ဘင်္ဂါလီမွတ်စလင်များ ပြန်ပို့ရန်အတွက် အိန္ဒိယနှင့် မြန်မာ ဆွေးနွေး

ဘင်္ဂါလီမွတ်စလင်များ ပြန်ပို့ရန်အတွက် အိန္ဒိယနှင့် မြန်မာ ဆွေးနွေး
Published 10 June 2018

ကာကွယ်ရေးနှင့် လုံခြုံရေးဆိုင်ရာ ပူးပေါင်းဆောင်ရွက်မှုအပေါ် အဓိကထားသည့် အပြန်အလှန် ဆက်ဆံရေးကို ပြန်လည်သုံးသပ်ရန် ၁၇ ကြိမ်မြောက် နိုင်ငံခြားရေးရုံး အတိုင်ပင်ခံအစည်းအဝေးကို ဇွန် ၉ ရက်က အိန္ဒိယနှင့် မြန်မာနိုင်ငံတို့က ကျင်းပခဲ့ကြောင်း သိရသည်။

အိမ်နီးချင်းနှစ်နိုင်ငံသည် ရခိုင်ပြည်နယ်ရှိ အခြေအနေရပ်များနှင့် နေရပ်စွန့်ခွာလာခဲ့ကြသော ဘင်္ဂါလီမွတ်စလင်များကို ပြန်ပို့ရေးအတွက် ဆွေးနွေးခဲ့ကြခြင်းဖြစ်သည်။ မြန်မာတပ်မတော်နှင့် အရပ်သားအစိုးရအဖွဲ့တို့က ဇွန် ၈ ရက်တွင် ဘင်္ဂါလီမွတ်စလင် အကျပ်အတည်းအတွက် ပြည်တွင်းစုံစမ်းစစ် ဆေးမှုများပြုလုပ်ရန်ကိစ္စပါသည့် ရှားရှားပါးပါး နိုင်ငံတော်လုံခြုံရေးအစည်းအဝေးကို ပြုလုပ်ခဲ့ကြသည်ဟု သိရသည်။

အိန္ဒိယနှင့် မြန်မာနိုင်ငံတို့ ဆွေးနွေးရာတွင် အိန္ဒိယကိုယ်စားလှယ်အဖွဲ့ကို နိုင်ငံခြားရေးအတွင်းဝန် ဗီဂျေးဂိုခါလီက ဦးဆောင်ပြီး မြန်မာကိုယ်စားလှယ်အဖွဲ့ကို မြန်မာနိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးမြင့်သူက ဦးဆောင်ခဲ့ကြောင်း သိရသည်။

ဆွေးနွေးစဉ်အတွင်း အဆင့်မြင့်အဆင့် လာရောက်မှုများ၊ လုံခြုံရေးနှင့် ကာကွယ်ရေးနှင့်သက်ဆိုင်သော အကြောင်းအရာများ၊ နယ်နိမိတ်ဆိုင်ရာ အကြောင်းအရာများနှင့် နယ်စပ်စီမံခန့်ခွဲမှု၊ ကုန်သွယ်ရေးနှင့် ကူးသန်း ရောင်းဝယ်ရေး၊ ဖွံ့ဖြိုးမှုဆိုင်ရာ ပူးပေါင်းဆောင်ရွက်ရေး၊ ဆက်သွယ်ရေး၊ ယဉ်ကျေးမှုနှင့် သံတမန်ရေးအကြောင်းအရာများ အပါအဝင် အပြန်အလှန်ဆက်ဆံရေး အတိုင်းအတာ အပြည့်အစုံကို ဆွေးနွေးခဲ့ကြသည်။

‘‘သူတို့ဟာ အပြန်အလှန်အကျိုးစီးပွားနဲ့ သက်ဆိုင်နေတဲ့ ဒေသတွင်းကိစ္စတွေနဲ့ ကမ္ဘာ့ရေးရာ ကိစ္စတွေကိုလည်း အမြင်ချင်း ဖလှယ်ခဲ့ကြပါတယ်’’ ဟု အိန္ဒိယအစိုးရ၏ ထုတ်ပြန်ချက်၌ ပြောကြားထားသည်။

အိန္ဒိယ၌ ရှိနေစဉ်အတွင်း မြန်မာ အမြဲတမ်းအတွင်းဝန်သည် အိန္ဒိယမြို့တော်ရှိ သမိုင်းနှင့် ယဉ်ကျေးမှုအရ အရေးပါသည့် နေရာများသို့လည်း သွားရောက်မည်ဖြစ်ကြောင်း ထုတ်ပြန်ချက်၌ ဖော်ပြထားသည်။

အိန္ဒိယနိုင်ငံခြားရေးဝန်ကြီး ဆူရှမာဆာဝါရာသည် လွန်ခဲ့သည့်လက မြန်မာနိုင်ငံသို့ နှစ်ရက်ကြာသွားရောက်ခဲ့ပြီး မြန်မာနိုင်ငံသမ္မတ ဦးဝင်းမြင့်၊ နိုင်ငံတော်၏အတိုင်ပင်ခံ ပုဂ္ဂိုလ်နှင့် နိုင်ငံခြားရေးဝန်ကြီး ဒေါ်အောင်ဆန်းစုကြည်တို့နှင့် တွေ့ဆုံခဲ့သည်။

အိန္ဒိယနိုင်ငံခြားရေးဝန်ကြီးသည် မြန်မာနိုင်ငံ၌ရှိစဉ်အတွင်း နယ်နိမိတ်နှင့် နယ်စပ်ဒေသဆိုင်ရာ အကြောင်းအရာများ၊ ငြိမ်းချမ်းရေးနှင့် လုံခြုံရေးဆိုင်ရာ အကြောင်းအရာများ၊ နေရပ်စွန့်ခွာလာသော ဘင်္ဂါလီမွတ်စလင်များကို ပြန်ပို့ရေးအပါအဝင် ရခိုင်ပြည်နယ်၏ ဖွံ့ဖြိုးမှုအနေအထားတို့အပြင် အိန္ဒိယက မြန်မာနိုင်ငံကို ဖွံ့ဖြိုးမှုဆိုင်ရာ အထောက်အပံ့များပေးရေး၊ ဆောင်ရွက်နေဆဲ စီမံကိန်းများ နှင့် အပြန်အလှန်အကျိုးစီးပွားဆိုင်ရာ အခြားအကြောင်းအရာများကို ဆွေးနွေးခဲ့သည်။

ယခုအစည်းအဝေးသည် ၂၀၁၆ ခုနှစ်တွင် ဒေါ်အောင်ဆန်းစုကြည်၏ အစိုးရအဖွဲ့ အာဏာရလာပြီးနောက်ပိုင်း တတိယအကြိမ်မြောက် ယင်းကဲ့သို့သော ဆွေးနွေးမှုမျိုး ဖြစ်ကြောင်းလည်း သိရသည်။

Most Read

Most Recent