ပဲခူးတိုင်းဒေသကြီး တောင်ငူမြို့နယ် ကင်းဆိပ်ကျေးရွာအုပ်စု၊ ဘွဲ့နှင်းကုန်းရွာတွင် အသက် ၆၀ အရွယ်ရှိ အမျိုးသားမှ အသက် ၁၁ နှစ်အရွယ် မိန်းကလေးအား သားမယားပြုကျင့်မှု ဇွန် ၁၉ ရက် မွန်းလွဲပိုင်းက ဖြစ်ပွားခဲ့ပြီး သားမယားပြုကျင့်သူအမျိုးသားအား ဖမ်းဆီးထားကြောင်း တောင်ငူမြို့အမှတ်(၂) နယ်မြေရဲစခန်းမှ သိရသည်။
ဖြစ်စဉ်မှာ ဇွန် ၁၉ ရက် မွန်းလွဲ ၁ နာရီ ခန့်က တောင်ငူမြို့နယ် ကင်းဆိပ်ကျေးရွာအုပ်စု၊ ဘွဲ့နှင်းကုန်းရွာနေ ဒေါ်---မှ သမီး ဖြစ်သူ မ---- (၁၁နှစ်) အား ၎င်းတို့နေအိမ် မျက်စောင်းထိုးတွင် နေထိုင်သူ ဦးစိန်ပွား အသက်(၆၀နှစ်) (ဘ) ဦးညွန့်နေအိမ်ခြံအတွင်းရှိ ရေတွင်း၌ အဝတ်သွားလျှော်ခိုင်းခဲ့ကြောင်း သိရသည်။ ထိုသို့ အဝတ်သွားလျှော်ခိုင်းပြီး ခဏအကြာတွင် ဒေါ်---၏အစ်ကိုဖြစ်သူ ဦးခင်မောင်လတ်မှ ဦးစိန်ပွားနေအိမ်သွားရောက်လည်ပတ်ခဲ့ရာ ဦးစိန်ပွား၏ နေအိမ် အိပ်ခန်းအတွင်းရှိ အိပ်ရာထဲ၌ ဦးစိန်ပွားနှင့်အတူ မ-----(၁၁နှစ်)အား တွေ့ရှိခဲ့ရသဖြင့် မ---(၁၁နှစ်) ၏ မိခင်ဖြစ်သူ ဒေါ်---အား ပြန်ပြောပြခဲ့ကြောင်း သိရသည်။ အဆိုပါ အခြေအနေနှင့်ပတ်သက်ပြီး မိခင်ဖြစ်သူ ဒေါ်----မှသမီးဖြစ်သူ မ-----(၁၁ နှစ်) အား ပြန်လည်မေးမြန်းခဲ့ရာ မ----မှ အဝတ်လျှော်နေစဉ် ဦစိန်ပွားက ကုတင်ပေါ်သို့ ဆွဲခေါ်သွားပြီး လက်ကိုချုပ်ကိုင်၊ ပါးစပ်အား စောင်နှင့်ပိတ်ကာ အလိုမတူဘဲ သားမယားပြုကျင့်ခဲ့ခြင်းဖြစ်ကြောင်း သိရသည်။
အဆိုပါဖြစ်စဉ်နှင့်ပတ်သက်ပြီး ဒေါ်-- ၏ တိုင်ကြားချက်အရ သားမယားပြုကျင့်သူ ဦးစိန်ပွားအား တောင်ငူအမှတ်(၂) နယ်မြေရဲ စခန်းမှ (ပ)၅၄၀/၂၀၁၈၊ (အမှုကြီးအမှတ်စဉ် ၆/၂၀၁၈)အရ အမှုဖွင့်ဖမ်းဆီးထားကြောင်း သိရသည်။
