ကြားဖြတ်ရွေးကောက်ပွဲတွင် နေရာအားလုံးရွေးချယ်ခံရန် ဆုံးဖြတ်ထားပြီး နေရာတိုင်းအောင်မြင်ရေးအတွက် ညီညီညွတ်ညွတ်ဖြင့် ကြိုးစားဆောင်ရွက်မှသာ ၂၀၂၀ အထွေထွေရွေးကောက်ပွဲ္ပ၌ အောင်မြင်မှုများ ထပ်မံရရှိနိုင်မည်ဖြစ်ကြောင်း NLD ပါတီ ညီလာခံ သဘာပတိ ပြောကြား

ကြားဖြတ်ရွေးကောက်ပွဲတွင် နေရာအားလုံးရွေးချယ်ခံရန် ဆုံးဖြတ်ထားပြီး နေရာတိုင်းအောင်မြင်ရေးအတွက် ညီညီညွတ်ညွတ်ဖြင့် ကြိုးစားဆောင်ရွက်မှသာ ၂၀၂၀ အထွေထွေရွေးကောက်ပွဲ္ပ၌ အောင်မြင်မှုများ ထပ်မံရရှိနိုင်မည်ဖြစ်ကြောင်း NLD ပါတီ ညီလာခံ သဘာပတိ ပြောကြား
Published 24 June 2018

NLD ပါတီ ဒုတိယအကြိမ် နိုင်ငံလုံးဆိုင်ရာညီလာခံတွင် သဘာပတိ ဦးညီပု အဖွင့်အမှာစကားပြောကြားနေစဉ် (ဓာတ်ပုံ-မျိုးမင်းထက်)

ကြားဖြတ်ရွေးကောက်ပွဲတွင် နေရာအားလုံး ရွေးချယ်ခံရန်ဆုံးဖြတ်ထားပြီး နေရာတိုင်းအောင်မြင်ရေးအတွက် ညီညီညွတ်ညွတ် ဖြင့် ကြိုးစားဆောင်ရွက်မှသာ ၂၀၂၀ အထွေ ထွေရွေးကောက်ပွဲ၌ အောင်မြင်မှုများ ထပ်မံ ရရှိနိုင်မည်ဖြစ်ကြောင်း အမျိုးသားဒီမိုကရေစီအဖွဲ့ချုပ် (NLD ) ပါတီ၏ ဒုတိယအကြိမ် နိုင်ငံလုံးဆိုင်ရာညီလာခံ၌ သဘာပတိအဖြစ် ဆောင်ရွက်သည့် ပါတီ၏ ဗဟိုအလုပ်အမှု ဆောင်အဖွဲ့ဝင် ဦးညီပု (ရခိုင်ပြည်နယ်ဝန် ကြီးချုပ်) က ပြောကြားသည်။

ဇွန် ၂၃ ရက်တွင် ရန်ကုန်မြို့ မရမ်းကုန်း မြို့နယ်ရှိ Myanmar Convention Center (MCC) ခန်းမ၌ပြုလုပ်သည့် အမျိုးသား ဒီမိုကရေစီအဖွဲ့ချုပ် ဒုတိယအကြိမ် နိုင်ငံလုံးဆိုင်ရာ ပါတီညီလာခံတွင် သဘာပတိ အဖြစ်ဆောင်ရွက်သည့် ဦးညီပုက မိန့်ခွန်း ပြောရာ၌ အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

“ပါတီတစ်ခု၏ နိုင်ငံလုံးဆိုင်ရာညီလာခံသည် ပါတီ၏အသက်ဖြစ်သလို အဓိကအကျဆုံးလည်းဖြစ်ပါတယ်။ ယခုညီလာခံကျင်းပ နေသည့် ကာလသည် ၂၀၁၅ ခုနှစ် ပါတီစုံ ဒီမိုကရေစီ အထွေထွေရွေးကောက်ပွဲကြီးမှ အဖွဲ့ချုပ်အပေါ် နိုင်ငံ့တာဝန်များကို လွှဲပြောင်း တာဝန်ပေးထားသည်မှာ နှစ်နှစ်ကျော်တာဝန် ထမ်းဆောင်ခဲ့ပြီးသော ကာလလည်းဖြစ်ပါ တယ်။ ကျန်ရှိနေသည့် အစိုးရသက်တမ်းကာလအတွက် ဆက်လက်၍ တာဝန်ကျေကျေ အောင်အောင်မြင်မြင်နှင့် ဆောင်ရွက်သွားကြရဦးမှာလည်းဖြစ်ပါတယ်။ ယခုနှစ် နိုဝင်ဘာလတွင်ကျင်းပမည့် ကြားဖြတ်ရွေးကောက်ပွဲတွင်လည်း လစ်လပ်နေရာအားလုံးကို အရွေးချယ်ခံရန် ဆုံးဖြတ်ထားပြီးဖြစ်ပါတယ်။ နေရာတိုင်းအောင်မြင်ရေးအတွက် အားလုံးညီညီညွတ်ညွတ်ဖြင့် ကြိုးစားဆောင်ရွက်နိုင်ပါမှ ၂၀၂၀ အထွေထွေရွေးကောက်ပွဲကြီးတွင်လည်း အောင်မြင်မှုများ ထပ်မံရရှိနိုင်မှာဖြစ်ပါတယ်”  ဟု ဦးညီပုက ပြောကြားသည်။

