<

နိုင်ငံခြားကုမ္ပဏီများအား အစုရှယ်ယာ ၃၅ ရာခိုင်နှုန်းအထိ ၀ယ်ယူပါဝင်ခွင့်ပြုမည့် မြန်မာနိုင်ငံကုမ္ပဏီများဥပဒေ သြဂုတ် ၁ ရက်တွင် စတင်အာဏာတည်မည်ဖြစ်ကြောင်း နိုင်ငံတော်သမ္မတ ကြေညာ

ပြည်တွင်းပြည်ပ ရင်းနှီးမြှုပ်နှံမှုများ မြင့်တက်စေရန် ရည်ရွယ်ကျင်းပခဲ့သည့် Yangon Investment Forum 2018 အခမ်းအနားကို တွေ့ရစဉ်

ပြည်တွင်းကုမ္ပဏီများ၏ အစုရှယ်ယာများအား နိုင်ငံခြားကုမ္ပဏီများမှ ၃၅ ရာခိုင်နှုန်းအထိ ၀ယ်ယူပါဝင်ခွင့်ပြုမည့် မြန်မာနိုင်ငံ ကုမ္ပဏီများဥပဒေ သြဂုတ် ၁ ရက်တွင် စတင်အာဏာတည်မည်ဖြစ်ကြောင်း သမ္မတ ဦးဝင်းမြင့်က ဇွန်  ၂၁ ရက်တွင် လက်မှတ်ရေးထိုး ထုတ်ပြန်ခဲ့ပြီး ဇွန် ၂၂ ရက်တွင် ကြေညာချက် ထုတ်ပြန်လိုက်သည်။

နိုင်ငံခြားသားပိုင် ရှယ်ယာတစ်ရာခိုင် နှုန်းပါဝင်လျှင်ပင် နိုင်ငံခြားကုမ္ပဏီအဖြစ် သတ်မှတ်ကာ အခွန်အခများကို နိုင်ငံခြားငွေဖြင့် ပေးဆောင်ရခြင်း၊ စီးပွားရေးလုပ်ငန်းများ လုပ်ကိုင်ရာတွင် ကန့်သတ်မှုများစွာရှိခြင်း စသည့်ကန့်သတ်ချက်ကြီးမားသည့် နိုင်ငံခြားရင်းနှီးမြှုပ်နှံမှုများ ပြည်တွင်းကုမ္ပဏီများသို့ ၀င်မလာနိုင်အောင် တားဆီးထားသည့် အချက်ကို လက်ရှိဥပဒေတွင် ရှယ်ယာ ၃၅ ရာခိုင်နှုန်းထက်ကျော်လွန်သည့် ကုမ္ပဏီများကိုသာ နိုင်ငံခြားကုမ္ပဏီအဖြစ် သတ်မှတ်လိုက်သည့်အတွက် ပြည်တွင်းကုမ္ပဏီများအနေနှင့် ရင်းနှီးမြှုပ်နှံမှုကဏ္ဍတွင် မြှုပ်နှံငွေများ ပြည်ပကုမ္ပဏီများမှ ရရှိလာမည်ဖြစ်သည့်အတွက် လုပ်သာကိုင်သာရှိမည့် အခြေအနေဖြစ် ပေါ်လာမည်ဖြစ်၍ ပြည်တွင်းကုမ္ပဏီများက အဆိုပါဥပဒေ အတည်ပြုမည့်အချိန်အား စောင့်မျှော်နေကြသည်။ သို့သော် နိုင်ငံခြား ရင်းနှီးမြှုပ်နှံသူများကို အစုရှယ်ယာ ၃၅ ရာ ခိုင်နှုန်းအထိ ၀ယ်ယူပါဝင်ခွင့်ပေးထားသဖြင့် အစုရှယ်ယာများချုပ်ကိုင်ကာ ဈေးကစားမည့် အခြေအနေ ကြုံတွေ့နိုင်မှုအပေါ် မေးခွန်းထုတ်မှုများလည်း ရှိနေသည်။

