အထူးသတင်းထောက်၊ မှုခင်းသတင်းထောက်များ အမည်ခံပြီး နိုင်ငံတော်လုံခြုံရေး အဖွဲ့အစည်းများသဏ္ဌာန်ဝတ်စုံ ဝတ်ဆင်ကာ ငွေတောင်းခံခြင်း၊ ဥပဒေမဲ့လုပ်ရပ်များ လုပ်ကိုင်ခြင်းကို အရေးယူမည်ဟု ပြည်ထဲရေးဝန်ကြီးဌာနမှ ဇွန် ၁၆ ရက်တွင် ထုတ်ပြန်ထားသည်။

ပြည်ထဲရေးဝန်ကြီးဌာန၏ ထုတ်ပြန်ချက်တွင် ၂၀၁၈ ခုနှစ်၊ ဇန်နဝါရီ ၁၇ ရက်ထုတ် နိုင်ငံပိုင်သတင်းစာများတွင် “နိုင်ငံတော် လုံခြုံရေးအဖွဲ့အစည်းများ၏ အသွင်သဏ္ဌာန်ဖြင့် ယူနီဖောင်းများ ဖန်တီးဝတ်စား ဆင်ယင်ခြင်းမပြုကြရန်နှင့် ဝတ်ဆင်ကြောင်း တွေ့ရှိပါက တရားဥပဒေအရ အရေးယူဆောင်ရွက်သွားမည်ဖြစ်ကြောင်း”  ပြည်ထဲရေးဝန်ကြီးဌာနအနေဖြင့် ကြေညာချက်ထုတ်ပြန်ခဲ့ပြီးဖြစ်ကြောင်း၊ အချို့သော သတင်းထောက်များအနေဖြင့် သတင်းရယူဆောင်ရွက်ရာတွင် ဥပဒေနှင့်မညီသော ပြုလုပ်မှုများကြောင့် လူပုဂ္ဂိုလ်၊ အဖွဲ့အစည်းများမှ ကျေနပ်မှုမရှိသဖြင့် တိုင်းဒေသကြီး/ ပြည်နယ်များအလိုက် တည်ဆဲဥပဒေများအရ အရေး ယူပေးရန် တိုင်ကြားမှု ၁၂ မှုရှိခဲ့ပြီး သတင်းထောက် ၁၅ ဦး၊ မီဒီယာအသင်းဝင် တစ်ဦး၊ စုစုပေါင်း ၁၆ ဦးတို့အား အရေးယူခဲ့ကြောင်း သိရသည်။ အချို့သောသတင်းထောက်များသည် အထူးသတင်းထောက်များ၊ မှုခင်းသတင်းထောက်များ အမည်ခံ၍ လောင်းကစားမှုများ ပြုလုပ်ခြင်း၊ မှုခင်းများတွင် အမှုလိုက်အကျိုးဆောင်အဖြစ် လုပ်ကိုင်ခြင်း၊ ဝင်ရောက်စွက်ဖက်၍ ငွေကြေးတောင်းခံခြင်း၊ အသင်းဝင်အဖြစ် လျှောက်ထားသူများထံမှ ဝင်ကြေးများ ကောက်ခံခြင်း၊ မြေယာကိစ္စများတွင် ပါဝင်ပတ်သက်ခြင်း၊ ဒုစရိုက်လုပ်ငန်းလုပ်ကိုင်နေသူများထံမှ လစဉ်ကြေးများ ရယူခြင်းများ ရှိနေကြောင်းကိုလည်း စိစစ်တွေ့ရှိရကြောင်း၊ မှုခင်းသတင်းထောက်များ အပါအဝင် သတင်းထောက်အသင်းများသည် အသင်းအဖွဲ့များ မှတ်ပုံတင်ခြင်းဆိုင်ရာဥပဒေအရ မှတ်ပုံတင်ထားသော အဖွဲ့အစည်းဖြစ်၍ အသင်းအဖွဲ့များ မှတ်ပုံတင်ခြင်းဆိုင်ရာနည်းဥပဒေ ၄ ပါ ပြဋ္ဌာန်းချက်များကို