ရဲရွာရေအားလျှပ်စစ် စီမံကိန်း တစ်နေရာကို တွေ့ရစဉ် (ဓာတ်ပုံ-ြဥနန)
ရဲရွာနှင့် ပေါင်းလောင်း ရေလှောင်တမံများ၏ ရေလက်ကျန် အမှတ်အရ ရဲရွာရေအားလျှပ်စစ် စက်ရုံသည် ၁၀ ရက်ခန့်သာ မောင်းနှင်လည်ပတ်နိုင်မည် ဖြစ်ခြင်းနှင့် ပေါင်းလောင်း ရေအားလျှပ်စစ် စက်ရုံမှာ ၁၅ ရက်ခန့်သာ မောင်းနှင်နိုင်မည် ဖြစ်ခြင်းကြောင့် သက်ဆိုင်ရာ ပြည်နယ်၊ တိုင်း အသီးသီးတွင် အလှည့်ကျ အုပ်စုများခွဲ၍ ဓာတ်အားဖြတ်တောက်ခြင်းများကို ဆောင်ရွက်မည် ဖြစ်ကြောင်း လျှပ်စစ်ဓာတ်အား ဖြန့်ဖြူးရေးလုပ်ငန်းမှ ညွှန်ကြားစာ ထွက်ရှိထားသော်လည်း အဆိုပါ ရေလှောင်တမံများတွင် အနိမ့်ဆုံး ရေအမှတ်များအထက် ပေ ၂၀ ကျော်စီ ကျန်ရှိနေသေး၍ ရေအားလျှပ်စစ် ထုတ်လုပ်လည်ပတ်ရန် စိုးရိမ်ဖွယ် မရှိသေးကြောင်း လျှပ်စစ်ဓာတ်အား ထုတ်လုပ်ရေးလုပ်ငန်း ဦးဆောင်ညွှန်ကြားရေးမှူး ဦးခင်မောင်ဝင်းထံမှ သိရှိရသည်။
ရဲရွာရေအားစစ် စက်ရုံမှာ တစ်ရက်လျှင် မဂ္ဂါဝပ်အာဝါ ၄၃၀၀ ကျော် ထုတ်လုပ်လျက်ရှိပြီး ရဲရွာရေလှော်တမံ၏ အနိမ့်ဆုံးရေအမှတ်မှာ ပင်လယ်ရေမျက်နှာပြင် အထက် ၄၉၂ ပေ ဖြစ်ပြီး လက်ရှိအချိန်တွင် အဆိုပါ အနိမ့်ဆုံး ရေအမှတ်အထက် ၂၂ ပေခန့် ကျန်ရှိနေကြောင်း သိရှိရသည်။
ယင်းအခြေအနေနှင့် ပတ်သက်၍ လျှပ်စစ်ဓာတ်အား ထုတ်လုပ်ရေးလုပ်ငန်း ဦးဆောင်ညွှန်ကြားရေးမှူး ဦးခင်မောင်ဝင်းက “ပုံသေတော့ ပြောမရပါဘူး။ သုံးစွဲမှုအပေါ် မူတည်တာပေါ့။ အခုနေရာအနှံ့မှာ မိုးရွာလာတဲ့အတွက် ရေလျော့နှုန်း နည်းသွားပြီ။ ရဲရွာဆိုရင် အနိမ့်ဆုံး ရေအမှတ်ရောက်ဖို့ ၂၁.၆၇ ပေ ကျန် နေသေးတယ်။ ပေါင်းလောင်းကဆိုရင်လည်း အနိမ့်ဆုံးရောက်ဖို့ ၂၆ ပေကျန်နေသေးတယ်။ စက်ရုံလည်ပတ်ဖို့ တစ်ရက်မှာမှ ဒသမ ၃ ပေ၊ ၄ ပေလောက်ပဲ မောင်းနှင်ရတာ။ ရေအားလျှပ်စစ်စက်ရုံ နှစ်ခုမှာ ၁၀ ရက် ၁၅ ရက်လောက်ပဲ လည်ပတ်နိုင်တော့မယ် ဆိုတာက ဖြန့်ဖြူးရေးဘက်က