သိန်းနီမြို့နယ်တွင် တစ်ရက်အတွင်း ကိုယ်ပိုင်ကားသုံးစီးပေါ်မှ တရားမဝင်သစ်များ ဖမ်းဆီးရမိခဲ့ကြောင်း သစ်တောဦးစီးဌာန၏ ထုတ်ပြန်ချက်အရ သိရသည်။
သိန်းနီမြို့နယ် ရေပူအမြဲတမ်းစစ်ဆေးရေးစခန်းတွင် တာဝန်ကျဌာနဆိုင်ရာ ပူးပေါင်းစစ်ဆေးရေး အဖွဲ့ဝင်များ လားရှိုးမြို့နယ် သစ်တောဦးစီးဌာနမှ တောအုပ်ကြီး ဦးမြင့်မြတ် ဦးဆောင်သော သစ်တောဝန်ထမ်း ငါးဦးပါ အဖွဲ့တို့သည် သြဂုတ် ၁၅ ရက် မွန်းတည့် ၁၂နာရီအချိန်တွင် လားရှိုး- မူဆယ် လမ်းမကြီး မိုင်တိုင်အမှတ်(၁၉၆/ ဝ) နားဆော့ကျေးရွာနေရာတွင် ရှာဖွေစစ်ဆေးမှုများ ဆောင်ရွက်စဉ် မသင်္ကာဖွယ်ရာ ရပ်ထားသော ယာဉ်အမှတ် YGN - --- WINGEROAD (ခဲရောင်) ပေါ်မှ တရားမဝင် ပိတောက်ဓားရွှေ ၁၃ တုံး ဖမ်းဆီးရမိခဲ့သည်။
ထို့ပြင် ယင်းနေ့ နေ့လယ် ၁၂နာရီ ၄၅ မိနစ်ခန့်တွင် လားရှိုး- မူဆယ် လမ်းမကြီး မိုင်တိုင်အမှတ်(၁၉၇/ ဝ) စံလောင်းကျေးရွာ ခန့်မှန်းနေရာတွင် ရှာဖွေစစ်ဆေးမှုများ ဆောင်ရွက်စဉ် မသင်္ကာဖွယ်ရာ ရပ်ထားသော ယာဉ်အမှတ် MDY ----- ODYSSEY (အနက်ရောင်) ပေါ်မှ တရားမဝင် ပိတောက်ဓားရွှေ ၄၃ တုံးအား လည်းကောင်း၊ ညနေ ၄ နာရီခန့်တွင် လားရှိုး- မူဆယ် လမ်းမကြီး မိုင်တိုင်အမှတ်(၁၉၁/ ဝ) ပန်ဖတ်ကျေးရွာ ခန့်မှန်းနေရာတွင် ရှာဖွေစစ်ဆေးမှုများ ဆောင်ရွက်စဉ် ယာဉ်အမှတ် MDY----- FUSO တွဲကား (ဖြူ /ပြာ) ပေါ်မှ တရားမဝင် ပိတောက်သစ် ခုနစ်လုံး၊ ပိတောက်ဓားရွှေ ၇၅ တုံး ဖမ်းဆီးရမိခဲ့ပြီး သစ်များအား ဦးစီးအရာရှိ ရုံးဝင်းအတွင်း သယ်ယူသိမ်းဆည်း၍ ဆက်စပ် ပတ်သက်သူများအား စုံစမ်းဖော်ထုတ်၍ ပပက ၆ (၁) ဖြင့် အရေးယူပေးနိုင်ရန် အမှုဖွင့် ဆောင်ရွက်လျက်ရှိကြောင်း သိရသည်။
