မြန်မာနိုင်ငံတွင် ပလတ်စတစ်စွန့်ပစ်မှုမှာ လွန်ခဲ့သည့်ငါးနှစ်ထက် သုံးဆပိုများလာကြောင်း ခန့်မှန်းတွေ့ရှိရပြီး ရေလမ်းကြောင်းများသို့ အမှိုက်တန်ချိန် ၂၀၀ ကျော် စီးဝင်နေ

မြန်မာနိုင်ငံတွင် ပလတ်စတစ်စွန့်ပစ်မှုမှာ လွန်ခဲ့သည့်ငါးနှစ်ထက် သုံးဆပိုများလာကြောင်း ခန့်မှန်းတွေ့ရှိရပြီး ရေလမ်းကြောင်းများသို့ အမှိုက်တန်ချိန် ၂၀၀ ကျော် စီးဝင်နေ
Published 1 June 2018

မြန်မာနိုင်ငံတွင် ပလတ်စတစ်စွန့်ပစ်မှုမှာ လွန်ခဲ့သည့်ငါးနှစ်ကထက် သုံးဆပိုမိုများပြားလာပြီး ရေလမ်းကြောင်းများအတွင်း အမှိုက်တန်ချိန် ၂၀၀ ကျော် စီးဝင်လျက်ရှိကြောင်း သန့်မြန်မာအဖွဲ့၏ လေ့လာတွေ့ရှိချက်အရ သိရသည်။

၂၀၁၈ ခုနှစ် မတ်လတွင် စတင်ဖွဲ့စည်းခဲ့သည့် သန့်မြန်မာသည် မြန်မာနိုင်ငံတွင် ပလတ်စတစ် ညစ်ညမ်းမှုများအကြောင်း သိသာမြင်သာမှု ရှိလာအောင် လုပ်ဆောင်ရန်နှင့် ပလတ်စတစ် စွန့်ပစ်ပစ္စည်းများ လျှော့ချနိုင်ရန်အတွက် ရှေ့ဆောင်ကာ လှုပ်ရှားမှုများ ဆောင်ရွက်နေကြောင်း သိရသည်။

“ဘယ်လောက်တောင်မှပဲ တစ်ခါသုံး ပလတ်စတစ်ပစ္စည်းတွေကို သုံးနေတယ်။ ဘယ်လိုသုံးစွဲနေတယ်ဆိုတာနဲ့ ပလတ်စတစ်အစား တခြားဘယ်အရာတွေကို အစားထိုးပြီး အသုံးပြုနိုင်တယ်ဆိုတာကို တစ်ချက်လောက် စဉ်းစားစေချင်ပါတယ်။ ကျွန်မတို့အားလုံး အနေနဲ့ ရိုးရှင်းတဲ့ လူမှုဘဝနေထိုင်မှုအဖြစ် ပြောင်းလဲပြီး ပလတ်စတစ်ပိုက်ကို အသုံးပြုဖို့ ငြင်းပယ်လိုက်တာမျိုး ဒါမှမဟုတ် ဈေးဝယ်ထွက်တဲ့အခါတိုင်းမှာ ပလတ်စတစ်အိတ် အသစ်ကို အသုံးပြုမယ့်အစား ကိုယ်ပိုင်အိတ်တို့၊ ခြင်းတို့ကို ပြောင်းလဲအသုံးပြုလိုက်ရုံနဲ့တင် ဒီပြဿနာတွေကို ဖြေရှင်းလို့ရပါတယ်” ဟု သန့်မြန်မာမှ မမေသက်ထွေးက ပြောကြားသည်။

“ပလတ်စတစ်တွေကို တစ်ခါသုံးပြီးတာနဲ့ လွှင့်ပစ်လိုက်တဲ့အရာတွေ ဘယ်ကိုရောက်သွားတယ်လို့ ထင်ပါသလဲ။ ပလတ်စတစ် ပြုလုပ်ချိန်မှာ အသုံးပြုထားတဲ့ ပစ္စည်းတွေက လုံးဝဆွေးမြည့်ပျောက်ကွယ်သွားမယ့် အရာတွေ မဟုတ်ပါဘူး။ ဒါတွေဟာ ကျွန်မတို့ရဲ့ ပတ်ဝန်းကျင်မှာ အဆိပ်တွေလိုပုံနေတဲ့ အမှိုက်ပုံတွေအပြင် သမုဒ္ဒရာထဲမှာလည်း အမှိုက်ပုံကြီးတစ်ခု ဖြစ်လာပါတယ်။ ဒါတွေက ပင်လယ်ပျော်ငှက်တွေနဲ့ ရေနေသတ္တဝါ သန်းပေါင်းများစွာကို သေကျေပျက်စီးစေပါတယ်။ အချိန်ကြာလာတဲ့အခါမှာ ပလတ်စတစ်တွေက သေးငယ်တဲ့ အစိတ်အပိုင်း အမှုန်အမွှားတွေအဖြစ် ပြိုကွဲသွားပြီးတော့ ကျွန်မတို့ သောက်သုံးနေတဲ့ ရေနဲ့ အစားအသောက်တွေကို ညစ်ညမ်းစေလာပါတယ်” ဟု သန့်မြန်မာမှ Hanna Helsingen ကပြောကြားသည်။

ကမ္ဘာတစ်ဝန်းတွင် ထုတ်လုပ်လျက်ရှိသော ပလတ်စတစ်ပစ္စည်းများ၏ ၁၀ ရာခိုင်နှုန်းကိုသာ ပြန်လည်အသုံးပြုနေပြီး ပလတ်စတစ်များမှာ မြေကြီးထဲတွင်သော်လည်းကောင်း၊ သမုဒ္ဒရာထဲတွင်သော်လည်းကောင်း အမှိုက်များအဖြစ် ဆက်လက်တည်ရှိနေကာ သမုဒ္ဒရာထဲရှိ ပလတ်စတစ်အမှိုက်များ၏ ရာခိုင်နှုန်း ၈၀ ခန့်မှာ လူများစွန့်ပစ်လိုက်သည့် ဖျော်ရည်ပိုက်များနှင့် အိတ်ခွံများဖြစ်ကြောင်း သိရသည်။

Most Read

Most Recent