တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် မြန်မာနိုင်ငံဆိုင်ရာ ကက်သလစ်ဂိုဏ်းချုပ် ဆရာတော်ကြီး ကာဒီနယ်ချားလ်ဘိုတို့ တွေ့ဆုံ

တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် မြန်မာနိုင်ငံဆိုင်ရာ ကက်သလစ်ဂိုဏ်းချုပ် ဆရာတော်ကြီး ကာဒီနယ်ချားလ်ဘိုတို့ တွေ့ဆုံ
Published 22 August 2017

သြဂုတ် ၂၁ ရက်က နေပြည်တော်၌ မြန်မာနိုင်ငံဆိုင်ရာ ကက်သလစ်ဂိုဏ်းချုပ် ဆရာတော်ကြီး ကာဒီနယ်ချားလ်ဘိုနှင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့ တွေ့ဆုံစဉ် (ဓာတ်ပုံ-တပ်မတော် ကာကွယ်ရေးဦးစီးချုပ်ရုံး ဖေ့စ်ဘွတ်)

တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် မြန်မာနိုင်ငံဆိုင်ရာ ကက်သလစ်ဂိုဏ်းချုပ် ဆရာတော်ကြီး ကာဒီနယ်ချားလ်ဘိုတို့သည် သာသနာ့နယ်များမှ ကက်သလစ်ဆရာတော် ငါးပါးတို့နှင့်အတူ သြဂုတ် ၂၁ ရက် နံနက်ပိုင်းတွင် နေပြည်တော်ရှိ ဘုရင့်နောင်ရိပ်သာ ဧည့်ခန်းမဆောင်တွင် တွေ့ဆုံခဲ့ကြောင်း တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်သည်။

အဆိုပါ တွေ့ဆုံပွဲတွင် နိုင်ငံရေး၊ ငြိမ်းချမ်းရေးဆိုင်ရာ ကိစ္စရပ်များတွင် အားလုံး ပူးပေါင်းပါဝင် ဆောင်ရွက်ရေး ဆွေးနွေးခဲ့ကြောင်း သိရသည်။

ထိုသို့တွေ့ဆုံရာတွင် ဦးစွာ ဂိုဏ်းချုပ်ဆရာတော်ကြီးက ရွေးကောက်ပွဲပြီးနောက် နိုင်ငံရေး လွှဲပြောင်းမှုများကို အောင်မြင်ချောမွေ့စွာ ဆောင်ရွက်ပေးမှုအတွက် ကျေးဇူးတင်ကြောင်း၊ အကြမ်းဖက်မှုများ၊ စစ်ပွဲများနှင့် ပြည့်နှက်နေသည့် ကမ္ဘာကြီးတွင် ငြိမ်းချမ်းသော နည်းလမ်းဖြင့် အဖြေရှာနိုင်သည်ကို မြန်မာ့တပ်မတော်နှင့် မြန်မာနိုင်ငံက သက်သေပြနိုင်ခဲ့ကြောင်း၊ ပြည်သူလူထု၏ အခွင့်အရေးကို ထိန်းသိမ်းစောင့်ရှောက်ရာတွင် တပ်မတော်၏ အခန်းကဏ္ဍသည် အရေးပါလှကြောင်း၊ တပ်မတော်သည်ပင် ဒီမိုကရေစီလမ်းစဉ်ကို စတင်ဖော်ဆောင်ပြီး လွှတ်တော် အဆင့်ဆင့် အုပ်ချုပ်ပုံယန္တရားကို အသက်ဝင် လှုပ်ရှားစေခဲ့ကြောင်းနှင့် ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံကို ထောက်ခံကြိုဆိုပြီး တပ်မတော် ကာကွယ်ရေးဦးစီးချုပ်ကိုယ်တိုင် တက်ရောက် ပါဝင်ခြင်းက ငြိမ်းချမ်းရေးခရီးလမ်း ဖော်ဆောင်မှုကို ကြီးစွာသော အထောက်အကူ ဖြစ်စေကြောင်း ပြောကြားသည်။

