၂၀၁၁-၂၀၁၂ ဘဏ္ဍာနှစ်မှ ၂၀၁၇- ၂၀၁၈ ဘဏ္ဍာနှစ်အထိ ယခင်ဘဏ္ဍာနှစ် ခုနစ်ခုတွင် ဖြည့်စွက် ခွင့်ပြုငွေအဖြစ် ကျပ်ဘီလျံ ၁၃၀၀၀ ကျော် တောင်းခံကာ ဘီလျံ ၁၁၀၀၀ ကျော် ပြန်လည်အပ်နှံမှု ဖြစ်ပေါ်ခဲ့ကြောင်း ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီ၏ အစီရင်ခံစာအရ သိရပြီး ၂၀၁၈ ခုနှစ်မှ ၂၀၂၂ ခုနှစ် ငါးနှစ်အတွင်း ဖြည့်စွက် ခွင့်ပြုငွေ တောင်းခံသည့်စနစ်ကို တဖြည်းဖြည်း လျော့နည်းပပျောက်အောင် ဆောင်ရွက်မည် ဖြစ်ကြောင်း ၂၀၁၈ ခုနှစ် ပြည်သူ့ဘဏ္ဍာရေး စီမံခန့်ခွဲမှုစနစ် ပြုပြင်ပြောင်းလဲရေး မဟာဗျုဟာတွင် ဖော်ပြထားမှုအရ သိရသည်။
၂၀၁၁-၂၀၁၂ ဘဏ္ဍာနှစ်မှ ၂၀၁၇- ၂၀၁၈ ဘဏ္ဍာနှစ်အထိ နှစ်အလိုက် နောက်ဆက်တွဲ ဘတ်ဂျက်ခွင့်ပြုငွေ စုစုပေါင်းမှာ ကျပ် ၁၃၀၇၃ ဘီလျံဖြစ်ပြီး ဘတ်ဂျက်ပိုလျှံငွေများ ပြန်လည် အပ်နှံငွေမှာ ကျပ် ၁၄၆၂၃ ဘီလျံဖြစ်ကာ အပ်နှံငွေမှ လွှဲပြောင်းသုံးငွေမှာ ကျပ် ၃၀၂၂ ဘီလျံ ဖြစ်သည့်အတွက် အသားတင် အပ်နှံငွေမှာ ကျပ် ၁၁၆၀၁ ဘီလျံ ဖြစ်ကြောင်း ကော်မတီအစီရင်ခံစာအရ သိရသည်။
သမ္မတဟောင်း ဦးသိန်းစိန်အစိုးရ လက်ထက် ၂၀၁၁-၂၀၁၂ ဘဏ္ဍာနှစ်မှ ၂၀၁၅-၂၀၁၆ ဘဏ္ဍာနှစ်အထိ နောက်ဆက်တွဲ ဘတ်ဂျက်ခွင့်ပြုငွေ စုစုပေါင်း ကျပ် ၉၃၇၁ ဘီလျံ ဖြစ်ပြီး အသားတင် ပြန်လည်အပ်နှံငွေ ကျပ် ၉၉၁၄ ဘီလျံ ဖြစ်ကြောင်း ပြည်သူ့ငွေစာရင်း ပူးပေါင်းကော်မတီ၏ အစီရင်ခံစာအရ သိရသည်။
ထို့ပြင် သမ္မတ ဦးထင်ကျော်အစိုးရ လက်ထက် ၂၀၁၆-၂၀၁၇ ဘဏ္ဍာနှစ်တွင် နောက်ဆက်တွဲ ဘတ်ဂျက် ခွင့်ပြုငွေ ၁၂၈၄ ဘီလျံဖြစ်ပြီး အသားတင် ပြန်လည် အပ်နှံငွေမှာ ကျပ် ၁၆၈၇ ဘီလျံ ဖြစ်ကြောင်း ပြည်သူ့ငွေစာရင်း ပူးပေါင်းကော်မတီက ဆိုသည်။ ၂၀၁၇-၂၀၁၈ ဘဏ္ဍာနှစ်၏ နောက်ဆက်တွဲ ဘတ်ဂျက် ခွင့်ပြုငွေကျပ် ၂၄၁၈ ဘီလျံ ဖြစ်သည်။
ဘတ်ဂျက် ခွင့်ပြုငွေများကို အပြည့်အ၀ သုံးစွဲနိုင်မှု မရှိခြင်းကြောင့် အထွေထွေပိုလျှံ ရန်ပုံငွေသို့ နှစ်စဉ် ကျပ်ဘီလျံ ထောင်ဂဏန်းအထိ ပြန်လည် အပ်နှံလျက်ရှိရာ ဌာနများအနေဖြင့် ဘတ်ဂျက် တိုးမြှင့်ရရှိမှုနှင့် လိုက်လျောညီထွေဖြစ်ရန် အကောင်အထည်ဖော် ဆောင်ရွက်နိုင်မှု မရှိခြင်းကို သေချာစွာ ဆန်းစစ်လေ့လာ သုံးသပ်ရန် လိုအပ်နေပြီဖြစ်ကြောင်း ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီက အကြံပြုထားသည်။
မြန်မာနိုင်ငံတွင် ဘတ်ဂျက်များ တောင်းခံရာ၌ ပိုမိုတင်ပြခြင်း၊ တောင်းခံထားသည့် ဘတ်ဂျက်များအတိုင်း လုပ်ဆောင်နိုင်မှု မရှိခြင်း၊ လုပ်ဆောင်နိုင်မှု မရှိသည့် ဘတ်ဂျက်များကို ခေါင်းစဉ်ပြောင်း သုံးစွဲခြင်းများနှင့် ဆီးသီးဗန်းမှောက် ဘတ်ဂျက်ဟု ပြောဆိုခံရသည့် အကျင့်ပျက် ခြစားမှုများနှင့် ကြုံတွေ့နေရသည်။ လက်ရှိတွင် ပြည်သူ့ဘဏ္ဍာရေးစီမံခန့်ခွဲမှုစနစ် ပြုပြင်ပြောင်းလဲရေး မဟာဗျုဟာ ချမှတ်ဆောင်ရွက်နေပြီး ဘတ်ဂျက်ခွဲေ၀ သုံးစွဲမှု၊ ဘတ်ဂျက်သုံးစွဲမှု ပြုပြင်ပြောင်းလဲရေးများအတွက် ၂၀၁၂ ခုနှစ်မှ လာမည့် ၂၀၂၂ နှစ်အထိ လုပ်ကိုင်ရန် မူဝါဒ ချမှတ်ထားပြီး လက်ရှိတွင် ၂၀၁၂ ခုနှစ်မှ ၂၀၁၇ ခုနှစ်အထိ ပထမအဆင့် ပြုပြင်ပြောင်းလဲရေးကာလ ပြီးဆုံးကာ ၂၀၁၈-၂၀၂၂ အတွက် ဒုတိယငါးနှစ်ကို ဆက်လက် ဆောင်ရွက်မည် ဖြစ်သည်။
