၂၀၁၇ ခုနှစ် ကြားဖြတ်ရွေးကောက်ပွဲတွင် လှိုင်မြို့နယ်ရှိ မဲရုံတစ်ရုံတွင် မဲပေးနေမှုအား တွေ့ရစဉ်

ကြားဖြတ်ရွေးကောက်ပွဲအားအများ ယုံကြည်လက်ခံသော ရွေးကောက်ပွဲဖြစ်ရန်  ကျင်းပပေးမည်ဖြစ်ကြောင်း ပြည်ထောင်စု ရွေးကောက်ပွဲကော်မရှင်ဥက္ကဋ္ဌ ဦးလှသိန်းက ကတိပြုပြောကြားသည်။

ပြည်ထောင်စုရွေးကောက်ပွဲ ကော်မရှင်နှင့်ဝန်ကြီးဌာနများ၏ လုပ်ငန်းညှိနှိုင်း အစည်းအဝေးကို မေ ၃၁ ရက်တွင် နေပြည်တော်ရှိ ပြည်ထောင်စုရွေးကောက်ပွဲကော်မရှင်ရုံး၌ ကျင်းပခဲ့ပြီး အစည်းအဝေး၌ ကော်မရှင်ဥက္ကဋ္ဌ ဦးလှသိန်းက အထက်ပါကဲ့သို့ ထည့်သွင်းပြောကြားခဲ့ခြင်းဖြစ်ကြောင်း ကော်မရှင်၏ သတင်းထုတ်ပြန်ချက်အရ သိရသည်။

ယခုကျင်းပမည့် ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်နိုင်သည့် နိုင်ငံရေး ပါတီပေါင်း ၉၂ ပါတီရှိပြီး ကိုယ်စားလှယ်လောင်း အမည်စာရင်းတင်သွင်းခြင်း၊ ရုပ်သိမ်းခြင်း၊ စိစစ်ခြင်းလုပ်ငန်း အချိန်ဇယားအား ထုတ်ပြန်ကြေညာပြီးဖြစ်ကြောင်း၊ ပြည်ထောင်စုရွေးကောက်ပွဲ ကော်မရှင်အနေဖြင့်   ကြားဖြတ်ရွေးကောက်ပွဲအား ဥပဒေ၊ နည်းဥပဒေများနှင့်အညီ လွတ်လပ်မျှတပြီး ပွင့်လင်းမြင်သာမှုရှိသော၊ ပြည်သူ့ဆန္ဒနှင့်အညီ ဖြစ်သော၊ အများယုံကြည်လက်ခံသော ရွေးကောက်ပွဲဖြစ်အောင် ကျင်းပပေးသွားမည်ဖြစ်ပြီး ဝန်ကြီးဌာနများအနေဖြင့် ပူးပေါင်းဆောင်ရွက်ပေးစေလိုကြောင်း ပြောကြားခဲ့သည်ဟု ရွေးကောက်ပွဲကော်မရှင်က သတင်းထုတ်ပြန်ခဲ့သည်။

ထို့ပြင် ကြားဖြတ်ရွေးကောက်ပွဲကျင်းပရန် ကြေညာသည့်နေ့မှစ၍ ရလဒ်များကြေညာမည့်နေ့အထိ လုပ်ငန်းစဉ် အချိန်ဇယားရေးဆွဲဆောင်ရွက်လျက်ရှိပြီး မဲစာရင်းအား ၁၄ ရက် နှစ်ကြိမ် ကပ်ထားကြေညာသွားမည် ဖြစ်ကြောင်း၊ ကပ်ထားကြေညာချိန်တွင် သက်ဆိုင်ရာမဲဆန္ဒရှင်များအနေဖြင့် သွားရောက် ကြည့်ရှုစစ်ဆေး၍ တောင်းဆိုခြင်း၊ ပြင်ဆင်ခြင်း၊ ကန့်ကွက်ခြင်းတို့ကို ဆောင်ရွက်ကြစေလိုကြောင်း ကော်မရှင်ဥက္ကဋ္ဌ ဦးလှသိန်းက ထည့်သွင်းပြောကြားခဲ့သည်။

လက်ရှိတွင် အတိုက်အခံပါတီဖြစ်သည့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီအနေဖြင့် ကြားဖြတ်ရွေးကောက်ပွဲ ဝင်သင့်၊ မဝင်သင့် စဉ်းစားနေကြောင်း ပါတီပြောရေး ဆိုခွင့်ရှိသူများက ပြောကြားထားသည်။

ကြားဖြတ်ရွေးကောက်ပွဲကို နိုဝင်ဘာ ၃ ရက်တွင် လစ်လပ်မဲဆန္ဒနယ် ၁၃ နေရာ၌ ကျင်းပမည်ဖြစ်ပြီး ၎င်းမဲဆန္ဒနယ်များတွင် မဲဆန္ဒရှင်စာရင်းပြုစုခြင်းကို ဧပြီ ၁၉ ရက်မှ စတင်ကာ ပြုစုလျက်ရှိကြောင်း သိရသည်။

ကြားဖြတ်ရွေးကောက်ပွဲကျင်းပမည့် လစ်လပ်ပြည်သူ့လွှတ်တော် မဲဆန္ဒနယ်များ မှာ ကန်ပက်လက်၊ လဲချား၊ တာမွေ၊ မြင်းခြံ တို့ဖြစ်ပြီး လစ်လပ်အမျိုးသားလွှတ်တော် မဲဆန္ဒနယ်မှာ ကချင်ပြည်နယ် အမျိုးသား လွှတ်တော်မဲဆန္ဒအမှတ် (၂) (အကျုံးဝင် သောမြို့နယ် မြစ်ကြီးနား) ဖြစ်သည်။

ထို့အတူ လစ်လပ်တိုင်းဒေသကြီး၊ ပြည် နယ်လွှတ်တော်မဲဆန္ဒနယ်များမှာ မတူပီ၊ တမူး၊ အုတ်တွင်း၊ သပိတ်ကျင်း၊ ရသေ့တောင်၊ မင်းဘူး၊ ဆိပ်ကမ်းနှင့် မန္တလေးတိုင်းဒေသ ကြီးလွှတ်တော် ရှမ်းတိုင်းရင်းသားလူမျိုးမဲဆန္ဒနယ်တို့ ဖြစ်သည်။