မြစ်ကြီးနားလေဆိပ်တွင် ၂၀၁၇-၂၀၁၈ ဘဏ္ဍာနှစ်၌ ခရီးသည် နှစ်သိန်းခွဲကျော် ဝင်ထွက်အသုံးပြုခဲ့

မြစ်ကြီးနားလေဆိပ်တွင် ၂၀၁၇-၂၀၁၈ ဘဏ္ဍာနှစ်၌ ခရီးသည် နှစ်သိန်းခွဲကျော် ဝင်ထွက်အသုံးပြုခဲ့
Published 8 June 2018

လေဆိပ် အဆောက်အုံသစ် တိုးချဲ့ဖွင့်လှစ်ခဲ့သည့် ကချင်ပြည်နယ် မြစ်ကြီးနားလေဆိပ်တွင်၂၀၁၇-၂၀၁၈ ဘဏ္ဍာနှစ်၌ ခရီးသည် နှစ်သိန်းခွဲကျော် ဝင်ထွက် အသုံးပြုခဲ့ကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန လေကြောင်းပို့ဆောင်ရေး ညွှန်ကြားမှုဦးစီးဌာနမှ သတင်းရရှိသည်။

မြန်မာကျပ်သန်း ၁,၂၀၀ ကျော် အကုန်အကျခံ တည်ဆောက်ခဲ့သည့် မြစ်ကြီးနားလေဆိပ်၌ ခရီးသည် အဆောက်အအုံသစ်အား၂၀၁၆ ခုနှစ် မေ ၁၀ ရက်က စတင်ဖွင့်လှစ် အသုံးပြုခဲ့ခြင်း ဖြစ်သည်။ ထိုအဆောက်အအုံသစ်တွင် အပေါ်ထပ်၊ အောက်ထပ် ပါရှိပြီး ခရီးသည် ၃၀၀ ခန့်ကို တစ်ပြိုင်နက် ဝန်ဆောင်မှုပေးနိုင်မည်ဟု သိရသည်။

မြစ်ကြီးနားလေဆိပ်သို့ ၂၀၁၇ ဧပြီလ မှ ၂၀၁၈ မတ်လကုန်အထိ ခရီးသည်အဝင် ၁၂၄,၇၄၃ ဦး၊ အထွက် ၁၂၈,၁၉၄ ဦး၊ စုစုပေါင်း ခရီးသည်၂၅၂,၉၃၇ ဦး ဝင်ထွက် အသုံးပြုခဲ့ခြင်း ဖြစ်သည်။

မြစ်ကြီးနားလေဆိပ်၌ ကုန်စည်စီးဆင်းမှုများအနေဖြင့် မြစ်ကြီးနားမှတစ်ဆင့် ပူတာအို၊ မန္တလေးမြို့နှင့် ရန်ကုန်မြို့များသို့ ကုန်စည်စီးဆင်းမှုများ အများဆုံး ပြုလုပ်ကြကြောင်း သိရသည်။

မြစ်ကြီးနားလေဆိပ်သည် လေကြောင်းခရီးစဉ် လက်ခံပျံသန်း ဆောင်ရွက်ပေးနိုင်မှုတွင် ၂၀၁၄ ခုနှစ်၌ ပြည်တွင်းလေကြောင်းလိုင်း ခုနစ်လိုင်းသာ ဆင်းသက် အသုံးပြုခဲ့သော်လည်း ၂၀၁၅ ခုနှစ်တွင် ပြည်တွင်းလေကြောင်းလိုင်း ကိုးလိုင်းအထိ တိုးချဲ့ပျံသန်းခဲ့ပြီး ခရီးသည် ဝင်ထွက်မှုတွင်လည်း ၁၆ ဒသမ ၃၆ ရာခိုင်နှုန်း တိုးတက်လာသည့်အတွက် မူလခရီးသည် လေဆိပ်အဆောက်အအုံနှင့် လုံလောက်မှု မရှိတော့သဖြင့် ယခု အသစ်တည်ဆောက်ခဲ့သည့် အလျား ၂၀၀ ပေ၊ အကျယ် ၈၀ ပေရှိ နှစ်ထပ် သံကူကွန်ကရစ် အဆောက်အဦသစ်အား အစိုးရဘတ်ဂျက်ဖြင့် တည်ဆောက်ခဲ့ခြင်း ဖြစ်ကြောင်း သိရသည်။

ကချင်ပြည်နယ် မြို့တော် မြစ်ကြီးနားမြို့၌ တည်ဆောက်ထားသည့် မြစ်ကြီးနား လေယာဉ်ကွင်းသည် ဒုတိယကမ္ဘာစစ်အတွင်းက အမေရိကန်တို့ စတင်တည်ဆောက်ခဲ့သည့် လေယာဉ်ကွင်း တစ်ခုဖြစ်သည်။ မြန်မာနိုင်ငံ လွတ်လပ်ရေး ရရှိပြီးချိန်နောက်ပိုင်းမှ လေကြောင်းပို့ဆောင်ရေး ညွှန်ကြားမှုဦးစီးဌာနမှ ဆက်လက်ပြုပြင်ပြီး F28 ဂျက်လေယာဉ်များ ဆင်းသက်နိုင်အောင် ဆောင်ရွက်ခဲ့ပြီး တိုးချဲ့ပြင်ဆင်မှုများအနေဖြင့် သက်တမ်းကုန်နေသည့် ပြေးလမ်းမျက်နှာပြင်ကို ကျောက်ကတ္တရာ ရေပိတ်လွှာတင်ခြင်း၊ မူလ လေဆိပ်အဆောက်အအုံ (၁၁၇x၄၅) ပေတွင် အရေးကြီးပုဂ္ဂိုလ်ဆောင် တိုးချဲ့တည်ဆောက်ခြင်း၊ မူလလေဆိပ် အဆောက်အဦ အကြီးစားပြုပြင်ခြင်း၊ လေကြောင်းထိန်း မျှော်စင်မြှင့်တင်ခြင်းနှင့် လေဆိပ်ဆိုင်ရာ အခြားဆက်စပ် လုပ်ငန်းများကို ဆောင်ရွက်ခဲ့ကြောင်း သိရသည်။

Most Read

Most Recent