ပုဂ္ဂလိကစက်သုံးဆီ အရောင်းဆိုင်များတွင် သတ်မှတ်အခြင်အတွယ် ပြည့်မီမှုမရှိဟု သံသယရှိပါက ဆိုင်ရှိစံခွက်ဖြင့် အချိန်မရွေး စစ်ဆေးနိုင်ပြီး အခြင်အတွယ် မပြည့်ဝကြောင်း တိုင်ကြားပါက ထိရောက်စွာ အရေးယူသွားမည်

ပုဂ္ဂလိကစက်သုံးဆီ အရောင်းဆိုင်များတွင် သတ်မှတ်အခြင်အတွယ် ပြည့်မီမှုမရှိဟု သံသယရှိပါက ဆိုင်ရှိစံခွက်ဖြင့် အချိန်မရွေး စစ်ဆေးနိုင်ပြီး အခြင်အတွယ် မပြည့်ဝကြောင်း တိုင်ကြားပါက ထိရောက်စွာ အရေးယူသွားမည်
Published 8 June 2018

ရန်ကုန်မြို့ရှိ ပုဂ္ဂလိက စက်သုံးဆီ အရောင်းဆိုင်တစ်ဆိုင်အား တွေ့ရစဉ်

ပုဂ္ဂလိက စက်သုံးဆီ အရောင်းဆိုင်များတွင် သတ်မှတ်အခြင်အတွယ် ပြည့်မီမှုမရှိဟု သံသယရှိပါက ဝယ်ယူသုံးစွဲသူ ပြည်သူလူထု အနေဖြင့် ဆိုင်ရှိစံခွက်ဖြင့် အချိန်မရွေး စစ်ဆေးနိုင်ပြီး အခြင်အတွယ် မပြည့်ဝကြောင်း တိုင်ကြားပါက ထိရောက်စွာ အရေးယူ ဆောင်ရွက်သွားမည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာနက သတင်းထုတ်ပြန်ချက်အရ သိရသည်။

ပုဂ္ဂလိက တင်သွင်းဖြန့်ဖြူး ရောင်းချသည့် ဆက်သုံးဆီများ၏ အရည်အသွေးနှင့် အခြင်အတွယ် မှန်ကန်စေရေးအတွက် လျှပ်စစ်နှင့် စွမ်းအင်ဝန်ကြီးဌာန ရေနံနှင့်ရေနံထွက်ပစ္စည်းဆိုင်ရာ လုပ်ငန်းများ ထိန်းသိမ်းကြီးကြပ်ရေး ကော်မတီနှင့် သက်ဆိုင်ရာ ပြည်ထောင်စုနယ်မြေ၊ နေပြည်တော်နှင့် တိုင်းဒေသကြီး ပြည်နယ်များအလိုက် ဆပ်ကော်မတီများကို ဖွဲ့စည်းပြီး စစ်ဆေးကြပ်မတ် ဆောင်ရွက်လျက်ရှိကြောင်း သိရသည်။

၂၀၁၃ ခုနှစ်မှစ၍ ယနေ့အထိ စစ်ဆေးရေးအဖွဲ့များဖြင့် စစ်ဆေးမှုဆိုင်ပေါင်း ၆၀ ဆိုင်၊ Mobile Fuel Lab ဖြင့် စစ်ဆေးမှုဆိုင်ပေါင်း ၁၉၆ ဆိုင် ဆောင်ရွက်နိုင်ခဲ့ပြီး အရည်အသွေး မှန်ကန်ခြင်းမရှိကြောင်း စစ်ဆေးတွေ့ရှိရသည့် ပုဂ္ဂလိကစက်သုံးဆီ အရောင်းဆိုင် စုစုပေါင်း ၆၆ ဆိုင်အား ဖြန့်ဖြူးရောင်းချခွင့် လိုင်စင်များကို ကာလသတ်မှတ် ကန့်သတ်ပိတ်သိမ်း၍ အရေးယူ ဆောင်ရွက်ခဲ့ကြောင်း သတင်းထုတ်ပြန်ခဲ့သည်။

စက်သုံးဆီ ဝယ်ယူသုံးစွဲသည့် ပြည်သူလူထု အနေဖြင့် စက်သုံးဆီ အခြင်အတွယ် ပြည့်မီမှန်ကန်မှု မရှိဟု သံသယရှိပါက စက်သုံးဆီ အရောင်းဆိုင်များတွင် ထားရှိရသည့် လီတာ ၂၀ စံခွက် သို့မဟုတ် လေးဂါလန်စံခွက်ဖြင့် အချိန်မရွေး စစ်ဆေးနိုင်ကြောင်း ကြေညာ ဆောင်ရွက်ခဲ့သော်လည်း ယခုအချိန်ထိ စက်သုံးဆီ အခြင်အတွယ် မှန်ကန်မှုမရှိကြောင်း စစ်ဆေးတိုင်ကြားသဖြင့် အရေးယူ ဆောင်ရွက်ခဲ့ရသည့်ဖြစ်စဉ် မရှိသေးကြောင်း ထုတ်ပြန်ချက်အရ သိရသည်။