အမျိုးသားဒီမိုကရေစီအဖွဲ့ချုပ်ပါတီသည် ၁၉၈၈ ခုနှစ်တွင် တည်ထောင်ခဲ့ပြီး နောက် ပထမအကြိမ် နိုင်ငံလုံးဆိုင်ရာပါတီ ညီလာခံကို ၂၀၁၃ ခုနှစ်တွင် ကျင်းပခဲ့သည်။

“ပါတီတွင်းစည်းလုံးညီညွတ်ရေးနှင့် ပါတီအင်အား တောင့်တင်းခိုင်မာရေးကို ဆောင်ရွက်ရာတွင် မိမိကိုယ်ကိုယ်သုံးသပ်ခြင်း၊ မိမိအဖွဲ့၏ ဆောင်ရွက်ချက်များကို သုံးသပ်ခြင်း၊ အချင်းချင်း အပြန်အလှန်ယုံကြည်လေးစားမှု၊ သဘောထားကြီးမှု၊ သည်းခံခွင့်လွှတ်မှုတို့ နှင့် ဆက်လက်လက်တွဲဆောင်ရွက်ခြင်း၊ အဖွဲ့ချုပ်၏ သမိုင်းအစဉ်အလာ ဂုဏ်သိက္ခာတန်ဖိုးတို့ကို ထိန်းသိမ်းခြင်းနှင့် ပိုမိုမြင့်မားအောင် ဆောင်ရွက်ရွက်ရေးတို့ကို လုပ်ဆောင်ကြရ မှာဖြစ်သလို တစ်ဖက်တွင်လည်း ပါတီ၏ အားသာချက်၊ အားနည်းချက်မျာအပေါ် အ ချင်းချင်း အမြင်မတူ သဘောထားကွဲလွဲမှုများ ဖြစ်ပေါ်လာပါက ပါတီ၏အကျိုး၊ ပြည်သူ့ အကျိုးကို ရှေးရှုဦးထိပ်ပန်ဆင်လျက် ဆောင် ရွက်သွားရမှာဖြစ်ပါတယ်” ဟု ညီလာခံသဘာပတိ ဦးညီပုက ပြောကြားသည်။

အမျိုးသားဒီမိုကရေစီအဖွဲ့ချုပ်သည် နိုင်ငံ့တာဝန်ကို လွှဲပြောင်းတာဝန်ယူဆောင်ရွက်ခဲ့သည့်အချိန်မှစ၍ စိန်ခေါ်မှုများ၊ ဖိအားပေးမှုများ၊ အခက်အခဲများနှင့် ရင်ဆိုင်ဖြေရှင်း ဆောင်ရွက်နေရဆဲဖြစ်ကြောင်း၊ဆက်လက်၍ ကြုံတွေ့လာနိုင်သည့် အခက်အခဲများ၊ စိန်ခေါ်မှုများကို အဖွဲ့ချုပ်ခေါင်းဆောင် ဒေါ်အောင်ဆန်းစုကြည်၏ ဦးဆောင်လမ်းညွှန်မှု၊ မှန်ကန်သော ဆုံးဖြတ်လုပ်ဆောင်ချက်များကို စုပေါင်းအင်အားဖြင့် ဆောင်ရွက်သွားမည်ဆိုပါက အမှန်တကယ်အောင်မြင်မှု ရရှိလာလိမ့်မည်ဟုယုံကြည်ကြောင်း ၎င်းက ဆက်လက်ပြောကြားသည်။

ထို့ပြင် အဖွဲ့ချုပ်၏ဦးဆောင်မှုနှင့် ပါတီ၊ အစိုးရ၊ လွှတ်တော် ကဏ္ဍကြီးသုံးရပ်ကို ဟန်ချက်ညီညီ ပူးပေါင်းဆောင်ရွက်ရေးသည် အလွန်အရေးပါသည့် အချက်ဖြစ်ကြောင်း၊ ၎င်းကဏ္ဍသုံးရပ်ကို ဆောင်ရွက်ရာတွင် အချင်းချင်း အပြန်အလှန် လေးစားယုံကြည်မှုနှင့်  အောင်မြင်အောင် ဆောင်ရွက်နိုင်မှသာလျှင် နိုင်ငံ့အနာဂတ် ပိုမိုတိုးတက်ကောင်းမွန်လာမည်ဖြစ်ကြောင်း၊ ပြည်သူများ၏ မျှော်လင့် ချက်များလည်း ပြည့်ဝလာမည်ဖြစ်ကြောင်း ညီလာခံသဘာပတိ ဦးညီပုက ဆိုသည်။

Most Read

Most Recent