ၃၄၈၃၂ ဦးရှိကြောင်း သတင်းရရှိသည်။

“လာရောက်ပြီး ကြည့်ကြပါ။ တစ်အိမ်ထောင်မှာ အနည်းဆုံး တစ်ယောက်တော့ လာကြည့်သင့်တာပေါ့နော်။ နောက် ဆယ်အိမ်မှူးတို့၊ ရာအိမ်မှူးတို့ကလည်း လာကြည့်သင့်တာပေါ့နော်။ ကိုယ့်ကျေးရွာထဲမှာ ပါတယ်၊ မပါတယ် သိတာပေါ့နော်။ လာကြည့်ပြီး ပြင်ဆင်နိုင်တာပေါ့နော်။ နောက်လွှတ်တော်ကိုယ်စားလှယ်လောင်းတွေ၊ နိုင်ငံရေးပါတီတွေ ဒါတွေလည်း လာကြည့်ဖို့ကောင်းတာပေါ့။ ပိုမိုပြည့်စုံမှန်ကန်တဲ့ မဲစာရင်း ဖြစ်သွားမှာပေါ့” ဟု ပြည်ထောင်စုရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က ပြောကြားသည်။

ကြားဖြတ်ရွေးကောက်ပွဲ ကျင်းပမည့် လစ်လပ်ပြည်သူ့လွှတ်တော် မဲဆန္ဒနယ်များမှာ ကန်ပက်လက်၊ လဲချား၊ တာမွေ၊ မြင်းခြံတို့ဖြစ်ပြီး လစ်လပ်အမျိုးသားလွှတ်တော် မဲဆန္ဒနယ်မှာ ကချင်ပြည်နယ် အမျိုးသားလွှတ်တော် မဲဆန္ဒနယ်အမှတ် (၂) (အကျုံးဝင်သောမြို့နယ် မြစ်ကြီးနား) ဖြစ်သည်။

ထို့အတူ လစ်လပ်တိုင်းဒေသကြီး/ပြည်နယ်လွှတ်တော် မဲဆန္ဒနယ်များမှာ မတူပီ၊ တမူး၊ အုတ်တွင်း၊ သပိတ်ကျင်း၊ ရသေ့တောင်၊ မင်းဘူး၊ ဆိပ်ကမ်းနှင့် မန္တလေးတိုင်းဒေသကြီး လွှတ်တော် ရှမ်းတိုင်းရင်းသားလူမျိုး မဲဆန္ဒနယ်တို့ဖြစ်သည်။

တည်ဆဲနိုင်ငံရေးပါတီ ၉၃ ပါတီထံ ကြားဖြတ်ရွေးကောက်ပွဲ ပြုလုပ်မည့် ကြေညာချက် ပေးပို့ထားပြီး မဲဆန္ဒနယ်သုံးနေရာ မဖြစ်မနေ ၀င်ရောက်ယှဉ်ပြိုင်ရမည့် နိုင်ငံရေးပါတီ ခုနစ်ပါတီရှိကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ပြောရေးဆိုခွင့်ရှိသူ ဦးမြင့်နိုင်က ပြောကြားထားသည်။

ကြားဖြတ်ရွေးကောက်ပွဲ ၀င်ယှဉ်ပြိုင်မည့် နိုင်ငံရေးပါတီများ အနေဖြင့် လွှတ်တော်ကိုယ်စားလှယ်လောင်း အမည်စာရင်းကို ဇူလိုင် ၂ ရက်မှ စတင်ကာ တင်သွင်းနိုင်ကြောင်း ပြည်ထောင်စုရွေးကောက်ပွဲကော်မရှင်က ကြေညာထားသည်။

June 27, 2018














Copy Protected by Chetan's WP-Copyprotect.