အုတ်တွင်းမြို့နယ်အတွင်း မတ်ပဲများ နုတ်သိမ်းနေသည်ကို ဖေဖော်ဝါရီလအတွင်းက တွေ့ရစဉ်

၂၀၁၈ခုနှစ် ဧပြီနှင့်မေနှစ်လအတွင်း ပြည်ပသို့ ပဲမျိုးစုံတန်ချိန်နှစ်သိန်းတင်ပို့ပြီး ယခင်နှစ်ကာလတူထက် တန်ချိန် ၁ ဒသမ ၅ သိန်း လျော့နည်းနေကြောင်း ပြည်တွင်းဈေးကွက်၌ ဇွန်လမှစတင်ပြီး ပဲဈေးဆက်တိုက် ကျဆင်းနေကြောင်း သိရသည်။

မြန်မာနိုင်ငံအနေဖြင့် ပဲမျိုးစုံပြည်ပသို့ တင်ပို့မှုအနေဖြင့် ၂၀၁၈ ခုနှစ် (ဧပြီနှင့် မေလ) တွင် တန်ချိန်နှစ်သိန်း၊ တန်ဖိုးအားဖြင့် ဒေါ်လာ ၁၂၉ သန်းတင်ပို့နိုင်ခဲ့ပြီး ယခင်နှစ် ကာလတူထက် တန်ချိန်အားဖြင့် ၁ ဒသမ ၅ သိန်း၊ တန်ဖိုး ဒေါ်လာ ၁၃၃ သန်း လျော့နည်း တင်ပို့ခဲ့ကြောင်း စီးပွားရေးနှင့်ကူးသန်းရောင်း ဝယ်ရေးဝန်ကြီးဌာန၏ ထုတ်ပြန်ချက်အရ သိရသည်။

မြန်မာနိုင်ငံမှ ပဲအများဆုံးတင်ပို့သည့် နိုင်ငံများမှာ အိန္ဒိယ၊ တရုတ်၊ ဂျပန်၊ ပါကစ္စတန်၊ စင်ကာပူနှင့် မလေးရှားနိုင်ငံတို့ဖြစ်ပြီး ပဲတင်ပို့မှု၏ ၉၀ ရာခိုင်နှုန်းကျော်မှာ အိန္ဒိယနိုင်ငံဖြစ်ကြောင်း၊အိန္ဒိယနိုင်ငံသည် ကမ္ဘာပေါ်တွင် ပဲအများဆုံးထုတ်လုပ်သည့် နိုင်ငံဖြစ်သကဲ့သို့ ပဲအများဆုံးစားသုံးသည့် နိုင်ငံဖြစ်သဖြင့် ပြည်ပမှ ပဲအများဆုံးတင်သွင်းလျက်ရှိကြောင်း သိရသည်။

အိန္ဒိယနိုင်ငံအနေဖြင့် ၂၀၁၇ ခုနှစ် သြဂုတ်လတွင် ပဲစင်းငုံတင်သွင်းမှု တစ်နှစ်လျှင် တန်ချိန်နှစ်သိန်းနှင့် မတ်ပဲ၊ ပဲတီစိမ်းတင်သွင်းမှုတစ်နှစ်လျှင် တန်ချိန်သုံးသိန်းကန့်သတ်လိုက်ခြင်းကြောင့် ပဲတင်ပို့မှုလျော့နည်း ခြင်းဖြစ်ကြောင်း၊ အိန္ဒိယနိုင်ငံနှင့်  G to G သဘောတူညီချက်ဖြင့် ပဲဆက်လက်တင်ပို့ နိုင်ရေးအတွက် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် ကြိုးပမ်းဆောင်ရွက်ခဲ့မှုများကြောင့် ၂၀၁၈-၂၀၁၉ ဘဏ္ဍာနှစ်အတွက် မတ်ပဲတန်ချိန် ၁ ဒသမ ၅သိန်း၊ ပဲတီစိမ်းတန်ချိန် ၁ ဒသမ ၅ သိန်း တင်သွင်းခွင့်ပြုမည်ဖြစ်သည့်အတွက် ပဲတင်သွင်းမှု ကန့်သတ်ချက်များရှိကြောင်း သိရသည်။

