ရန်ကုန်မြို့သစ်စီမံကိန်းတွင် အခြေခံ အဆောက်အအုံများ ဆောက်လုပ်ခြင်း ရင်းနှီးမြှုပ်နှံရာမှ ပြန်ရမည့် အမြတ်အစွန်း (IRR) ၁၂ ရာခိုင်နှုန်း မျှော်မှန်းထားပြီး အဆိုပါ အမြတ်အစွန်းပမာဏကို လက်ခံနိုင်မည့် ပြည်တွင်းပြည်ပ ရင်းနှီးမြှုပ်နှံမှုများကို ရှာဖွေနေ ကြောင်း NYDC ၏ CEO ဦးသိမ်းဝေက ပြောကြားသည်။
“စီးပွားရေးနယ်ပယ်သစ်ဈေးကွက် (Frontier Markets) တွေဟာ စီးပွားရေး တိုးတက်နှုန်းမြန်ပေမယ့် သက်တမ်းနုနယ်ပြီး ငွေပေါ်မလွယ်တဲ့၊ ငွေကြေးကျပ်တည်းတဲ့ အခြေအနေတွေ ရှိကြပါတယ်။ ဒီဈေးကွက်တွေဟာ ရာနှုန်းပြည့်ဖွံ့ဖြိုးတဲ့ အခြေအနေကို မရောက်ရှိသေးပေမယ့် တိုးတက်မှုလျင်မြန်တဲ့အတွက် ရင်းနှီးမြှုပ်နှံသူတွေကို ဆွဲဆောင်နိုင်မှု အပြည့်ရှိပါတယ်။ ဒါပေမဲ့ ဒီနိုင်ငံတွေရဲ့ စီးပွားရေးနဲ့ နိုင်ငံရေးအခြေအနေ မတည်ငြိမ်မှုတွေကလည်း ရင်နှီးမြှုပ်နှံသူတွေအတွက် စွန့်စားမှုတစ်ရပ်လို ဖြစ်လာပါတယ်။ ဒါကြောင့် ဒီလိုဈေးကွက်တွေမှာ ရင်းနှီးမြှုပ်နှံသူတွေဟာ စွန့်စားမှုများလေလေ အမြတ်အစွန်း များလေလေဆိုတဲ့မူကို လက်မှာစွဲကိုင်ထားပြီး ပြန်ရမယ့် အမြတ်အစွန်းကို ရာခိုင်နှုန်း ၂၀ နဲ့အထက် ရှိဖို့မျှော်မှန်းကြပါတယ်။
ကျွန်တော်တို့မှာ လိုအပ်နေတဲ့ အခြေခံ အဆောက်အအုံတွေဆောက်ဖို့ လုံလောက်တဲ့ ဘဏ္ဍာငွေမရှိပေမယ့်လည်း ချေးငွေယူ တည်ဆောက်ပြီး ကျွန်တော်တို့ရဲ့ သားသမီး မြေးမြစ်တွေကို အကြွေးပြန်ဆပ်ရမယ့် တာဝန်ကြီး လွှဲပြောင်းပေးဖို့လည်း အစီအစဉ် လည်းမရှိပါဘူး။ ဒါကြောင့်မို့ ဒီမြို့သစ်ကို တည်ဆောက်တဲ့နေရာမှာ ရင်းနှီးမြှုပ်နှံမယ့် သူတွေကို ဆွဲဆောင်နိုင်ပြီး မျှတတဲ့ အမြတ်အစွန်းပြန်ရမယ့် ရေရှည်ရှယ်ယာတန်ဖိုး ရင်းနှီးမြှုပ်နှံသူ (long-term equity investor) တွေနဲ့ တည်ဆောက်ဖို့ ရွေးချယ်ခဲ့ပါတယ်။” ဟု ဦးသိမ်းဝေက ဆိုသည်။
ရန်ကုန်မြို့သစ်စီမံကိန်း တည်ဆောက်ရာတွင် NYDC အနေဖြင့် လိုအပ်နေသည့် အခြေခံအဆောက်အအုံများကို သားသမီး မြေးမြစ်အစဉ်အဆက် အကြွေးပြန်ဆပ်ရမည့် တာဝန်ကြီးမှ ရှောင်နိုင်ရန် အကြွေးမယူဘဲ ဆောက်လုပ်မည်ဖြစ်သည်။ ထိုသို့ ဆောက်လုပ်ဖို့ရန် Public-Private Partnership တစ်ခုတည်ထောင်ပြီး ကမ္ဘာတစ်ဝန်းမှာရှိသည့် ရှယ်ယာတန်ဖိုး ရင်းနှီးမြှုပ်နှံသူများ (Equity Investors) ကို ဆွဲဆောင်နိုင်အောင် ပြုလုပ်သွားမည်ဟု ဦးသိမ်းဝေက ဆိုသည်။
ရှယ်ယာတန်ဖိုး ရင်းနှီးမြှုပ်နှံသူများ (Equity Investors) နှင့် ချေးငွေပေးသူများ (Lenders) အကြား ခြားနားချက်မှာ ချေးငွေ ပေးသူများမှာ တာဝန်ယူစရာမလိုဘဲ အတိုးရသည့်အပြင် အချိန်တစ်ခုရောက်ပါက အရင်းကိုလည်း ပြန်ရမည်ဖြစ်ပြီး ရှယ်ယာတန်ဖိုး ရင်းနှီးမြှုပ်နှံသူများအနေနှင့် ယင်းတို့၏ ရင်း နှီးမြှုပ်နှံမှုကို စွန့်စားမှုအပြည့်ယူရပြီး ရင်းနှီး မြှုပ်နှံမှု အောင်မြင်ပါက အမြတ်များသလို မအောင်မြင်ပါကလည်း အရင်းပါဆုံးပါးနိုင်မည်ဖြစ်သည်။
