<

ရန်ကုန်တိုင်းဒေသကြီး အစိုးရအနေဖြင့် စီမံကိန်းများ ဆောင်ရွက်ရာတွင် ၂၀၀၈ ဖွဲ့စည်းပုံ အခြေခံဥပဒေနှင့်အညီ ဆောင်ရွက်ခဲ့ခြင်း မရှိသည်ကို တွေ့ရှိရကြောင်း တိုင်းဒေသကြီး လွှတ်တော်ကိုယ်စားလှယ် ဝေဖန်

မေ ၂၉ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေးကို တွေ့ရစဉ်

ရန်ကုန်တိုင်းဒေသကြီးအစိုးရ ဆောင်ရွက်နေသည့် စီမံကိန်းများသည် ဖွဲ့စည်းပုံ အခြေခံဥပဒေနှင့်အညီ ဆောင်ရွက်ခဲ့ခြင်း မရှိကြောင်း မရမ်းကုန်းမြို့နယ် မဲဆန္ဒနယ် အမှတ် (၁)  တိုင်းဒေသကြီး လွှတ်တော်ကိုယ်စားလှယ် ဦးရန်ရှင်းက ပြောကြားသည်။

အဆိုပါကိစ္စအား မေ ၂၉ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေး (၃၅ ရက်မြောက်နေ့) တွင် လွှတ်တော်အစည်းအဝေး (၃၃ ရက်မြောက်နေ့) တွင် လွှတ်တော်ကိုယ်စားလှယ် ဒေါ်စန္ဒာမင်း တင်သွင်းခဲ့သည့် ရန်ကုန်တိုင်းဒေသကြီး ၂၀၁၆-၂၀၁၇ ခုနှစ် ဖြည့်စွက်ဘဏ္ဍာရန်ပုံငွေတွင် City Bank ၌ ရန်ကုန်တိုင်းဒေသကြီး အစိုးရအဖွဲ့က ရင်းနှီးမြှုပ်နှံငွေ ထည့်ဝင်ခြင်းအတွက် ၆၄ ဘီလျံကိုလည်းကောင်း၊ ခရီးသည်တင် မော်တော်ယာဉ် သယ်ယူပို့ဆောင်ရေး အများပိုင် ကုမ္ပဏီများတွင် ထည့်ဝင်ရင်းနှီးမြှုပ်နှံခြင်း အတွက် ၇၀ ဘီလျံကိုလည်းကောင်း၊ လယ်ယာမြေများ ပြုပြင်ခြင်း လုပ်ငန်းအတွက် ကျပ် ၇၇၄၈ ဒသမ ၃၀၁ သန်း ကိုလည်းကောင်း လွှတ်တော်က ခွင့်ပြုခဲ့ခြင်းအပေါ် ရန်ကုန်တိုင်းဒေသကြီး စာရင်းစစ်ချုပ်ရုံးမှ ယခုလာမည့် ၂၀၁၈ ခုနှစ် တစ်နှစ်ပြည့် အစီရင်ခံစာတွင် တင်ပြဆွေးနွေးပေးရန် အဆိုနှင့် ပတ်သက်၍ ဦးရန်ရှင်းက ဆွေးနွေးရာတွင် ထည့်သွင်းပြောကြား ခဲ့ခြင်းဖြစ်သည်။

“ကျွန်တော်တို့ စီးပွားရေးလုပ်ငန်းများကို ဖွဲ့စည်းတဲ့အခါမှာ ၁၉၅၀ ခုနှစ် ကုမ္ပဏီ အထူးအက် ဥပဒေအရ ဖွဲ့စည်းခဲ့တယ်လို့ သိရပါတယ်။ ၁၉၅၀ ခုနှစ်က အခြေအနေကို ပြန်ကြည့်မယ်ဆိုရင် ၁၉၄၇ ခုနှစ် ဖွဲ့စည်းပုံ အခြေခံဥပဒေပဲရှိတာ ဖြစ်ပါတယ်။ အခုအခါမှာဆိုရင် နိုင်ငံတော်ကို ၂၀၀၈ ဖွဲ့စည်းပုံ အခြေခံဥပဒေနဲ့ အုပ်ချုပ်နေတာ ဖြစ်ပါတယ်။ ၂၀၀၈ ဖွဲ့စည်းပုံ အခြေခံဥပဒေဟာ ဥပဒေအားလုံးရဲ့ အခြေခံ ဖြစ်တယ်လို့ ဖော်ပြထားတာကို တွေ့ရှိရပါတယ်။ ၂၀၀၈ နိုင်ငံတော် ဖွဲ့စည်းပုံ အခြေခံဥပဒေ ပုဒ်မ ၁၈၈၊ ၁၈၉ မှာ ပြည်နယ်၊ တိုင်းဒေသကြီး အစိုးရအဖွဲ့အနေဖြင့် ဇယား ၂ ပါ လုပ်ငန်းများ ဆောင်ရွက်တဲ့အခါမှာ အမိန့်ကြော်ငြာစာကို သက်ဆိုင်ရာ ပြည်နယ်၊ တိုင်းဒေသကြီးလွှတ်တော် ကိုယ်စားလှယ်များမှ ဆွေးနွေးအကြံပြုရန် ပြဋ္ဌာန်းထားတာကို တွေ့ရှိရပါတယ်။ ဖော်ပြထားသည့် စီးပွားရေး လုပ်ငန်းများ ဆောင်ရွက်ရာမှာ ရန်ကုန်တိုင်းဒေသကြီး အစိုးရအနေဖြင့် ဖွဲ့စည်းပုံ အခြေခံဥပဒေနဲ့အညီ ဆောင်ရွက်ခဲ့ခြင်း မရှိတာကို တွေ့ရှိရပါတယ်” ဟု ဦးရန်ရှင်းက ပြောကြားသည်။

