ရွှေတိဂုံစေတီတော် ဂေါပကရုံးခန်းတွင် ရွှေတိဂုံစေတီတော်နှင့် သိဂုၤတ္တရကုန်းမြေ ရေရှည်တည်တံ့ ခိုင်မြဲရေးအတွက် လုပ်ငန်းညှိနှိုင်း အစည်းအဝေး ပြုလုပ်စဉ်
မော်လမြိုင် ကျိုက်သလ္လံဘုရားကဲ့သို့ မြေပြိုမှုများ မဖြစ်ပွားစေရန် ရွှေတိဂုံစေတီတော် ကြံ့ခိုင်မှုအတွက် စစ်ဆေးခြင်းများ ပြုလုပ်မည်ဖြစ်ကြောင်း ဆောက်လုပ်ရေး ဝန်ကြီးဌာန ဒုတိယဝန်ကြီး ဦးကျော်လင်းက ဇွန် ၂၄ ရက်တွင် ရွှေတိဂုံစေတီတော် ဂေါပကရုံးခန်းတွင် ပြုလုပ်သည့် ရွှေတိဂုံစေတီတော်နှင့် သိဂုၤတ္တရကုန်းမြေ ရေရှည်တည်တံ့ ခိုင်မြဲရေးအတွက် လုပ်ငန်းညှိနှိုင်း အစည်းအဝေးတွင် ပြောကြားသည်။
“ရွှေတိဂုံဘုရား တည်ရှိတဲ့ သိဂုၤတ္တရကုန်းမြေ မြေပြိုမှုမဖြစ်ရန် ရေရှည်တည်တံ့ ခိုင်မြဲရေးအတွက် ဆောက်လုပ်ရေး ဝန်ကြီးဌာနက ပညာရှင်အသီးသီးနဲ့ ညှိနှိုင်းတိုင်ပင်ပြီးတော့ ကြိုတင်ကာကွယ်မှုတွေ ဆောင်ရွက်သွားမှာ ဖြစ်ပါတယ်။ ကျိုက်သလ္လံဘုရားလို ဖြစ်ပြီးမှထက် အများကြီး ထိရောက်မှု ရှိတယ်။ ရွှေတိဂုံဘုရားကြီးရဲ့ Geo Technical Research တွေကို ရွှေတိဂုံဘုရားရဲ့ ထောင့်လေးထောင့်မှာ ပြီးခဲ့တဲ့ နှစ်နှစ်တာ ကာလအတွင်းမှာ soil test လေးတွင်း တူးခဲ့ပါတယ်။ ကောင်းမွန်တဲ့ အနက်က ပေနှစ်ဆယ်ကျော်တာနဲ့ အမာခံမြေတွေ ဖြစ်ပါတယ်။ အပေါ်ပေနှစ်ဆယ်က မြေပျော့တွေ ဖြစ်နေတာ ဖြစ်ပါတယ်” ဟု ဒုဝန်ကြီး ဦးကျော်လင်းက ပြောကြားသည်။
ပြီးခဲ့သည့် ရက်ပိုင်းအတွင်း မော်လမြိုင် ကျိုက်သလ္လံဘုရား မြေပြိုမှုဖြစ်စဉ်နှင့် ပတ်သက်ပြီး သိဂုၤတ္တရကုန်းမြေကို စိတ်ပူလာကြောင်း၊ ဖြစ်ပြီးမှ ဆောင်ရွက်ခြင်းထက် မဖြစ်ခင် ကြိုတင်ကာကွယ်ခြင်းသည် အကောင်းဆုံး ဖြစ်ကြောင်း၊ ထို့ကြောင့် အစည်းအဝေး ပြုလုပ်ရခြင်းဖြစ်ကြောင်း ဒုတိယဝန်ကြီးက ပြောကြားသည်။
အဆိုပါ အစည်းအဝေးသို့ ဆောက်လုပ်ရေး ဝန်ကြီးဌာနမှ တာဝန်ရှိသူများ၊ ရွှေတိဂုံဂေါပကအဖွဲ့မှ တာဝန်ရှိသူများ၊ ဆောက်လုပ်ရေး ပညာရှင်များ၊ ရန်ကုန်မြို့တော် စည်ပင်သာယာရေးကော်မတီမှ တာဝန်ရှိသူများ တက်ရောက်ဆွေးနွေးခဲ့ပြီး အချက်သုံးချက် အတည်ပြုခဲ့ကြောင်း သိရသည်။
