ရန်ကုန်တိုင်းဒေသကြီး အစိုးရအဖွဲ့ ပြောင်းလဲလိုက်သည့် YBS ယာဉ်စီးနင်းရန် စောင့်ဆိုင်းနေသူများကို တွေ့ရစဉ်
ရန်ကုန်တိုင်းဒေသကြီး အစိုးရအဖွဲ့က City Bank ၊ သယ်ယူပို့ဆောင်ရေးအများပိုင် ကုမ္ပဏီများနှင့် လယ်ယာမြေပြုပြင်ခြင်း လုပ်ငန်းတို့တွင် ရင်းနှီးမြှုပ်နံှထားသည့် ကျပ် ၁၄၁ ဘီလျံကျော်အား စာရင်းစစ်ချုပ်ရုံး၏ ယခုနှစ် အစီရင်ခံစာတွင် တင်ပြဆွေးနွေးရန်အဆိုကို ဇွန် ၄ ရက်ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေး (၃၉ ရက်မြောက်နေ့)တွင် လွှတ်တော်မှ အတည်ပြုခဲ့ကြောင်း သိရသည်။
ပြီးခဲ့သည့် လွှတ်တော်အစည်းအဝေး (၃၃ ရက်မြောက်နေ့) တွင် လွှတ်တော်ကိုယ်စားလှယ် ဒေါ်စန္ဒာမင်း တင်သွင်းခဲ့သည့် ရန်ကုန်တိုင်းဒေသကြီး ၂၀၁၆-၂၀၁၇ခုနှစ် ဖြည့်စွက်ဘဏ္ဍာရန်ပုံငွေတွင် City Bank ၌ ရန်ကုန်တိုင်းဒေသကြီးအစိုးရအဖွဲ့မှ ရင်းနှီးမြှုပ်နှံငွေ ထည့်ဝင်ခြင်းအတွက် ၆၄ ဘီလျံကို လည်းကောင်း၊ ခရီးသည်တင်မော်တော်ယာဉ် သယ်ယူပို့ဆောင်ရေး အများပိုင်ကုမ္ပဏီများတွင် ထည့်ဝင်ရင်းနှီးမြှုပ်ခြင်းအတွက် ၇၀ ဘီလျံကိုလည်းကောင်း၊ လယ်ယာမြေများ ပြုပြင်ခြင်းလုပ်ငန်းအတွက် ကျပ် ၇၇၄၈ ဒသ မ ၃၀၁ သန်းကိုလည်း ကောင်းလွှတ်တော်မှ ခွင့်ပြုခဲ့ခြင်းအပေါ် ရန်ကုန်တိုင်းဒေသကြီး စာရင်းစစ်ချုပ်ရုံးမှ ယခုလာမည့် ၂၀၁၈ ခုနှစ်၊ တစ်နှစ်ပြည့်အစီရင်ခံစာတွင် တင်ပြဆွေးနွေးပေးရန်အဆိုကို လွှတ်တော်၌ တင်ပြခဲ့ပြီး လွှတ်တော်ကိုယ်စားလှယ်များက ထောက်ခံဆွေးနွေးခဲ့ကြသည်။
“ရန်ကုန်တိုင်းဒေသကြီးအဖွဲ့၏ ရှင်းလင်းတင်ပြချက်များ၊ တိုင်းဒေသကြီးစာရင်းစစ်ချုပ်ရုံး၏ စစ်ဆေးချက်များနဲ့ ပြင်ပစာရင်း စစ်အဖွဲ့၏ စစ်ဆေးချက်အစီရင်ခံပါ အချက်အလက်များ၊ သက်ဆိုင်ရာကုမ္ပဏီများ တင်ပြချက်များကိုစုစည်း၍ တွေ့ရှိချက်များကို တိုင်းဒေသကြီးစာရင်းစစ်ချုပ်ရုံး၏ ၂၀၁၆-၂၀၁၇ ဘဏ္ဍာရေးနှစ် လုပ်ငန်းဆောင်ရွက်မှုများ အစီရင်ခံစာတွင် ထည့်သွင်းတင်ပြပါမယ်” ဟု ရန်ကုန်တိုင်းဒေသကြီး စာရင်းစစ်ချုပ် ဒေါ်ခင်သန်းလှက ပြောကြားသည်။
ရန်ကုန်တိုင်းဒေသကြီး စာရင်းစစ်ချုပ်ရုံးအနေဖြင့် ပြည်ထောင်စုစာရင်းစစ်ချုပ်ရုံး ဥပဒေပုဒ်မ ၂၅ (က) (ဂ)နှင့် (ဇ) နှင့်အညီ စစ်ဆေးရာတွင် ကိုယ်စားလှယ်ဒေါ်စန္ဒာမင်း တင်သွင်းသည့် အဆိုများအနက် စနစ်ကျ စက်မှုလယ်ယာမြေပေါ်ထုတ်ခြင်း လုပ်ငန်းသည် တိုင်းဒေသကြီးအဆင့်ဌာန အဖွဲ့အစည်းများက အဖွဲ့ ဖွဲ့စည်းတာဝန်ပေးအပ်ထားသဖြင့် အပြည့်အစုံစစ်ဆေးနိုင်ကြောင်း၊ အဆိုရှင်တင်သွင်းထားသည့် ကျန်ရှိသောအချက်များသည် ပြည်ထောင်စုစာရင်းစစ်ချုပ်ဥပဒေ ပုဒ်မ၂၅ (ဇ) အရဆောင်ရွက်နိုင်ခြင်း မပြုနိုင်သေမီ အတတ်နိုင်ဆုံးတင်ပြနိုင်ရေးအတွက် ပြင်ပစာရင်းစစ်အဖွဲ့၏ စစ်ဆေးချက်အစီရင်ခံစာနှင့် တိုင်းဒေသကြီးအစိုးရအဖွဲ့မှ စီစဉ်ပေးချက်အရ သက်ဆိုင်ရာကုမ္ပဏီများ တာဝန်ရှိသူများတွေ့ဆုံဆွေးနွေးခဲ့ကြောင်း သိရသည်။
“အခု ၆၄ ဘီလျံနဲ့ ၇၀ ဘီလျံကို ဘာကြောင့် မေးရတာလဲဆိုရင် ဒါတွေက ဘတ်ဂျက်ရန်ပုံငွေထဲက ပေးထားတာ ဘတ်ဂျက်ရန်ငွေဆိုတာ အများပိုင်ပိုက်ဆံတွေ ဖြစ်တယ်။ ဒီအများပြည်သူရဲ့ ပိုက်ဆံတွေဖြစ်တဲ့ လွှတ်တော်ကနေခွင့်ပြုထားတဲ့ ဘတ်ဂျက်ရန်ပုံငွေဖြစ်တဲ့အတွက် စာရင်းစစ်ချုပ်က စစ်ဆေးပိုင်ခွင့်ရှိပါတယ်။ စာရင်းစစ်ရဲ့ ဥပဒေမှာလည်း စစ်ဆေးပိုင်ခွင့်ရှိတယ်ဆိုတာ ဖော်ပြထားပါတယ်” ဟု လွှတ်တော်ကိုယ်စားလှယ် ဒေါ်စန္ဒာမင်းက ပြောကြားသည်။
