ပဲခူးမြို့ ပြည်တွင်းပြည်ပ စက်မှုဇုန်ရှိ Bellmart Myanmar အထည်ချုပ်စက်ရုံ အလုပ်သမား ၄၀၀ ခန့် ဆန္ဒထုတ်ဖော်

ပဲခူးမြို့ ပြည်တွင်းပြည်ပ စက်မှုဇုန်ရှိ Bellmart Myanmar အထည်ချုပ်စက်ရုံ အလုပ်သမား ၄၀၀ ခန့် ဆန္ဒထုတ်ဖော်
Published 13 June 2018

ပဲခူးမြို့ ပြည်တွင်းပြည် ပစက်မှုဇုန် အတွင်းရှိ Bellmart Myanmar အထည်ချုပ်စက်ရုံတွင် အလုပ်သမားများ လုပ်ငန်းခွင် မဝင်ဘဲ စက်ရုံဝင်းအတွင်း ဆန္ဒပြနေစဉ်

ပဲခူးမြို့ ပြည်တွင်းပြည်ပစက်မှုဇုန်ရှိ Bellmart Myanmar အထည်ချုပ်စက်ရုံ၌ ဇွန် ၁၂ ရက်တွင် အလုပ်သမား ၄၀၀ ခန့်က တောင်းဆိုချက် ၁၀ ချက် မရရှိသောကြောင့် လုပ်ငန်းခွင် မဝင်ဘဲ စက်ရုံဝင်းအတွင်း ထိုင်သပိတ် ပြုလုပ်၍ ဆန္ဒထုတ်ဖော်ခဲ့ကြောင်း သိရသည်။

ဖြစ်စဉ်မှာ ပဲခူးမြို့ ပြည်တွင်းပြည်ပ စက်မှုဇုန်အတွင်းရှိ Bellmart Myanmar အထည်ချုပ်စက်ရုံတွင် အလုပ်သမား ၄၃၀ ခန့်ရှိ၍ အလုပ်သမား အခွင့်အရေးများ ဆုံးရှုံးနေသည်ဟုဆိုကာ အလုပ်သမား ၄၀၀ ခန့် ထိုင်သပိတ်ဖြင့် ဇွန် ၁၁ ရက် နံနက်မှစ၍ ဆန္ဒထုတ်ဖော်ခဲ့ကြကြောင်း သိရသည်။

အလုပ်သမားများက (၁) အလုပ်သမားများအား လုပ်သက်ကြေးအဖြစ် တစ်နှစ်လျှင် ကျပ်တစ်သောင်း လစာထုတ်တိုင်း စလစ်ထဲ ထည့်ပေးရန်၊ (၂)အလုပ်သမားများကို အချိန်ပိုခွဲခြား၍ မခိုင်းစေရန်၊ (၃) မြန်မာနိုင်ငံ၏ အလုပ်သမားဥပဒေကို လေးစားလိုက်နာရန်၊ (၄) အလုပ်ရှင်နှင့် အလုပ်သမားများ နှစ်ဦး သဘောတူ ချုပ်ဆိုထားသော အလုပ်ခန့်ထားမှုဆိုင်ရာ သဘောတူညီချက် စာချုပ်ကို အလုပ်ရှင်ဘက်မှ လေးစားလိုက်နာရန်၊ (၅) အခြေခံ လုပ်ခလစာ ကျပ် ၄၈၀၀ သတ်မှတ်ပြီးနောက် ယခင်က ရရှိသော အလုပ်ခန့်ထားမှုဆိုင်ရာ ကျွမ်းကျင်ကြေး ဖြတ်တောက်ထားခြင်းကို ပြန်ပေးရန်၊ (၆) အလုပ်သမား အဖွဲ့အစည်းအား အသိအမှတ်ပြုရန်၊ (၇) လုပ်ငန်းခွင် တည်ငြိမ်မှု၊ အေးချမ်းမှု၊ ကုန်ထုတ်လုပ်မှုကို ထိခိုက်စေသော နေရာရွှေ့ပြောင်းခြင်းအား အလုပ်သမားများကို မပြုလုပ်ရန်၊ (၈) လုံလောက်သော ဆေးဝါးများ လုပ်ငန်းခွင်အတွင်း ထားရှိပေးရန်၊ (၉) Gatepass ဖြင့် ထွက်သော အလုပ်သမားများကို ရက်မှန်ကြေး မဖြတ်တောက်ရန်၊ (၁၀) လုပ်သက်ခွင့် တစ်နှစ်ပြည့်ပြီး ခွင့် ၁၀ ရက် မယူလျှင် ထိုခွင့် ၁၀ ရက်အား တစ်နှစ်ပြည့်သည့်နေ့၌ လုပ်သက်ခွင့်လစာ ချက်ချင်းရှင်းပေးရန် စသည့် ၁၀ ချက်ကို တောင်းဆိုခဲ့သည်။