စက်သုံးဆီ ဝယ်ယူသုံးစွဲသူ ပြည်သူလူထုမှ စံခွက်ဖြင့် တိုက်ဆိုင်စစ်ဆေးပြီး တိုင်ကြားသဖြင့် အခြင်အတွယ် မှန်ကန်မှုမရှိကြောင်း စစ်ဆေးတွေ့ရှိပါက ရေနံနှင့်ရေနံထွက်ပစ္စည်းဆိုင်ရာ ဥပဒေနှင့်အညီ ထိရောက်စွာ အရေးယူ ဆောင်ရွက်သွားမည်ဖြစ်ကြောင်း ဇွန် ၇ ရက် လျှပ်စစ်နှင့် စွမ်းအင်ဝန်ကြီးဌာနက သတင်းထုတ်ပြန်ချက်အရ သိရသည်။

ရန်ကုန်တိုင်းဒေသကြီးတွင် လေပြင်းမုန်တိုင်းကြောင့် လျှပ်စစ်ပစ္စည်းများ ပျက်စီးဆုံးရှုံးခဲ့ရပြီး လျှပ်စစ်ပြတ်တောက်ခဲ့၍ ပြည်သူများ ဓာတ်အားပြန်လည်ရရှိရန် ကျပ်သိန်းပေါင်း ၂၇၀၀ ကျော် ကုန်ကျခံပြင်ဆင်ပေးခဲ့ကြောင်း ဇွန် ၇ ရက်က လျှပ်စစ်နှင့် စွမ်းအင်ဝန်ကြီးဌာနကပင် သတင်းထုတ်ပြန်ခဲ့သည်။

ရန်ကုန်တိုင်းဒေသကြီးတွင် မေ ၂၈၊ ၂၉ ရက်က တိုက်ခတ်ခဲ့သည့် လေပြင်းမုန်တိုင်းကြောင့် ရန်ကုန်လျှပ်စစ်ဓာတ်အားပေးရေး ကော်ပိုရေးရှင်း၏ လျှပ်စစ်ဓာတ်အား ဖြန့်ဖြူးရေးလိုင်းများနှင့် ထရန်စဖော်မာများ ပျက်စီးဆုံးရှုံးခဲ့ရပြီး ရန်ကုန်တိုင်းဒေသကြီးအတွင်းရှိ ပြည်သူများ လျှပ်စစ်ပြတ်တောက်မှုများနှင့် ရင်ဆိုင်ခဲ့ရသည်။

ပျက်စီးဆုံးရှုံးမှုများ ပြင်ဆင်ရာတွင် ရန်ကုန်အရှေ့ပိုင်းခရိုင်အတွင်း ၂၂၈၇၂၀၀၀ ကျပ်၊ အနောက်ပိုင်းခရိုင်အတွင်း ၈၉၃၄၅၅၀ ကျပ်၊ တောင်ပိုင်းခရိုင်အတွင်း ၅၀၆၃၀၀၀၀ ကျပ်၊ မြောက်ပိုင်းခရိုင်အတွင်း ၂၆၁၇၀၀၀၀၀ ကျပ် စုစုပေါင်း ၃၄၄၂၃၆၅၅၀ ကျပ် တန်ဖိုးပျက်စီး ဆုံးရှုံးမှုများကို အမြန်ပြင်ဆင်၍ ပြည်သူများသို့ ဓာတ်အား အမြန်ဆုံး ပြန်လည်ဖြန့်ဖြူးပေးနိုင်ရန် ပြင်ဆင်စရိတ် ၂၇၂၉၇၅၅၅၀ ကျပ် အကုန်ကျခံကာ ဆောင်ရွက်ခဲ့ကြောင်း ထုတ်ပြန်ချက်အရ သိရသည်။

တိုင်းဒေသကြီး ပြည်နယ်များအတွင်း လျှပ်စစ်ဓာတ်အား ပြတ်တောက်မှုများ လျော့နည်းကျဆင်းရန်အတွက် ဆောင်ရွက်လျက်ရှိပြီး အများပြည်သူ လျှပ်စစ်ဓာတ်အား သုံးစွဲရာတွင် စိတ်ချမ်းမြေ့စွာ သုံးနိုင်ရန်နှင့် ဝန်ကြီးဌာန၏ ရည်မှန်းချက်ဖြစ်သည့် ဝန်ဆောင်မှု ကောင်းမွန်စွာဖြင့် ဓာတ်အားဖြန့်ဖြူးပေးနိုင်ရန်အတွက် ဓာတ်အားပြတ်တောက်မှု မဖြစ်ပေါ်စေရေး၊ ဖြစ်ပေါ်လာပါက အမြန်ဆုံး ဓာတ်အားပြန်လည်ပေးနိုင်ရေးကို ဆောင်ရွက်သွားမည်ဖြစ်ကြောင်း သိရသည်။

Most Read

Most Recent