ထို့ပြင် မိမိတို့ ဆရာတော်များအနေဖြင့် အကြမ်းမဖက်သော ငြိမ်းချမ်းရေးလမ်းစဉ်ကို ထောက်ခံပြီး လိုက်ပါလျှောက်လှမ်းရန် တိုက်တွန်းလိုကြောင်း၊ မည်သည့် အဖွဲ့အစည်း၏ နာကြည်းမှုများပင်ဖြစ်စေ ဆွေးနွေးညှိနှိုင်းခြင်းဖြင့် ယုံကြည်မှု တည်ဆောက်ကာ ဖြေရှင်းနိုင်ကြောင်း၊ ဆွေးနွေးညှိနှိုင်းသော စားပွဲဝိုင်းသို့ ပြန်လည်စုရုံးကြရန် တောင်းပန်ဆန္ဒပြုကြောင်း၊ ယခုမျက်မှောက် ရင်ဆိုင်ကြုံတွေ့နေရသော ကိစ္စများတွင် ငြိမ်းချမ်းသော ခံယူချက်နည်းဟန်များနှင့် ဖြေရှင်းနိုင်ရန် အမိနိုင်ငံတော်နှင့်တကွ နိုင်ငံ့ခေါင်းဆောင်များ၊ တပ်မတော်နှင့်တကွ အခြားသော အဖွဲ့အစည်းအားလုံးအတွက် မိမိတို့ ဆုတောင်းမေတ္တာ ပို့သကြောင်းဖြင့် “တွေးတော ဆင်ခြင်တတ်သော၊ အနစ်နာခံ ပေးဆပ်သော လူနည်းစုလေး တစ်စုက တစ်ကမ္ဘာလုံးကို ပြောင်းလဲနိုင်ကြောင်း မည်သည့်အခါမျှ သံသယမရှိခဲ့ပါ” ဟူသည့် ပုပ်ရဟန်းမင်းကြီးဖရန်စစ်၏ စကားလက်ဆောင်ကိုပါ ဂိုဏ်းချုပ်ဆရာတော်ကြီး က ထည့်သွင်းပြောကြားသည်။

ထို့နောက် တပ်မတော် ကာကွယ်ရေးဦးစီးချုပ်က တပ်မတော် ခေါင်းဆောင်များနှင့် ကက်သလစ် ဆရာတော်ကြီးများ ယခုကဲ့သို့ စုံစုံညီညီ တွေ့ဆုံသည်မှာ ပထမအကြိမ်ဖြစ်ကြောင်း၊ မိမိတို့အနေဖြင့် ဗုဒ္ဓဘာသာဝင် ဖြစ်သော်လည်း အခြားဘာသာ၊ သာသနာများနှင့် ပတ်သက်၍ အသိအမှတ်ပြုပါကြောင်း၊ အားပေးပါကြောင်း၊ ဘာသာရေးတွင် တတ်နိုင်သမျှ မကွဲပြားခြင်းက အကောင်းဆုံးဖြစ်ပါကြောင်း၊ ဘာသာတရားအားလုံး၏ တူညီသောအခြေခံမှာ မေတ္တာတရားသာ ဖြစ်ကြောင်း ပြောကြားသည်။

ထို့အတူ ခိုင်မာသည့် ငြိမ်းချမ်းရေး၊ ခိုင်မာသည့် ဒီမိုကရေစီဖြစ်အောင် မိမိတို့ ကြိုးပမ်း လုပ်ဆောင်နေကြောင်း၊ တိုင်းရင်းသား အခွင့်အရေးနှင့် ပတ်သက်၍ ဥပဒေနှင့်အညီသာ လုပ်ဆောင်ကြရမှာဖြစ်ပြီး တိုင်းရင်းသားအစွဲများ မထားဘဲ မြန်မာပြည်တွင် နေထိုင်သူအားလုံး မြန်မာစိတ် မွေးကြရမှာဖြစ်ကြောင်းလည်း ဗိုလ်ချုပ်မှူးကြီး မင်းအောင်လှိုင်က ထည့်သွင်းပြောကြားသည်။