“ကျွန်တော်တို့ စီးပွားရေးတိုးတက်ဖို့ဆိုရင် အခွန်စနစ်ကောင်းရမယ်။ ဘဏ်စနစ် ကောင်းရမယ်။ MIC ကတော့ ပိုပြီးတော့ လွယ်ကူလာမယ် ယူဆတယ်။ မှတ်ပုံတင်ရတာကလည်း ပိုလွယ်သွားတယ်။ မှတ်ပုံတင်ရင်လည်း အွန်လိုင်းကပဲ လုပ်ရမယ်လို့ သြဂုတ် ၁ ရက်ကစပြီး ဖြစ်လာလိမ့်မယ်။ အခုဆို စာရွက်စာတမ်းများစွာနဲ့ လုပ်နေရတယ်။ ဒီစာရွက်တစ်ရွက်ရဖို့ အချိန်သိပ်ကုန်တယ်။ တစ်နေရာပြေးလိုက်၊ နောက်တစ်ရက်သွားလိုက်။ တစ်နေရာသွားလိုက်နဲ့ လမ်းတွေမှာလည်းကျပ်၊ ကားတွေကလည်း ကျပ်။ လူတွေက စိတ်တွေကလည်း ရှုပ်ထွေး။ ရောဂါတွေလည်း ၀င်။ အဲဒီလိုမျိုး မဖြစ်ရအောင် လုပ်သာကိုင်သာရှိအောင် လုပ်ပေးရမယ်။ ဒါမှ သူတို့ထုတ်လုပ်တဲ့ကုန်စည်တွေ၊ ၀န်ဆောင်မှုတွေ၊ သူတို့ဆီကနေ အခွန်တွေရမယ်။ ပွင့်ပွင့်လင်းလင်းပြောရရင် နိုင်ငံခြားသားတွေကို ၃၅ ရာခိုင်နှုန်းအထိ ရှယ်ယာဝယ်ယူခွင့်ပေးတယ်ဆိုတာ ပေးသင့်ပေးထိုက်တဲ့ နှုန်းထားပါ။ ဒီထက်တောင် ပေးသင့်ပါ သေးတယ်။ ကျွန်တော်တို့ ပြည်တွင်းလုပ်ငန်းတွေက ဒုံရင်း၊ ဒုံရင်းပါ။ ဒီအတိုင်း လုပ်ရင်းလုပ်ရင်း မတိုးတက်ခဲ့ပါဘူး။ တစ်ဖက်က ဈေးကွက်လက်ဝါးကြီးအုပ်မှာတို့ ဈေးကစားမှာတို့ဆိုတာကို ကျန်တဲ့ဥပဒေတွေနဲ့ ပြန်ထိန်းချုပ်လို့ရပါတယ်” ဟု မူဝါဒဆိုင်ရာ စီးပွားရေး ပညာရှင် ဒေါက်တာအောင်ကိုကိုက ဇွန် ၂၂ ရက်တွင် ပြောကြားသည်။

မြန်မာနိုင်ငံရင်းနှီးမြှုပ်နှံမှု ဥပဒေထုတ်ပြန်ပြီးနောက် မြန်မာနိုင်ငံကုမ္ပဏီများဥပဒေ ထုတ်ပြန်ပါက နိုင်ငံအတွင်း ရင်းနှီးမြှုပ်နှံမှုများပြားလာပြီး စီးပွားရေးတိုးတက်မှုများ ဖြစ်ပေါ်လာမည်ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားထားသည့် မြန်မာနိုင်ငံကုမ္ပဏီများ ဥပဒေတွင် အခန်းပေါင်း ၃၂ ခုနှင့် ပုဒ်မပေါင်း ၄၇၆ ခု ပါဝင်သည်။

အဆိုပါ ဥပဒေအရ ရန်ကုန်စတော့ အိတ်ချိန်းရှိ ကုမ္ပဏီများအပါအ၀င် မြန်မာကုမ္ပဏီအများစုအနေဖြင့် နိုင်ငံခြားသားများထံသို့ အစုရှယ်ယာ ၃၅ ရာခိုင်နှုန်း ရောင်းချနိုင်မည်ဖြစ်သော်လည်း ပြည်တွင်းဘဏ်များမှာမူ မြန်မာနိုင်ငံကုမ္ပဏီများဥပဒေအရ အကျုံးဝင်မည်မဟုတ်ချေ။

“ကုမ္ပဏီဥပဒေက ခွင့်ပြုပေမယ့် ဗဟိုဘဏ်က ခွင့်မပြုရင် မရပါ။ ပြည်တွင်းနိုင်ငံသားကို ရောင်းရင်တောင် ဗဟိုဘဏ်ခွင့်ပြုချက် ယူရပါတယ်” ဟု NLD ပါတီ၏ စီးပွားရေးကော်မတီဝင် ဦးရဲမင်းဦးက ပြောကြားသည်။

မြန်မာနိုင်ငံ ကုမ္ပဏီများဥပဒေ ၂၀၁၇ စတင်အာဏာတည်သည့် ၂၀၁၈ ခုနှစ် သြဂုတ် ၁ ရက်မှစ၍ ကုမ္ပဏီဆိုင်ရာ မှတ်ပုံတင်လုပ်ငန်းများကို အီလက်ထရွန်နစ်မှတ်ပုံတင်စနစ် Myanmar Companies Online (MYCO) ဖြင့် ဆောင်ရွက်သွားမည်ဖြစ်သဖြင့် မြန်မာနိုင်ငံကုမ္ပဏီများ အက်ဥပဒေ ၁၉၁၄ သို့မဟုတ် ၁၉၅၀ ပြည့်နှစ်အထူးကုမ္ပဏီ အက်ဥပဒေတို့နှင့် မှတ်ပုံတင်ထားသော တည်ဆဲကုမ္ပဏီများ၊ အသင်းအဖွဲ့များ၊ အဖွဲ့အစည်းများအားလုံးသည် ၂၀၁၈ ခုနှစ် သြဂုတ် ၁ ရက်မှစ၍ ၂၀၁၉ ခုနှစ် ဇန်န၀ါရီ ၃၁ ရက်အထိ ခြောက်လကာလအတွင်း ကုမ္ပဏီမှတ်ပုံ တင်စနစ်သစ် MYCO တွင် သတ်မှတ်ပုံစံ နည်းလမ်းများအတိုင်း ပြန်လည်မှတ်ပုံတင်ကြပါရန်နှင့် ဤသို့ပြန်လည်မှတ်ပုံတင်ခြင်းအတွက် အခကြေးငွေ ပေးသွင်းရန် မလိုကြောင်း ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုးစီးဌာနက ဇွန် ၂၂ ရက်တွင် ထုတ်ပြန်ထားသည်။

June 22, 2018














Copy Protected by Chetan's WP-Copyprotect.