“ကျွန်တော်တို့မြန်မာနိုင်ငံဟာ ရင်းနှီးမြှုပ်နှံမှုပြုလုပ်ရာမှာ အန္တရာယ်များတဲ့ နိုင်ငံ ဆိုတာ ငြင်းလို့မရပါဘူး။ အခု ကျွန်တော်တို့ NYDC မှ မြို့သစ်စီမံကိန်းရဲ့အခြေခံအဆောက်အအုံများကို ရှယ်ယာတန်ဖိုး ရင်းနှီး မြှုပ်နှံသူများ (Equity Investors) နဲ့ ဆောက် လုပ်ဖို့စီစဉ်ထားတဲ့ အစီအမံဟာဆိုရင် မဟာဗျုဟာကျသလို လက်တွေ့လည်းကျပါတယ်။ကျွန်တော်တို့ရဲ့ သားသမီးမြေးမြစ်တွေဟာ အကြွေးပြန်ဆပ်ရမယ့်တာဝန်ကြီးကို ပခုံးထမ်းနေစရာမလိုဘဲ ဒီစီမံကိန်းကရရှိလာမယ့် အသီးအပွင့်တွေကို ဒီစီမံကိန်းကြီးမှာ ယုံကြည်မှုဖြင့် ရင်းနှီးမြှုပ်နှံသူများနဲ့အတူ မျှေ၀ စံစားနိုင်ကြမှာ ဖြစ်ပါတယ်။
အခြေခံအဆောက်အအုံတွေ ဆောက်လုပ်ခြင်းကို ရင်းနှီးမြှုပ်နှံရာကနေ ပြန်ရမယ့် အမြတ်အစွန်း (IRR) ၁၂ ရာခိုင်နှုန်းဆိုတာ ဖြစ်နိုင်ချေရှိတဲ့၊ လုပ်နိုင်တဲ့ ပမာဏလို့ ကျွန်တော်တို့က ယုံကြည်ပါတယ်။ NYDC ရဲ့ အဓိက လုပ်ဆောင်ရမယ့် တာဝန်ကတော့ မြို့သစ်ရဲ့ ဖွံ့ဖြိုးတိုးတက်ရေးကဏ္ဍပေါင်းစုံအတွက် ပြည်တွင်း၊ပြည်ပက ရင်းနှီးမြှုပ်နှံသူတွေကို ဒီအမြတ်အစွန်းပမာဏကို လက်ခံနိုင်ဖို့ နဲ့ ရှယ်ယာတန်ဖိုးရင်းနှီးမြှုပ်နှံမှု (Equity Investments) တွေကို ရေရှည်လုပ်ဆောင်နိုင်ဖို့ ဆွေးနွေးညှိနှိုင်းရမှာ ဖြစ်ပါတယ်။ ဒီနေရာမှာ ထပ်ပြီးပြောချင်တာကတော့ ကျွန်တော်တို့ရဲ့ အဓိက ရည်မှန်းချက်သည် အလုပ်အကိုင် အခွင့်အလမ်းသစ် ဖော်ထုတ်ရေးဘဲ ဖြစ်ပါတယ်။ ဒါမှလည်း ပြည်သူတွေရဲ့ လူနေမှုဘ၀ တိုးတက်မြင့်မားလာမှာ ဖြစ်ပါတယ်။ ဒီပန်းတိုင်ကို ရောက်ရှိဖို့ လျှပ်စစ်မီး၊ ရေသန့်၊ သွား ရေးလာရေးလွယ်ကူဖို့နဲ့ မြန်ဆန်တဲ့ဆက်သွယ်ရေးစနစ် စတဲ့အခြေခံအဆောက်အအုံတွေ မရှိမဖြစ် လိုအပ်ပါတယ်။ ဒါမှလည်း စက်မှုစီမံကိန်းတွေ၊ ကုန်ထုတ်လုပ်ရေးလုပ်ငန်းတွေ လာရောက်တည်ထောင်နိုင်ပြီး အလုပ်အကိုင်များ ရရှိနိုင်မှာ ဖြစ်ပါတယ်။ကျွန်တော်တို့ ပထမအဆင့်အနေနဲ့ မြို့သစ်မှာ လိုအပ်နေတဲ့ ဒီအခြေခံအဆောက်အအုံတွေကို ရင်းနှီးမြှုပ်နှံမယ့်သူတွေ ရရှိအောင် အရင် ရှာဖွေနေပါတယ်။ ဒီအဆင့်ပြီးသွားရင်တော့ အလုပ်အကိုင်ဖန်တီးပေးနိုင်မယ့် လုပ်ငန်းတွေ လာရောက်ထူထောင်အောင် ဆွဲဆောင် ဖို့လိုပါတယ်။ ဒါမှလည်း အများပြည်သူများရဲ့ လူနေမှုဘဝများ တိုးတက်မြင့်မားရေးဆိုတဲ့ ကျွန်တော်တို့ရဲ့ ဦးတည်ချက် အကောင်အထည် ပေါ်လာမှာ ဖြစ်ပါတယ်” ဟု ဦးသိမ်းဝေက ပြောကြားသည်။