လိုက်နာရန်ပျက်ကွက်ကြောင်း စစ်ဆေးတွေ့ရှိပါက ယင်းဥပဒေပုဒ်မ ၆(စ) အရ မှတ်ပုံတင်လက်မှတ်လဲလှယ်ခြင်း၊ သက်တမ်းတိုးခြင်းကို ငြင်းပယ်ခြင်းခံရမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ထို့ကြောင့် သတင်းထောက်အသင်းဝင်များအနေဖြင့် နိုင်ငံတော် လုံခြုံရေးအဖွဲ့အစည်းများနှင့် အသွင်သဏ္ဌာန်တူသော ဝတ်စုံများဝတ်ဆင်ခြင်း၊ ဥပဒေမဲ့ ငွေကြေးတောင်း ခံခြင်းနှင့် ဥပဒေမဲ့လုပ်ရပ်များ လုပ်ကိုင်ခြင်းတို့ စိစစ်တွေ့ရှိပါက တည်ဆဲဥပဒေများနှင့်အညီ အရေးယူဆောင်ရွက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

“သတင်းထောက်ကျင့်ဝတ်မှာ သတင်းထောက်ဖြစ်ကြောင်း၊ မည်သူမည်ဝါဖြစ်ကြောင်း ပြောရမယ်လေ၊ ယူနီဖောင်းဝတ်လိုက်မယ်ဆိုရင် ပြည်သူတွေထင်မှာက ယူနီဖောင်းဆိုတာက များသောအားဖြင့်တော့ ပြည်သူဝန်ထမ်း နိုင်ငံဝန်ထမ်းလို့ပဲ ပြည်သူတွေက ထင်မှာကို။ ဒီလိုမျိုးက နိုင်ငံဝန်ထမ်းနဲ့ ဆင်တူယိုးမှားလုပ်မယ်ဆိုရင် ရာဇသတ်ကြီး ဥပဒေပုဒ်မနဲ့ငြိမှာလေ။ ဒီလိုမျိုး ဟန်ဆောင်တာကျတော့ သတင်းထောက်ကျင့်ဝတ်အရလည်း ခွင့်မပြုထားသလို ဥပဒေအရလည်း ခွင့်ပြုထားတာမရှိပါဘူး။ သတင်းထောက်ဆိုတာ ကျင့်ဝတ်အရ ကိုယ့်စီမှာရှိတဲ့သတင်းကို တခြားသူဆီကို ပြန်ပြီးတော့ သတင်းပေးတဲ့ပုံစံမဟုတ်ဘဲ ပြည်သူကိုအစီရင်ခံတဲ့ပုံစံမျိုးဖြစ်ရမယ်။ အဲဒီလိုမျိုးမဟုတ်ရင် သတင်းထောက်ကျင့်ဝတ်ကို ချိုးဖောက်ရာရောက်တယ်။ ခုနလိုမျိုး ယူနီဖောင်းဝတ်ပြီးတော့ နိုင်ငံဝန်ထမ်းအယောင်ဆောင်မယ်ဆိုရင် နိုင်ငံဝန်ထမ်းဥပဒေနဲ့ထပ်ပြီး အရေးယူနိုင်တဲ့ကိစ္စ ရှိတယ်” ဟု မြန်မာနိုင်ငံ သတင်းမီဒီယာကောင်စီမှ အဖွဲ့ဝင် ဦးဇေယျာလှိုင်က ပြောကြားသည်။

