အတွင်းလူနာ ဦးရေ ၄၀ အထိ လက်ခံကုသနိုင်သည့် ဒေါ်ခင်ကြည်ဆေးရုံ၌ အမျိုးသမီးများ ကလေးမွေးဖွားမှုနှင့် ပတ်သက်သော ကျန်းမာရေး ဝန်ဆောင်မှု အမျိုးမျိုးကို လုပ်ဆောင်ပေးနေ

အတွင်းလူနာ ဦးရေ ၄၀ အထိ လက်ခံကုသနိုင်သည့် ဒေါ်ခင်ကြည်ဆေးရုံ၌ အမျိုးသမီးများ ကလေးမွေးဖွားမှုနှင့် ပတ်သက်သော ကျန်းမာရေး ဝန်ဆောင်မှု အမျိုးမျိုးကို လုပ်ဆောင်ပေးနေ
Published 24 June 2018

ဒေါ်ခင်ကြည်ဆေးရုံရှိ ကလေးမီးဖွားခန်းအား တွေ့ရစဉ် (ဓာတ်ပုံ-အိသဉ္ဇာကျော်)

ရန်ကုန်တိုင်းဒေသကြီး ဗဟန်းမြို့နယ် ဗိုလ်ချို(၂)ရပ်ကွက် ဗိုလ်ချုပ်ပြတိုက်လမ်း ဗဟန်းအမျိုးသမီး ဆေးရုံဝင်း အတွင်းရှိ ဒေါ်ခင်ကြည် အမျိုးသမီးဆေးရုံကို အကြီးစား ပြင်ဆင်မွမ်းမံမှုများ ပြုလုပ်ခဲ့ရာ ယင်းဆေးရုံတွင် အမျိုးသမီးများ ကလေးမွေးဖွားမှုနှင့် ပတ်သက်သော ကျန်းမာရေး ဝန်ဆောင်မှု အမျိုးမျိုးကို လုပ်ဆောင်ပေးလျက်ရှိကြောင်း ဒေါ်ခင်ကြည် အမျိုးသမီးဆေးရုံမှ ဆေးရုံအုပ်ကြီး ဒေါက်တာသင်းယုဇော်က ပြောကြားသည်။

ယခင်က အဆိုပါဆေးရုံကို တာဝါလိန်းဆေးရုံ၊ ဗဟန်းအမျိုးသမီး ဆေးရုံအဖြစ် လူသိများပြီး ဆေးရုံ၏ ဖွဲ့စည်းပုံ အနေအထားအရ တစ်ပတ်လျှင် နှစ်ရက်ခန့် ကိုယ်ဝန်ဆောင် မိခင်များအတွက် ကိုယ်ဝန်ဆောင် ကျန်းမာရေး စောင့်ရှောက်မှု လုပ်ငန်းများကို လုပ်ဆောင်ပေးခဲ့ကြောင်း၊ မွေးဖွားမှုတွင် ရိုးရိုးမွေးဖွားမှုသာ လုပ်ဆောင်နိုင်ခဲ့ပြီး ခွဲစိတ်ကုသရန် လိုအပ်သည့် လူနာများကို ဗဟိုအမျိုးသမီး ဆေးရုံကြီးသို့ လွှဲပြောင်းကုသမှု ခံယူစေခဲ့ကြောင်းနှင့် လူနာများကို အပြီးသတ် ကျန်းမာရေးစောင့်ရှောက်မှု လုပ်ဆောင်ပေးနိုင်ခြင်း မရှိသည့်အတွက် ဆေးရုံအပေါ် လူနာများ၏ ယုံကြည်အားကိုးမှု နည်းပါးခဲ့ခြင်းဖြစ်ကြောင်း သိရသည်။

“အရင်က ဆေးရုံမှာက ရိုးရိုးမွေးဖွားမှုပဲ လုပ်နိုင်ခဲ့တယ်။ အခုဆိုရင် အကြီးစားပြင်ဆင်ပြီး အဆင့်မြှင့်တင် ထားတဲ့အတွက် ရိုးရိုးမွေးလူနာ အပါအဝင် လေစုပ်မွေးဖို့လိုတဲ့ လူနာတွေ၊ ခွဲစိတ်မွေးဖွားဖို့လိုတဲ့ လူနာတွေကိုလည်း အပြီးသတ် ကျန်းမာရေးဝန်ဆောင်မှု ပေးနိုင်တော့မှာပါ။ အခုဆိုရင် သားဖွားမီးယပ် ဆရာဝန်တွေအပြင် မေ့ဆေးအထူးကု ဆရာဝန်ပါ ခန့်အပ်ထားပါတယ်။ လိုအပ်တဲ့ စက်ပစ္စည်း ကိရိယာတွေကိုလည်း တပ်ဆင်ထားပြီး ဖြစ်တဲ့အတွက် လူနာတွေကို လုံလောက်တဲ့ ကျန်းမာရေး စောင့်ရှောက်မှုတွေ အချိန်ပြည့် ပေးနိုင်တော့မှာ ဖြစ်ပါတယ်။ အခုက ခုတင် ၄၀ ဆံ့ ဖြစ်တဲ့အတွက် အတွင်းလူနာ ၄၀ ဦးအထိ လက်ခံကုသနိုင်မှာဖြစ်သလို နောက်ပိုင်းကျရင်လည်း လူနာဆောင်တွေဆက်ပြီး တိုးချဲ့ သွားဖို့ အစီအစဉ်တွေလည်း ရှိပါတယ်” ဟု ဆေးရုံအုပ်ကြီး ဒေါက်တာသင်းယုဇော်က ပြောကြားသည်။