မြန်မာ့နိုင်ငံရေး ပြောင်းလဲမှုနှင့် ပတ်သက်၍ ၂၀၁၁ ခုနှစ်တွင် ပါတီစုံ ဒီမိုကရေစီလမ်းကြောင်းကို စတင်လျှောက်လှမ်းခဲ့ကြောင်း၊ ၁၉၈၈ ခုနှစ်က ပြည်သူလူထု၏ တောင်းဆိုမှုဆန္ဒဖြစ်၍ ဖြစ်မြောက် အောင်မြင်စေရန် တပ်မတော်က ရပ်တည် လုပ်ဆောင်ခဲ့ခြင်း ဖြစ်သောကြောင့် ယင်းလမ်းကြောင်းမှ သွေဖည်စရာ မရှိကြောင်း၊ ငြိမ်းချမ်းရေးနှင့် ပတ်သက်၍ ယခင်ဖြတ်သန်းခဲ့ရသည့် ငြိမ်းချမ်းရေး အတွေ့အကြုံများအရ၊ လက်ရှိ ငြိမ်းချမ်းရေး လုပ်ငန်းစဉ်များ ဆောင်ရွက်ရာတွင် တွေ့ကြုံလာရသည့် အခက်အခဲများအရ တပ်မတော်၏ ငြိမ်းချမ်းရေးမူ ခြောက်ရပ်ကို ချမှတ်လုပ်ဆောင်ခဲ့ကြောင်း၊ တပ်မတော်အနေဖြင့် ငြိမ်းချမ်းရေး ရယူရန် အမှန်တကယ် ဆန္ဒရှိပြီး ငြိမ်းချမ်းရေးမှာ တစ်နိုင်ငံလုံး၊ တစ်မျိုးသားလုံးနှင့် သက်ဆိုင်ပါကြောင်း၊ မိမိတို့အားလုံး စုစုစည်းစည်း ညီညီညွတ်ညွတ်ဖြင့် ပူးပေါင်းဆောင်ရွက်ကြရန် လိုအပ်ကြောင်းနှင့် တိုင်းပြည်ဖွံ့ဖြိုး တိုးတက်ရေးအတွက် အခြေခံမှာ ငြိမ်းချမ်းရေးပင် ဖြစ်ကြောင်း၊ မငြိမ်းချမ်းသည့်အတွက် ဖွံ့ဖြိုးရေးကို အင်တိုက်အားတိုက် မလုပ်ဆောင်နိုင်ကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။

ယင်းအပြင် တိုင်းရင်းသားအရေးနှင့် ပတ်သက်၍လည်း မိမိတို့အနေဖြင့် တိုင်းရင်းသားများကို နံပါတ်တစ် ဦးစားပေး ကာကွယ်ရမှာဖြစ်ကြောင်း၊ ဆက်လက်ပြီး နိုင်ငံသားများကိုလည်း ကာကွယ်ပေးရမည် ဖြစ်ကြောင်း၊ ယခုလက်နက်ကိုင် ပဋိပက္ခများမှာ တိုင်းရင်းသားများကို တိုက်ခိုက်နေခြင်း မဟုတ်ကြောင်း၊ ယခင်ကလည်း ဗကပများကို တိုက်ခိုက်ခဲ့သည့် သာဓကဖြစ်စဉ်များ ရှိကြောင်း၊ ပြည်ထောင်စုအစိုးရ၊ ပြည်နယ်နှင့် တိုင်းဒေသကြီးအစိုးရ၊ ကိုယ်ပိုင်အုပ်ချုပ်ခွင့်ရဒေသ အစိုးရအဖွဲ့များကို ဆန့်ကျင်နေပါက ကာကွယ်တိုက်ခိုက်ရမည် ဖြစ်ကြောင်း၊ ယခုငြိမ်းချမ်းရေး ဆွေးနွေးနေသည့်ကာလတွင် သတ်မှတ်နယ်မြေ ကျော်လွန်ပြီး ပြည်သူလူထု၏ အသက်အိုးအိမ် စည်းစိမ်ကို ထိခိုက်စေခြင်း၊ အုပ်ချုပ်မှုယန္တရားကို ထိပါးနှောင့်ယှက်ခြင်းများကိုသာ တိုက်ခိုက်နေခြင်း ဖြစ်ကြောင်း၊ လက်ရှိ တိုက်ပွဲဖြစ်စဉ်များမှာလည်း ယင်းအချက်အလက်များကို လုပ်ဆောင်လာမှုများကြောင့် ဖြစ်ကြောင်း ဗိုလ်ချုပ်မှူးကြီး မင်းအောင်လှိုင်က ပြောကြားသည်။

တွေ့ဆုံပွဲ၌ တပ်မတော်ကာကွယ်ရေးဦးစီးချုပ်နှင့်အတူ ဒုတိယ တပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီး စိုးဝင်း၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး မြထွန်းဦးနှင့် ကာကွယ်ရေးဦးစီးချုပ်ရုံး (ကြည်း) မှ တပ်မတော်အရာရှိကြီးများ တက်ရောက်ကြပြီး မြန်မာနိုင်ငံဆိုင်ရာ ကက်သလစ်ဂိုဏ်းချုပ် ဆရာတော်ကြီးနှင့်အတူ တောင်ကြီး၊ မော်လမြိုင်၊ လားရှိုး၊ ချင်း စသည့် သာသနာ့နယ်များမှ ကက်သလစ် ဆရာတော်လေးပါး နှင့် တာဝန်ရှိသူများ တက်ရောက်ခဲ့ကြောင်း သိရသည်။