အထူးသတင်းထောက်၊ မှုခင်းသတင်းထောက်များနှင့်ပတ်သက်ပြီး ဇွန် ၄ ရက်တွင် မြန်မာနိုင်ငံသတင်းမီဒီယာကောင်စီမှ တာဝန်ရှိသူများမှ မြန်မာနိုင်ငံ မှုခင်းသတင်းထောက်များအသင်း (MCRA) သည် သတင်းမီဒီယာဥပဒေ၊ နည်းဥပဒေ၊ ကျင့်ဝတ်နှင့် စည်းကမ်းများကို လေးစားလိုက်နာခြင်းမရှိသော အသင်းအဖွဲ့ဖြစ်ပြီး ယင်းအဖွဲ့ကို သတင်းထောက်အဖွဲ့ဟု အသိအမှတ်မပြုကြောင်း ရှင်းလင်းခဲ့သည်။ ထိုရှင်းလင်းပွဲနှင့် ပတ်သက်ပြီး သတင်းထုတ်ပြန်ချက်တွင်  ဦးသက်နိုင်ဦး (အယ်ဒီတာချုပ်) 'ရှုထောင့်' မှုခင်းနှင့် သတင်းဂျာနယ်၊ ဥက္ကဋ္ဌ (MCRA) ဗဟိုသည် ၂၀၁၈ မေ၂၂ ရက် နေ့စွဲဖြင့် မြန်မာနိုင်ငံ သတင်းမီဒီယာကောင်စီ ဥက္ကဋ္ဌထံသို့ လိပ်မူပြီး တိုင်ကြားစာပေးပို့ခဲ့ကြောင်း၊ ယင်းစာနှင့် ပတ်သက်ပြီး တိုင်ကြားသူ ဦးသက်နိုင်ဦး အနေဖြင့် မေ ၃၁ ရက်တွင်   မြန်မာနိုင်ငံသတင်းမီဒီယာကောင်စီသို့ လာရောက်ရန် မေ ၂၈ ရက်တွင် စာထုတ်၍ ဆင့်ခေါ်ချိန်းဆိုခဲ့ကြောင်း၊ ဆင့်ခေါ်ချိန်းဆိုခဲ့သည့်နေ့တွင် ဦးသက်နိုင်ဦးအနေဖြင့် ကိုယ်တိုင်လာရောက်ခြင်းမရှိဘဲ ကိုယ်စားလှယ်တစ်ဦးကိုသာ စေလွှတ်ခဲ့ပါသည်။ မြန်မာနိုင်ငံ သတင်းမီဒီယာကောင်စီအနေဖြင့် လူကိုယ်တိုင် လာရောက်ရန် ယင်းကိုယ်စားလှယ်မှ တစ်ဆင့် ထပ်မံဆင့်ခေါ်ခဲ့ရာ ယနေ့ထိလာရောက်ခဲ့ခြင်းမရှိကြောင်း သိရသည်။

ထို့ပြင် ဦးသက်နိုင်ဦး ဥက္ကဋ္ဌအဖြစ် တာဝန်ယူထားသည့် မြန်မာနိုင်ငံမှုခင်းသတင်းထောက်များအသင်း (MCRA) သည် သတင်း မီဒီယာဥပဒေ ၉(ဈ) တွင် ပြဋ္ဌာန်းထားသည့် မြန်မာနိုင်ငံသတင်းမီဒီယာကောင်စီ ကျင့်ဝတ် နှင့် စည်းကမ်းအချက်များဖြစ်သည့် ၈-၁၊ ၂၁-၁၊ ၂၁-၂ တို့ကို လိုက်နာခြင်းမရှိကြောင်း မြန်မာနိုင်ငံ သတင်းမီဒီယာကောင်စီ၏ အငြင်းပွားမှုနှင့် တိုင်ကြားမှုများ ညှိနှိုင်းဖြေရှင်းရေး ကော်မတီက စစ်ဆေးဆုံးဖြတ်ခဲ့ကြောင်း၊ ထို့ကြောင့် ဦးသက်နိုင်ဦးအပါအဝင် ၎င်းဥက္ကဋ္ဌ အဖြစ် တာဝန်ယူထားသည့် မြန်မာနိုင်ငံ မှုခင်းသတင်းထောက်များအသင်း MCRA သည် သတင်းမီဒီယာဥပဒေ၊ နည်းဥပဒေ၊ ကျင့်ဝတ်နှင့် စည်းကမ်းများကို လေးစားလိုက် နာခြင်းမရှိသော အသင်းအဖွဲ့ဖြစ်ကြောင်း သတင်းမီဒီယာ နည်းဥပဒေ ၃၈ (ဆ)၊ ၄၀ တု့ိ အရ မြန်မာနိုင်ငံသတင်းမီဒီယာကောင်စီက သတင်းထုတ်ပြန်ခဲ့သည်။