ရန်ကုန်တိုင်းဒေသကြီး မင်္ဂလာဒုံမြို့နယ်ရှိ စက်မှုဇုန်တစ်နေရာကို တွေ့ရစဉ် (ဓာတ်ပုံ-စည်သူအောင်)
၂၀၁၈ ခုနှစ် ဧပြီမှ စက်တင်ဘာလအထိ ကြားကာလ ခြောက်လအတွင်း ရင်းနှီးမြှုပ်နှံမှုများ ခွင့်ပြုပေးလျက်ရှိရာတွင် ဧပြီနှင့် မေ နှစ်လအတွင်း နိုင်ငံသားရင်းနှီးမြှုပ်နှံမှု လုပ်ငန်း ၃၄ ခုမှ ရင်းနှီးမြှုပ်နှံမှုနှင့် ရင်းနှီးမြှုပ်နှံမှု တိုးမြှင့်ခြင်းအပါအဝင် စုစုပေါင်းရင်းနှီးမြှုပ်နှံမှု ပမာဏ ဒေါ်လာ ၁၁၉ သန်း အပါအဝင် ကျပ် ၆၆၇ ဘီလျံကျော်အထိ ခွင့်ပြုပေးထားကြောင်း မြန်မာနိုင်ငံရင်းနှီးမြှုပ်နှံမှုကော်မတီမှ သိရသည်။
မြန်မာနိုင်ငံရင်းနှီးမြှုပ်နှံမှုကော်မရှင် အစည်းအဝေးအမှတ်စဉ် (၇/၂၀၁၈) အရ မြန်မာနိုင်ငံသား ရင်းနှီးမြှုပ်နှံမှုလုပ်ငန်း ၁၀ ခုကို အတည်ပြုခဲ့သည်။ အဆိုပါလုပ်ငန်းများအနက် ရန်ကုန်တိုင်းဒေသကြီးရင်းနှီးမြှုပ်နှံမှုကော်မတီက အတည်ပြုပေးခဲ့သည့် လုပ်ငန်း ငါးခုနှင့် ကရင်ပြည်နယ် ရင်းနှီးမြှုပ်နှံမှုကော်မတီက အတည်ပြုပေးခဲ့သည့် လုပ်ငန်းတစ်ခု နှင့် မန္တလေးတိုင်းဒေသကြီး ရင်းနှီးမြှုပ်နှံမှု ကော်မတီမှ အတည်ပြုသည့်လုပ်ငန်းလေးခုရှိသဖြင့် စုစုပေါင်းလုပ်ငန်း ၁၀ ခုကို ရင်းနှီးမြှုပ်နှံမှုပမာဏ ဒေါ်လာ ၄ ဒသမ ၈၅၉ သန်း အပါအဝင် ကျပ် ၂၂၉၉၃ ဒသမ ၉၀၂ သန်း အတည်ပြုပေးခဲ့သည်။
အဆိုပါလုပ်ငန်းများမှ ပြည်တွင်းလုပ်သားများအတွက် အလုပ်အကိုင်အခွင့်အလမ်းပေါင်း ၁၄၆၄ ခုကို ဖန်တီးပေးမည်ဖြစ်ကြောင်း နှင့် အတည်ပြုလုပ်ငန်း ၁၀ ခုမှာ ဟိုတယ် ကဏ္ဍတစ်ခုနှင့် စက်မှုကဏ္ဍကိုးခုတို့ဖြစ်ကြောင်း မြန်မာနိုင်ငံရင်းနှီးမြှုပ်နှံမှု ကော်မရှင်မှ ထုတ် ပြန်ထားသည်။
၂၀၁၈ ခုနှစ် ဧပြီမှ စက်တင်ဘာလ ခြောက်လအတွင်း မေလအထိ မြန်မာနိုင်ငံသား ရင်းနှီးမြှုပ်နှံမှု ခွင့်ပြုပေးခဲ့မှုမှာ မြန်မာနိုင်ငံသားရင်းနှီးမြှုပ်နှံမှုလုပ်ငန်း ၃၄ ခု၊ ဒေါ်လာ ၁၁၈ ဒသမ ၃၂၈ သန်းအပါအဝင် ကျပ် ၆၅၈၇၇၉ ဒသမ ၅၉၉ သန်းဖြစ်ကြောင်း၊ ရင်း နှီးမြှုပ်နှံမှုတိုးမြှင့်ခြင်းအပါအဝင် စုစုပေါင်း ရင်းနှီးမြှုပ်နှံမှုပမာဏ ဒေါ်လာ ၁၁၉ ဒသမ ၄၇၆ သန်း အပါအဝင် ကျပ် ၆၆၇၈၇၀ ဒသမ ၅၉၉ သန်း ခွင့်ပြုပြီးဖြစ်ကြောင်း ထုတ်ပြန်ထားသည်။
၁၉၉၄-၁၉၉၅ ဘဏ္ဍာနှစ်မှ ၂၀၁၇- ၂၀၁၈ ဘဏ္ဍာနှစ်ကုန်အထိ ရန်ကုန်တိုင်းဒေသကြီးအတွင်း မြန်မာနိုင်ငံသားရင်းနှီးမြှုပ်နှံမှုပမာဏ ကျပ် ၆၉၉၀ ဘီလျံကျော်ရှိ ပြီး အခြားကဏ္ဍ၊ အိမ်ခြံမြေကဏ္ဍနှင့် ပို့ဆောင် ဆက်သွယ်ရေးကဏ္ဍတို့တွင် အများဆုံးမြှုပ်နှံထားကြောင်း ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာနမှ ဒုတိယညွှန်ကြားရေးမှူးချုပ် ဒေါက်တာမာလာမျိုးညွန့်က ပြောကြားသည်။
ရန်ကုန်တိုင်းဒေသကြီးအတွင်း ဝင်ရောက်ထားသည့် မြန်မာနိုင်ငံသားရင်းနှီးမြှုပ်နှံမှု အခြေအနေကို လေ့လာကြည့်ပါက စုစုပေါင်းရင်းနှီးမြှုပ်နှံမှု၏ ၂၇ ဒသမ ၃၁ ရာ ခိုင်နှုန်း၊ အိမ်ခြံမြေကဏ္ဍတွင် စုစုပေါင်း၏ ၂၆ ဒသမ ၇၁ ရာခိုင်နှုန်း၊ ပို့ဆောင်ဆက်သွယ်ရေးကဏ္ဍတွင် ၂၅ ဒသမ ၁၅ ရာခိုင်နှုန်းအထိ ဝင်ရောက်ထားသည်။
