ကြားဖြတ်ရွေးကောက်ပွဲကျင်းပမည့် လစ်လပ်မဲဆန္ဒနယ် ၁၃ နေရာတွင် မဲဆန္ဒရှင်စာရင်းပြုစုရာ၌ မြင်းခြံမဲဆန္ဒနယ်တွင် မပြီးပြတ်သေးကြောင်းနှင့် မဲဆန္ဒရှင်စာရင်းကို ဇူလိုင်လပထမပတ် ကြေညာရန် လျာထား

ကြားဖြတ်ရွေးကောက်ပွဲကျင်းပမည့် လစ်လပ်မဲဆန္ဒနယ် ၁၃ နေရာတွင် မဲဆန္ဒရှင်စာရင်းပြုစုရာ၌ မြင်းခြံမဲဆန္ဒနယ်တွင် မပြီးပြတ်သေးကြောင်းနှင့် မဲဆန္ဒရှင်စာရင်းကို ဇူလိုင်လပထမပတ် ကြေညာရန် လျာထား
Published 11 June 2018

ကြားဖြတ်ရွေးကောက်ပွဲကျင်းပမည့် လစ်လပ်မဲဆန္ဒနယ် ၁၃ နေရာတွင် မဲဆန္ဒရှင်စာရင်းပြုစုရာ၌ မဲဆန္ဒရှင် နှစ်သိန်းကျော်ရှိသည့် မြင်းခြံမဲဆန္ဒနယ်တွင် မပြီးပြတ်သေးကြောင်းနှင့် မဲဆန္ဒရှင်စာရင်းကို ဇူလိုင်လပထမပတ်အတွင်း ကြေညာရန် လျာထားကြောင်း ပြည်ထောင်စု ရွေးကောက်ပွဲကော်မရှင်အဖွဲ့ဝင် ဦးမြင့်နိုင်က The Daily Eleven သတင်းစာကို ပြောကြားသည်။

ပြည်ထောင်စုရွေးကောက်ပွဲ ကော်မရှင်က ၂၀၁၈ ခုနှစ် ကြားဖြတ်ရွေးကောက်ပွဲကို နိုဝင်ဘာ ၃ ရက်၌ လစ်လပ်မဲဆန္ဒနယ် ၁၃ နေရာတွင် ကျင်းပမည်ဖြစ်ကြောင်း ကြေညာထားသည်။

ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ် ၁၃ နေရာ၌ မဲဆန္ဒရှင် စာရင်းပြုစုရာတွင် မဲဆန္ဒနယ် ၁၂ နေရာ ပြီးစီးပြီဖြစ်သော်လည်း မြင်းခြံမဲဆန္ဒနယ်မှာ ကျန်နေသေးကြောင်း၊ ဆက်လက်ပြုစုလျက်ရှိကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ပြောရေးဆိုခွင့်ရှိသူ ဦးမြင့်နိုင်က ပြောကြားသည်။

ကြားဖြတ်ရွေးကောက်ပွဲအတွက် မဲဆန္ဒရှင် စာရင်းပြုစုခြင်းကို ဧပြီ ၁၉ ရက်မှစ၍ ပြုစုခြင်းဖြစ်ကြောင်း သိရသည်။

ကြားဖြတ်ရွေးကောက်ပွဲ ကျင်းပမည့် မဲဆန္ဒနယ် ၁၃ နေရာတွင် မဲဆန္ဒရှင်စာရင်းကို ဇူလိုင်လပထမပတ်အတွင်း ကြေညာရန် လျာထားကြောင်းလည်း ကော်မရှင်အဖွဲ့ဝင် ဦးမြင့်နိုင်က ဆိုသည်။

ပြီးခဲ့သည့် ၂၀၁၅ ခုနှစ် အထွေထွေရွေးကောက်ပွဲတွင် ကန်ပက်လက် မဲဆန္ဒနယ်၌ မဲဆန္ဒရှင်စာရင်းမှာ ၁၁၄၈၄ ဦး၊ လဲချားမဲဆန္ဒနယ်တွင် မဲဆန္ဒရှင်စာရင်းမှ ၃၅၁၆၅ ဦး၊ တာမွေမဲဆန္ဒနယ်တွင် မဲဆန္ဒရှင် ၉၂၉၈၇ ဦး၊ မြင်းခြံမဲဆန္ဒနယ်တွင် ၂၁၁၀၄၃ ဦးရှိကြောင်း သိရသည်။
ထို့ပြင် ကချင်ပြည်နယ်၊ အမျိုးသားလွှတ်တော်မဲဆန္ဒနယ် အမှတ် (၂) ၌ မဲဆန္ဒရှင်စာရင်းမှာ ၁၇၈၅၇၉ ဦးရှိကြောင်း သိရသည်။

ထို့အတူ တမူးမဲဆန္ဒနယ်တွင် မဲဆန္ဒရှင် ၁၆၄၄၅ ဦး၊ အုတ်တွင်းမဲ ဆန္ဒနယ်တွင် ၅၅၂၄၉ ဦး၊ သပိတ်ကျင်း မဲဆန္ဒနယ်တွင် ၄၇၆၃၃ ဦး၊ ရှမ်းတိုင်းရင်းသားလူမျိုး မဲဆန္ဒနယ်တွင် ၃၉၅၉၉ ဦး၊ မင်းဘူးမဲဆန္ဒနယ်တွင် ၆၆၀၂၉ ဦးနှင့် ဆိပ်ကမ်းမဲဆန္ဒနယ်တွင် မဲဆန္ဒရှင် ထောင်ဂဏန်းခန့်ရှိကြောင်း သိရသည်။

ကြားဖြတ်ရွေးကောက်ပွဲကျင်းပမည့် လစ်လပ်ပြည်သူ့လွှတ်တော် မဲဆန္ဒနယ်များမှာ ကန်ပက်လက်၊ လဲချား၊ တာမွေ၊ မြင်းခြံတို့ဖြစ်ပြီး လစ်လပ်အမျိုးသားလွှတ်တော် မဲဆန္ဒနယ်မှာ ကချင်ပြည်နယ် အမျိုးသားလွှတ်တော် မဲဆန္ဒအမှတ် (၂) (အကျုံးဝင်သောမြို့နယ် မြစ်ကြီးနား) ဖြစ်သည်။

ထို့အတူ လစ်လပ်တိုင်းဒေသကြီး၊ ပြည်နယ်လွှတ်တော် မဲဆန္ဒနယ်များမှာ မတူပီ၊ တမူး၊ အုတ်တွင်း၊ သပိတ်ကျင်း၊ ရသေ့တောင်၊ မင်းဘူး၊ ဆိပ်ကမ်းနှင့် မန္တလေးတိုင်းဒေသကြီးလွှတ်တော် ရှမ်းတိုင်းရင်းသားလူမျိုး မဲဆန္ဒနယ်တို့ဖြစ်သည်။

Most Read

Most Recent