မေ ၂၈ ရက်က ကျင်းပသည့် ရန်ကုန်တိုင်းဒေသကြီး လွှတ်တော်အစည်းအဝေးကို တွေ့ရစဉ် (ဓာတ်ပုံ- ပြည့်ဖြိုးအောင်)
တရားဥပဒေစိုးမိုးရေးနှင့် ပတ်သက်ပြီး ရန်ကုန်တိုင်းဒေသကြီးအစိုးရအဖွဲ့အား လွှတ်တော်တွင် မေးမြန်းသော်လည်း ဆောင်ရွက်မှုအားနည်းနေသဖြင့် လုပ်ငန်းရှင်အချို့က ဥပဒေမဲ့လုပ်ငန်းများကို အတင့်ရဲစွာပိုမို လုပ်ကိုင်နေကြောင်း ကြည့်မြင်တိုင်မြို့နယ် မဲဆန္ဒနယ်အမှတ်(၂)မှ တိုင်းဒေသကြီး လွှတ်တော်ကိုယ်စားလှယ် ဦးခင်ဝင်းက ပြောကြားသည်။
အဆိုပါကိစ္စအား မေ ၂၈ ရက်တွင် ပြုလုပ်သည့် ရန်ကုန်တိုင်းဒေသကြီးလွှတ်တော်တွင် ရန်ကုန်တိုင်းဒေသကြီးအတွင်းရှိ ဥပဒေချိုးဖောက်ပြီး တရားမဝင်လုပ်ကိုင်နေသော လုပ်ငန်းများကို ယခင်ကထက် ပိုမိုထိရောက်စွာ အရေးယူဆောင်ရွက်မှုများ ပြုလုပ်ပေးနိုင်ရန် ရန်ကုန်တိုင်းဒေသကြီး အစိုးရအဖွဲ့သို့ တိုက်တွန်းကြောင်းအဆိုအား တိုက်ကြီးမြို့နယ် မဲဆန္ဒနယ်အမှတ် (၁) လွှတ်တော် ကိုယ်စားလှယ် ဦးတင်ရှိန်က တင်သွင်းခဲ့သည့် အဆိုနှင့်ပတ်သက်ပြီး ထောက်ခံဆွေးနွေးရာတွင် ဦးခင်ဝင်းက ထည့်သွင်းပြောကြားခဲ့ခြင်း ဖြစ်သည်။
“တရားဥပဒေစိုးမိုးရေးကို ရန်ကုန်တိုင်းအစိုးရအဖွဲ့ကို ရန်ကုန်တိုင်းဒေသကြီး လွှတ်တော်ကနေ မေးခွန်းကို မေးမြန်းဆောင်ရွက်ခဲ့သော်လည်း အရေးယူမှုအားနည်းနေတာကို တွေ့နေရတာကြောင့် လုပ်ငန်းရှင် အချို့က အတင့်ရဲစွာ ပိုမိုလုပ်ကိုင်နေကြတဲ့အတွက် ပြည်သူများက မေးခွန်းထုတ်စရာတစ်ခု ဖြစ်လာပါတယ်” ဟု ဦးခင်ဝင်းက ပြောကြားသည်။
ရန်ကုန်တိုင်းဒေသကြီးအတွင်းရှိ မြို့နယ်များအနက် စည်ပင်သာယာပြင်ပရှိ မြို့နယ်များတွင် ဥပဒေကို လေးလေးစားစား လိုက်နာမှုမရှိဘဲ စီးပွားရေးသမား၊ လုပ်ငန်းရှင်အချို့မှ လယ်မြေများကို တူးဖော်ပြီး အုတ်ဖုတ်လုပ်ငန်း၊ ငါးကန်တူးဖော်ပြီး ငါးမွေးမြူခြင်းလုပ်ငန်းများ၊ တောင်များကိုဖြိုပြီး ရောင်းချမှုများသည် စည်းကမ်းလိုက်နာမှု မရှိဘဲ ပြောင်ပြောင်တင်းတင်းလုပ်ကိုင်နေကြသည်မှာ နှစ်ကာလကြာမြင့်ပြီး ပိုမိုဆိုးရွား လာနေသည်ကို မြို့နယ်များရှိ တာဝန်ရှိပုဂ္ဂိုလ်၊ ဌာနဆိုင်ရာများမှ ဥပဒေအရဆောင်ရွက် ခြင်းမရှိသည့်အတွက်ကြောင့် တရားဥပဒေစိုးမိုးရေးသည် ဘာလဲဆိုသည်ကို ပြည်သူများက မေးမြန်းနေကြကြောင်း ဦးခင်ဝင်းက ပြောကြားသည်။
“အမှန်တကယ် ဥပဒေကို မျက်ကွယ်ပြုပြီး လုပ်ကိုင်နေကြတဲ့လုပ်ငန်းတွေကို ကြည့်မယ်ဆိုပါက လယ်ယာမြေများကို အခြားနည်းသုံးစွဲခွင့်အရ ခွင့်ပြုမိန့်မရှိဘဲ ငါးကန်တွေတူးဖော်ပြီး ငါးမွေးတာကို စည်ပင်သာယာနယ်နိမိတ်ပြင်ပမှာ အများဆုံး တွေ့နေရတယ်။ သက်ဆိုင်ရာဌာနတွေက အရေးယူဆောင်ရွက်တာကို လုပ်ဆောင်မှု မရှိတဲ့အတွက် အတင့်ရဲစွာလုပ်ကိုင်နေကြတာကို ယနေ့တွေ့မြင်နေရတယ်” ဟု ဦးခင်ဝင်းက ပြောကြားသည်။
ထို့ပြင် အုတ်ဖုတ်သည်လုပ်ငန်းများသည် တစ်နေ့ထက်တစ်နေ့ ပိုမိုများပြားလာသည့်အတွက် လယ်ယာမြေများစွာ ဆုံးရှုံးမှုများဖြစ်ပေါ်နေပြီး ဥပဒေစိုးမိုးမှု မဆောင်ရွက်နိုင်သည့်အတွက် နိုင်ငံတော်၏ မြေသယံဇာတ ပျက်စီးဆုံးရှုံးမှုများကို တွေ့မြင်နေရကြောင်း၊ တိုက်ကြီး၊ မှော်ဘီမြို့နယ်များတွင် ရှိသည့် သဘာဝတောင်တန်းများကို ဖြိုချကာ မြေရောင်းချမှုများကို ထင်ထင်ရှားရှား တွေ့ပါလျက်၊ သက်ဆိုင်ရာတာဝန်ရှိသူများမှ ဥပဒေနှင့်အညီ စစ်ဆေးအရေးယူဆောင်ရွက်သင့်ပါလျက် အရေးယူမှုမပြုခြင်းကို တရားဥပဒေစိုးမိုးမှုရှိပါသလားဟု မေးမြန်းလာမှုများရှိကြောင်း ဦးခင်ဝင်းက ပြောကြားသည်။
“သဘာဝတောင်တန်းငယ်တွေကို ဖြိုချပြီး မြေများရောင်းချနေတဲ့အတွက် သဘာဝရေ ပိုရေလွှဲဂေဟစနစ်တွေ ပျက်စီးပြီး နိုင်ငံတော်ရဲ့ အကျိုးစီးပွားလည်း ဆုံးရှုံးနစ်နာနေတာတွေကြောင့် တရားဥပဒေစိုးမိုးရေးဟာ အရေးတကြီးလိုအပ်နေပြီ ဖြစ်ပါတယ်” ဟု ဦးခင်ဝင်းက ပြောကြားသည်။