ယင်းအချက် သုံးချက်သည် ရွှေတိဂုံစေတီတော် ကိုယ်လုံးတော် ကြံ့ခိုင်ရေး၊ ရင်ပြင်တော်တွင် မြေပြိုမှုများ မဖြစ်စေရန် လိုအပ်သည့် နေရာများတွင် ရေမြောင်းများ ပြုလုပ်ရန်နှင့် ဝတ္တကမြေ ၁၁၄ ဧကအား သန့်ရှင်းသာယာ လှပရေးနှင့် စနစ်တကျရှိရေးတို့ကို ဆောင်ရွက်ရန် အတည်ပြုခဲ့ကြောင်း သိရသည်။
အတည်ပြုခဲ့သည့် ကိစ္စရပ်များအတွက် ကုန်ကျငွေများကို ပြန်လည်တွက်ချက်ပြီး ရန်ကုန်တိုင်းဒေသကြီး အစိုးရအဖွဲ့နှင့် သာသနာရေးနှင့် ယဉ်ကျေးမှုဝန်ကြီးဌာနသို့ တင်ပြသွားမည်ဖြစ်ပြီး ထိုမှတစ်ဆင့် နိုင်ငံတော်သမ္မတရုံးသို့ ဆက်လက်တင်ပြကာ နိုင်ငံတော်သမ္မတရုံးမှ ခွင့်ပြုချက်ရရှိမည် ဆိုပါက ပြုပြင်ခြင်း လုပ်ငန်းများကို ဆောင်ရွက်မည်ဖြစ်ကြောင်း သိရသည်။
ရွှေတိဂုံစေတီတော်ကြီးအား ၁၉၉၉ ခုနှစ်တွင် ရွှေထီးတော်တင်လှူခြင်း လုပ်ငန်းများ ဆောင်ရွက်ခဲ့ကြောင်း၊ ၂၀၀၄-၂၀၀၅ တွင် ဆူနာမီ ဖြစ်ပေါ်ခဲ့သောကြောင့် ရွှေထီးတော်ကြီး ကြံ့ခိုင်မှုစစ်ဆေးခြင်း လုပ်ငန်းကို ဆောင်ရွက်ခဲ့ကြောင်း၊ ၂၀၀၈ မေလတွင် နာဂစ်မုန်တိုင်း တိုက်ခတ်ခဲ့သောကြောင့် ၂၀၀၈-၂၀၀၉ တွင် ရွှေသင်္ကန်းတော် ကပ်လှူရေးနှင့် ထီးတော်ကြံ့ခိုင်မှု စစ်ဆေးရေး လုပ်ငန်းများ ဆောင်ရွက်ခဲ့ကြောင်း၊ စေတီတော်ကြီး၏ သေးသွယ်ဆုံးသော ကြာမှောက်ကြာလှန် ဧရိယာနှင့် ငှက်ပျောဖူးအခြေမှ တတိယ ဖောင်းရစ်အထိ ပြင်ဆင်မှု များပြုလုပ်ခဲ့ကြောင်းသိရသည်။
ရွှေတိဂုံစေတီတော်၏ မဟာရံတံတိုင်းများသည် ၁၉၉၆ မှ ၂၀၀၇ ခုနှစ်အတွင်း ပြိုကျပျက်စီးမှု လေးကြိမ်ရှိခဲ့ကြောင်း ၁၉၉၆-၁၉၉၇ ခုနှစ်တွင် တောင်ဘက်စောင်းတန်းထိပ် အနောက်ဘက်ခြမ်း ပေ ၅၀ ခန့် ပြိုကျခဲ့ကြောင်း၊ ၂၀၀၂-၂၀၀၃ ခုနှစ်တွင် အနောက်ဘက်စောင်းတန်း တောင်ဘက် ပေ ၁၂၀ ခန့် ပြိုကျခဲ့ကြောင်း၊ ၂၀၀၄-၂၀၀၅ ခုနှစ်တွင် အနောက်တောင်ထောင့် ရန်ကုန်ဘိုးဘိုးကြီး အနီးတွင် ပေ ၁၅၀ ခန့် ပြိုကျခဲ့ကြောင်း၊ ၂၀၀၆-၂၀၀၇ ခုနှစ်တွင် ရာဟုထောင့် သစ်ဂိုဒေါင် နောက်ကျော် ပေ ၁၈၀ ခန့် ပြိုကျပျက်စီးမှုများ ရှိခဲ့ကြောင်းလည်း သိရသည်။