၂၀၁၇-၂၀၁၈ ဘဏ္ဍာနှစ်အတွင်း အိန္ဒိယနိုင်ငံ၏ ပဲတင်သွင်းမှု ကန့်သတ်ခံခဲ့ရခြင်းကြောင့် တင်ပို့မှုပမာဏလျော့နည်းခဲ့ပြီး နိုင်ငံတကာပဲဈေးများ ကျဆင်းမှုကြောင့် တင်ပို့မှုမှရငွေလည်း သိသိသာသာ ကျဆင်းခဲ့သည်။ ၂၀၁၇-၂၀၁၈ ဘဏ္ဍာနှစ်အတွင်း ပြည်ပသို့ ပဲမျိုးစုံတန်ချိန် ၁၃ သိန်းကျော် တင်ပို့ခဲ့ပြီး ဒေါ်လာ ၈၈၃ သန်းကျော်ရရှိခဲ့ကာ ယခင်ဘဏ္ဍာနှစ်နှင့်နှိုင်းယှဉ်ပါက တန်ချိန် တစ်သိန်းကျော်၊ ရငွေဒေါ်လာသန်း ၅၀၀ ကျော် လျော့နည်းခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်သော ကုန်သွယ်ရေးစာရင်းများအရ သိရသည်။ ဘုရင့်နောင်ကုန်စည်ဒိုင်မှရရှိသော စာရင်းများအရ မေ ၄ ရက်တွင်ဖြစ်ပေါ်သော ပဲဈေးနှုန်းများမှာ မတ်ပဲ (FAQ/RC) တစ်တန်လျှင် ကျပ် ၃၈၂၀၀၀၊ မတ်ပဲ (SQ/RC) တစ်တန်လျှင် ကျပ် ၅၂၀၀၀၀၊ ပဲစင်းငုံနီ (RC) တစ်တန်လျှင် ကျပ် ၃၄၀၀၀၀ တို့ဖြစ်ပြီးကြေ ညာချက်ထွက်ပြီး တစ်လဝန်းကျင်အကြာ ဇွန် ၅ ရက်တွင် မတ်ပဲ (FAQ/RC)  တစ်တန်လျှင် ကျပ် ၅၄၃၀၀၀၊ မတ်ပဲ (SQ/RC) တစ်တန်လျှင် ကျပ် ၆၉၃၀၀၀၊ ပဲစင်းငုံနီ (RC) တစ်တန်လျှင် ကျပ် ၅၃၀၀၀၀ အထိ မြင့်တက်ခဲ့သည်။ မေ ၄ ရက်နှင့် ဇွန် ၅ ရက်တွင် ဖြစ်ပေါ်သော ဈေးနှုန်းများကို နှိုင်းယှဉ်ပါက မတ်ပဲ (FAQ/RC)  တစ်တန်လျှင်ကျပ် ၁၆၁၀၀၀၊ မတ်ပဲ (SQ/RC)  တစ်တန်လျှင် ကျပ် ၁၇၃၀၀၀၊ ပဲစင်းငုံနီ (RC) တစ်တန်လျှင် ကျပ် ၁၉၀၀၀၀ မြင့်တက်ခဲ့ခြင်း ဖြစ်သည်။

သို့သော်လည်း ဇွန် ၈ ရက်တွင် မတ်ပဲ (FAQ/RC) တစ်တန်လျှင် ၅၀၉၀၀၀ကျပ် ၊ မတ်ပဲ (SQ/RC)  တစ်တန်လျှင် ၆၆၁၀၀၀ ကျပ်၊ ပဲစင်းငုံနီ (RC) တစ်တန်လျှင် ကျပ် ၅၀၄၀၀၀ ဈေးရှိခဲ့သည်။

ဇွန် ၁၂ ရက်တွင်  မတ်ပဲ (FAQ/RC)  တစ်တန်လျှင် ၄၉၆၉၀၀၀ကျပ် ၊ မတ်ပဲ (SQ/RC) တစ်တန်လျှင် ၆၆၂၀၀၀ ကျပ်အထိ ပဲဈေးဆက်တိုက်ကျဆင်းနေကြောင်း ဘုရင့်နောင်ကုန်စည်ဒိုင်မှ သိရသည်။