မြစ်ဆုံဆည် စီမံကိန်း ပြန်လည်စတင်ခြင်းက မြန်မာနိုင်ငံအပေါ် ရင်းနှီးမြှုပ်နှံသူများ၏ ယုံကြည်မှုရရှိစေနိုင်သည်ဟု တရုတ်အစိုးရအာဘော် သတင်းစာ Global Times ၏ ဝက်ဘ်ဆိုက်တွင် ဇွန် ၁၄ ရက်က ဖော်ပြခဲ့သည်။

မြန်မာနိုင်ငံတော်သမ္မတ ဦးဝင်းမြင့်သည် ဇွန် ၁၄ ရက်တွင် ထိုင်းနိုင်ငံသို့ ခရီးစဉ် စတင်ခဲ့ပြီး ယင်းတွင် ကျင်းပမည့် ရှစ်ကြိမ်မြောက် ဧရာဝတီ-ကျောက်ဖယား-မဲခေါင်စီးပွားရေး ပူးပေါင်းဆောင်ရွက်မှု မဟာဗျူဟာဆိုင်ရာ ထိပ်သီးဆွေးနွေးပွဲ (ACMECS) ကို တက်ရောက်မည် ဖြစ်သည်။

အဆိုပါ ထိပ်သီး ဆွေးနွေးပွဲသည် ကမ္ဘောဒီယား၊ လာအို၊ မြန်မာ၊ ထိုင်းနှင့် ဗီယက်နမ်တို့အကြား ဖွံ့ဖြိုးမှု ကွာဟချက် ကျဉ်မြောင်းအောင် ပြုလုပ်ခြင်းအားဖြင့် ဒေသတွင်း စီးပွားရေးခိုင်မာမှုကို တိုးမြှင့်ရန် ရည်ရွယ်သည်။

၂၀၁၅ ခုနှစ်က ခြောက်ကြိမ်မြောက် ACMECS ထိပ်သီးဆွေးနွေးပွဲကို မြန်မာနိုင်ငံ၌ ကျင်းပခဲ့ရာတွင် ထိုစဉ်ကသမ္မတ ဦးသိန်းစိန်က မြန်မာနိုင်ငံ၌ ရင်းနှီးမြှုပ်နှံရန် နိုင်ငံခြားကုမ္ပဏီများကို ဖိတ်ခေါ်ခဲ့သည်။

မြန်မာနိုင်ငံအနေဖြင့် ရင်းနှီးမြှုပ်နှံမှုများအတွက် (အထူးသဖြင့် ရေအားလျှပ်စစ် အခြေခံအဆောက်အအုံကဏ္ဍ၌) ဆွဲဆောင်မှုရှိသော နေရာတစ်ခုဖြစ်အောင် ပြုလုပ်ရန် လိုလားပါက မူဝါဒ အဆက်မပြတ်ရေးနှင့် တစ်သမတ်တည်းဖြစ်ရေးကို ထိန်းသိမ်းမှုအပေါ် ပိုမိုအာရုံစိုက်ရမည် ဖြစ်ကြောင်း Global Times သတင်းစာက ဖော်ပြခဲ့သည်။

မြန်မာနိုင်ငံရှိ အုပ်စုအမျိုးမျိုးက ရေရှည်ရပ်ဆိုင်းထားခဲ့သည့် မြစ်ဆုံစီမံကိန်းနှင့် ပတ်သက်၍ အမြင်အမျိုးမျိုး ရှိကြသော်လည်း ယင်းသည် တရုတ်နှင့် မြန်မာနိုင်ငံတို့ သဘောတူညီ ထားခဲ့သည့် စီးပွားရေးဆိုင်ရာ ပူးပေါင်းဆောင်ရွက်မှု တစ်ရပ်ဖြစ်ကြောင်းနှင့် အပြည့်အစုံ အတည်ပြုပြီးသား စီမံကိန်းကို ရပ်ဆိုင်းလိုက်သည့်အခါ မြန်မာနိုင်ငံအနေဖြင့် အစဉ်အလာကို ဆန့်ကျင်သည့် တစ်စုံတစ်ရာကို ပြုလုပ်ခဲ့ခြင်းဖြစ်ကြောင်း Global Times သတင်းစာက ဖော်ပြသည်။

စီမံကိန်းကို ရေရှည်ရပ်ဆိုင်းလိုက်ခြင်းသည် မြန်မာနိုင်ငံ၏ စီးပွားရေးမူဝါဒနှင့် ပတ်သက်၍ မရေရာမှုအပေါ် စိုးရိမ်ရမှုများအကြား ရင်းနှီးမြှုပ်နှံသူများ၏ ယုံကြည်မှုကို ကျဆင်းအောင် လုပ်ခဲ့သကဲ့သို့ ရှိသည်ဟုလည်း Global Times က ဖော်ပြခဲ့သည်။

စီမံကိန်းနှင့်ပတ်သက်၍ ရှုပ်ထွေးသော ပြည်သူတို့၏ သဘောထား ရှိနေသောကြောင့် ဦးဝင်းမြင့်၏ ခရီးစဉ်မှနေ၍ ထူးခြားသောသတင်းကို မျှော်လင့်ခြင်းသည် လက်တွေ့မကျကြောင်းနှင့် တရုတ်နိုင်ငံအနေဖြင့် ရပ်ဆိုင်းထားသည့် စီမံကိန်းကိစ္စအား မြန်မာနိုင်ငံနှင့် ဆက်လက်ဆွေးနွေးကာ အပြန်အလှန်အကျိုးရှိသည့် ပူးပေါင်းဆောင်ရွက်မှုအပေါ် အခြေခံလျက် စီမံကိန်းပြန်လည် စတင်ရန် လက်တွေ့ကျသော နည်းလမ်းတစ်ရပ်ကို ရှာဖွေရန် ကြိုးပမ်းသွားမည်ဖြစ်ကြောင်း Global Times က ဖော်ပြခဲ့သည်။