ခန့်မှန်းပါ။ ရဲရွာဆို ရေလက်ကျန် ၂၂ ပေလောက်ရှိမယ်။ အဲဒီ ၂၂ ပေကို ဒသမ ၄ ပေနဲ့ပဲ စားကြည့်လိုက်ရင် ၅၅ ရက် လည်ပတ်လို့ ရသေးတယ်။ ဒါတွေက ပုံသေတွေတော့ တွက်လို့မရဘူး။ သုံးစွဲမှုအပေါ် မူတည်တယ်။ ဖြန့်ဖြူးရေး အပိုင်းကလည်း သူ့အစီအစဉ်နဲ့သူ ဆောင်ရွက်ကြရတာမို့ အနည်းအကျဉ်းတော့ ရှိနိုင်တာပေါ့” ဟု ပြောကြားခဲ့သည်။
“ကျွန်တော်တို့ဆီကတော့ စက်တွေလည်း ကောင်းတယ်။ ရေလည်းကောင်းနေတယ်ဆိုရင် မောင်းပေးမှာပဲ။ အခုတောင်မှ သုံးတဲ့နှုန်းတွေက လျော့သွားပြီ။ အရင်နေ့တွေက ပူလို့ တစ်ရက်ကို အမြင့်ဆုံး မဂ္ဂါဝပ် ၃၂၀၀ ထွက်တယ်။ အခုသုံးတဲ့ဝန်အားက ၂၈၀၀ မဂ္ဂါဝပ်လောက်ပဲ ရှိတော့တယ်။ ပြီးခဲ့တဲ့ တစ်ပတ်အတွင်းကဆိုရင် မဂ္ဂါဝပ်အာဝါ ၆၈၀၀၀ လောက်ရှိပြီး အခု ၅၈၀၀၀ ပဲရှိတော့တယ်။ အဲလိုလျော့သွားလို့ရှိရင် စက်ရုံတွေကလည်း ရေသုံးစွဲမှု နည်းသွားတယ်။ မကုန်တော့ဘူး” ဟု ဦးခင်မောင်ဝင်းက ဆက်လက် ပြောကြားခဲ့သည်။
လက်ရှိအချိန်တွင် သက်ဆိုင်ရာပြည်နယ်၊ တိုင်းအသီးအသီးတွင် အလှည့်ကျဝန်အား လျှော့ချမည့် အစီအစဉ်အရ စစ်ကိုင်းတိုင်းဒေသကြီး အတွင်းတွင် ဝန်အား ၃၀ မဂ္ဂါဝပ်လျှော့ချ၍ မြို့နယ်အလိုက် အလှည့်ကျ အုပ်စုများခွဲကာ ဓာတ်အားဖြတ်တောက်ခြင်း ကို မေလ ၂၈ ရက်မှ စတင်ပြုလုပ်လျက် ရှိကြောင်း သိရှိရသည်။
ယခုနှစ် နွေရာသီကာလတွင် လျှပ်စစ်ဓာတ်အား ထုတ်လုပ်ဖြန့်ဖြူး ပေးလျက်ရှိသော အဓိကစက်ရုံ တစ်ခုတွင် ပါဝင်သည့် ရွှေလီရေအားလျှပ်စစ်စက်ရုံမှ ဝယ်ယူရရှိသည့် ဓာတ်အားများအနက် မဂ္ဂါဝပ် ၂၀၀ ခန့်မှာ ရွှေလီအထက် တရုတ်နိုင်ငံအတွင်းရှိသည် မြစ်ညှာမှ ရေလျော့နည်းမှု အခြေအနေအရ ဖြန့်ဖြူးထုတ်လုပ်နိုင်ခြင်း မရှိခဲ့သောကြောင့် ရဲရွာနှင့် ပေါင်းလောင်း ရေအားလျှပ်စစ်စက်ရုံများမှာ ကြိုတင်သိုလှောင်ထားသည့် ရေပမာဏထက် ပိုမိုအသုံးပြုကာ လည်ပတ်ခဲ့ရကြောင်း သိရှိရသည်။