ထို့နောက် အလုပ်သမားများဘက်မှ ကိုယ်စားလှယ်တစ်ဦး၊ အလုပ်ရှင်ဘက်မှ ကိုယ်စားလှယ်တစ်ဦး၊ ပဲခူးတိုင်းဒေသကြီး အလုပ်သမားရေးရာရုံးမှ တာဝန်ရှိသူများ၊ ပဲခူးမြို့နယ် အထွေထွေအုပ်ချုပ်ရေး အဖွဲ့များနှင့် ဇွန် ၁၁ ရက် မွန်းလွဲ ၁ နာရီမှ ည ၁၀ နာရီအထိ ညှိနှိုင်းဆွေးနွေး ကြသော်လည်း အလုပ်ရှင်ဘက်မှ အချက်ရှစ်ချက်သာ လိုက်လျောပြီး အမှတ်စဉ် (၁)၊ (၂) အချက်ကို လိုက်လျောမှု မရှိသောကြောင့် ယခုကဲ့သို့ ဆက်လက် ဆန္ဒထုတ်ဖော်ရခြင်း ဖြစ်ကြောင်း သိရသည်။

“ကျွန်တော်တို့ အခုတောင်းဆိုနေတာ လုပ်ခလစာအတွက် မဟုတ်ဘူး။ အလုပ်သမား အခွင့်အရေးအတွက် တောင်းဆိုနေတာ။ အခု လုပ်ခလစာ ၄၈၀၀ ကျပ်တော့ပေးပြီး အရင်တုန်းကပေးတဲ့ အခွင့်အရေးတွေကို ပြန်ရုပ်သိမ်းနေတယ်။ ကျွန်တော်တို့ တောင်းဆိုတဲ့ အထဲမှာ တောင်းဆိုမှု အသစ်က နံပါတ် (၁) အချက်ပဲ ရှိတယ်။ ကျန်တာတွေက အရင်က ရနေကျ ပုံမှန်အခွင့်အရေးတွေပါ။ ဒီနှစ်ချက်ကိုတော့ အလုပ်ရှင်ဘက်က မလိုက်လျောဘူး။ ကျွန်တော်တို့ကလည်း ဒီတောင်းဆိုချက် ၁၀ ချက်ရမှ အလုပ်ပုံမှန်ဆင်းမယ်။ မရမချင်း အေးချမ်းစွာနေ့တိုင်း ထိုင်သပိတ် ပြုလုပ်နေမှာပဲ” ဟု ဦးဆောင်သူ အလုပ်သမား ကိုအေးမင်းသန့်က ပြောကြားသည်။

ထို့ပြင် ပဲခူးမြို့ ပြည်တွင်းပြည်ပ စက်မှုဇုန်အတွင်း မေလအတွင်းကလည်း ဖိနပ်စက်ရုံနှစ်ခုတွင် အလုပ်သမားများ ဆန္ဒထုတ်ဖော်ခဲ့ကြပြီး Bellmart Myanmar အထည်ချုပ်စက်ရုံရှိ အလုပ်သမားများ ဆန္ဒထုတ်ဖော်ခြင်းမှာ စက်ရုံသုံးခုမြောက် ဖြစ်ကြောင်း သိရသည်။

 

Most Read

Most Recent