ဒေါ်ခင်ကြည် အမျိုးသမီးဆေးရုံသည် ယခင်က မီဝပ်ဂျီကိုဝါ(စ်)ဂျီ ခန်းမအမည်ဖြင့် ၁၉၃၃ ခုနှစ် သြဂုတ် ၂၂ ရက်တွင် အုတ်မြစ်ချတည် ဆောက်ခဲ့ပြီး ၁၉၃၄ ခုနှစ် စက်တင်ဘာ ၁ ရက်တွင် အသုံးပြုခဲ့ကြောင်း၊ ၁၉၄၇ ခုနှစ် စက်တင်ဘာ ၁၅ ရက်တွင် အမျိုးသမီးနှင့် ကလေးများ စောင့်ရှောက်ရေးအဖွဲ့သို့ လွှဲပြောင်းပေးအပ်ခဲ့ပြီး မီဝပ်ဂျီကိုဝါ(စ်)ဂျီ ခန်းမ အမည်ကို တာဝါလိန်း အမျိုးသမီးဆေးရုံဟု အမည်ပြောင်းလဲ၍ သားဖွားဆေးရုံအဖြစ် အသုံးပြုခဲ့ကြောင်း သိရသည်။

ထိုအချိန်က ဒေါ်ခင်ကြည်က ဥက္ကဋ္ဌအဖြစ် တာဝန်ယူပြီး အဖွဲ့ဝင် ၁၃ ဦးဖြင့် ဆေးရုံ၏ လိုအပ်ချက်များကို တာဝန်ယူ စောင့်ရှောက်ခဲ့ရာမှ ၁၉၄၉ ခုနှစ်တွင် လူမှုဝန်ထမ်းဌာနသို့ လွှဲပြောင်းပေးအပ်ခဲ့ပြီး ၁၉၅၃ ခုနှစ်တွင် ကျန်းမာရေး ဝန်ကြီးဌာန လက်အောက်သို့ ထားရှိကာ နိုင်ငံတော်ဘဏ္ဍာဖြင့် တာဝန်ယူ ဆောင်ရွက်ခဲ့သည်။

ဒေါ်ခင်ကြည် လက်ထက်တွင် လူထု၏ အားထားမှု ရရှိခဲ့သော သားဖွားဆေးရုံ ဖြစ်ခဲ့ကြောင်း၊ ယခုအခါ ဆေးရုံပြုပြင်မှု လုပ်ငန်းများ ပြီးစီးပြီ ဖြစ်သည့်အတွက် ဒေါ်ခင်ကြည် အမျိုးသမီးဆေးရုံအဖြစ် ပြန်လည်ဖွင့်လှစ်ကာ ကိုယ်ဝန်ဆောင်နှင့် သားဖွားလူနာများအား ကျန်းမာရေး စောင့်ရှောက်မှုပေးခြင်း၊ ရိုးရိုးမွေးဖွားခြင်း၊ လေစုပ်မွေးဖွားခြင်း၊ ခွဲစိတ်မွေးဖွားခြင်း၊ သားဆက်ခြားခြင်းနှင့် မွေးကင်းစကလေး ပြုစုစောင့်ရှောက်ခြင်း စသည့် ကျန်းမာရေး စောင့်ရှောက်မှုများ ပေးသွားမည် ဖြစ်ကြောင်းနှင့် အဆင့်မြှင့်တင် ပြုပြင်တည်ဆောက်ခြင်းနှင့် ဆေးပစ္စည်း ကိရိယာများ ဖြည့်ဆည်းခြင်းတို့အတွက် အမေရိကန်ဒေါ်လာနှစ်သန်း ကုန်ကျခဲ့ကြောင်း သိရသည်။

 

 

Most Read

Most Recent