အဆိုပါ စီးပွားရေး လုပ်ငန်းများသည် အစိုးရဌာနဆိုင်ရာ စီးပွားရေး လုပ်ငန်းများ မဟုတ်သော်လည်း ရန်ကုန်တိုင်းဒေသကြီး အစိုးရအဖွဲ့မှ ငွေကြေးများကို တာဝန်ခံ တင်ပြတောင်းခံ ရင်းနှီးမြှုပ်နှံခဲ့ခြင်း ဖြစ်ကြောင်း၊ ယင်းလုပ်ငန်းများသည် ရန်ကုန်တိုင်းဒေသကြီး အစိုးရအဖွဲ့၏ ကြီးကြပ်မှုအောက်တွင် တိုက်ရိုက်ဖြစ်နေပြီး စီးပွားရေး အဖွဲ့များတွင် ပါဝင်ကြသည့် ဒါရိုက်တာ အဖွဲ့ဝင်များသည် ရန်ကုန်တိုင်းဒေသကြီး အစိုးရအဖွဲ့မှ တိုင်းဒေသကြီး ၀န်ကြီးများ ပါဝင်သည်ကို တွေ့ရှိရကြောင်း၊ ထို့ကြောင့် ရန်ကုန်တိုင်းဒေသကြီး စာရင်းစစ်ချုပ်မှတစ်ဆင့် ရန်ကုန်တိုင်းဒေသကြီး အစိုးရအနေဖြင့် လွှတ်တော်သို့ ရှင်းလင်းတင်ပြရန် တာဝန်ရှိပြီး စာရင်းစစ်ချုပ်မှ သေချာစစ်ဆေးပြီး လွှတ်တော်သို့ ရှင်းလင်းတင်ပြရန် လိုအပ်ကြောင်း ဦးရန်ရှင်းက ဆက်လက်ပြောကြားသည်။

“ရန်ကုန်တိုင်းဒေသကြီး ၂၀၁၆-၂၀၁၇ ဖြည့်စွက်ဘဏ္ဍာ ရန်ပုံငွေတွင် ရန်ကုန်တိုင်းဒေသကြီး အစိုးရအဖွဲ့မှ ရန်ကုန်မြို့သစ် စီမံကိန်း အကောင်အထည်ဖော် ဆောင်ရွက်နိုင်ရန် Yangon Metropolitan Development Public Co., Ltd. အများပိုင် ကုမ္ပဏီထူထောင်ကာ ရန်ကုန်မြို့သစ် စီမံကိန်းလုပ်ငန်းများ ဆောင်ရွက်ရန် ၆၄ ဘီလျံကို ရန်ကုန်မြို့ပြ သယ်ယူပို့ဆောင်ရေး အများနှင့် သက်ဆိုင်သော ကုမ္ပဏီလီမိတက် ထူထောင်နိုင်ရန် ကျပ်ဘီလျံ ၇၀ ကိုလည်းကောင်း၊ လယ်ယာမြေများ ပြုပြင်ခြင်း လုပ်ငန်းအတွက် ကျပ်သန်း ၇၇၄၈ ဒသမ ၃၀၁ သန်းကိုလည်းကောင်း လွှတ်တော်ကို တင်သွင်းချက်အရ လွှတ်တော်မှာ ခွင့်ပြုခဲ့ပါတယ်။ အဲဒီငွေတွေဟာ ပြည်သူထံမှရရှိတဲ့ အခွန်ဘဏ္ဍာငွေများဖြစ်ပြီး ပြည်သူများရဲ့ကိုယ်စား လွှတ်တော်မှ ခွင့်ပြုပေးရခြင်း ဖြစ်တဲ့အတွက် လွှတ်တော်အနေဖြင့် ဆုံးရှုံးမှုမဖြစ်အောင် ပြည်သူ့ကိုယ်စား စောင့်ကြည့်ပြီးတော့ အပြန်အလှန် ထိန်းကျောင်းသွားရန် လိုအပ်ပါတယ်” ဟု ၎င်းကဆက်လက် ပြောကြားသည်။

ယင်းအဆိုနှင့် ပတ်သက်၍ ရန်ကုန်တိုင်းဒေသကြီးလွှတ်တော် ပို့ဆောင်ရေး၊ ဆက်သွယ်ရေး၊ ဆောက်လုပ်ရေးနှင့် စက်မှုလက်မှုရေးရာ ကော်မတီ အပါအ၀င် တိုင်းဒေသကြီး လွှတ်တော်ကိုယ်စားလှယ် ငါးဦးက ထောက်ခံဆွေးနွေးခဲ့ပြီး ဇွန် ၁ ရက်တွင် ရန်ကုန်တိုင်းဒေသကြီး စာရင်းစစ်ချုပ်က အဆိုနှင့် ပတ်သက်ပြီး ပြန်လည်ရှင်းလင်းမည် ဖြစ်ကြောင်း သိရသည်။

 

May 29, 2018














Copy Protected by Chetan's WP-Copyprotect.