ပြည်ထောင်စုလွှတ်တော်၏ အတည်ပြုချက်ဖြင့် ရယူထားသော ပြည်ပချေးငွေဖြင့် စီမံကိန်းလုပ်ငန်းများ ဆောင်ရွက်ရာတွင် အောက်ခြေသို့မရောက်ရှိ၍ တိုင်ကြားမှုများရှိကြောင်း ကျန်းမာရေးနှင့်အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးက ပြောကြားသည်။

နေပြည်တော်၌ မေ ၂၈ ရက်ပြုလုပ်သော ဒုတိယအကြိမ် ပြည်ထောင်စုလွှတ်တော် အဋ္ဌမပုံမှန်အစည်းအဝေး ပÍ္စမနေ့တွင် ၂၀၁၇ ခုနှစ် မတ် ၃၁ ရက်အထိ ပြည်ထောင်စုလွှတ်တော်၏ အတည်ပြုချက်ဖြင့် ရယူထားသည့်  ပြည်ပချေးငွေများနှင့်စပ်လျဉ်း၍ စီမံကိန်းလုပ်ငန်းတစ်ခုချင်းအလိုက် ဆောင်ရွက်ပြီးစီးမှု အခြေအနေကို ကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီးက ရှင်းလင်းတင်ပြရာတွင် အထက်ပါအတိုင်း ပြောကြားခဲ့ခြင်း ဖြစ်သည်။

“ချေးတဲ့ငွေက ပြန်ဆပ်ရမှာဖြစ်တဲ့အတွက် သေချာချာ စိစိစစ်စစ် သုံးပါတယ်။ သုံးတဲ့နေရာမှာ စနစ်ကျဖို့အတွက် တိုင်းနဲ့ပြည်နယ်ဦးစီးမှူးအကုန်လုံး အတိအကျဘယ်ဟာကို ဘယ်လိုသုံးရမယ် ဘယ်ဟာကို မသုံးရဘူးဆိုတာ အသေးစိတ်ကို ပို့ထားတဲ့အပြင် သုံးငွေနဲ့ပတ်သက်ပြီးတော့ ဘဏ္ဍာရေးစီမံခန့်ခွဲမှုအတွက် စံလုပ်ထုံးလုပ်နည်းများ ကမ္ဘာ့ကျန်းမာရေးအဖွဲ့နဲ့ ကမ္ဘာ့ဘဏ်နဲ့ အသေးစိတ်ပေါင်းပြီး ထုတ်ထားပါတယ်။ အသေးစိတ်ပါတာကို အကုန်လုံးမဟုတ်ဘဲ တစ်စိတ်တစ်စိတ်လုပ်ပြီး သင်တန်းတွေလည်း ပေးထားပြီး ဖြစ်ပါတယ်။ တစ်ခုတင်ပြချင်တာက ဘယ်လောက်ထုတ်ထုတ် ဘယ်လောက်သင်တန်းပေးပေး လျော့နည်းချက်တွေတော့ ရှိပါတယ်။ အမှန်အတိုင်းပြောမယ်ဆိုရင် တိုင်စာလေးတွေလည်း နည်းနည်းရပါတယ်။ အောက်ခြေဝန်ထမ်းထိကို ပိုက်ဆံက မရောက်သွားဘူး။ ဒါလေးတွေက အမှန်တရားပါ။ ဒီကိစ္စတွေကိုလည်း တတ်နိုင်သမျှ နည်းနိုင်သလောက် နည်းအောင် ဗဟိုကနေ ကိုင်တွယ်စိစစ်ပြီး သုံးသပ်လျက်ရှိပါတယ်” ဟု ပြည်ထောင်စုဝန်ကြီး ဒေါက်တာမြင့်ထွေးက ပြောကြားသည်။

ကျန်းမာရေးနှင့်အားကစားဝန်ကြီး ဌာနအနေဖြင့် ကျန်းမာရေးဖွံ့ဖြိုးတိုးတက်မှု လုပ်ငန်းများ ဆောင်ရွက်ရန်အတွက် ကမ္ဘာ့ဘဏ်မှ ဒေါ်လာသန်း ၁၀၀ နှင့် ADB ဘဏ်မှ ဒေါ်လာ ၁၂ သန်း စုစုပေါင်း ဒေါ်လာ ၁၁၂ သန်းကို ပြည်ထောင်စုလွှတ်တော်၏ အတည်ပြုချက်ဖြင့် ချေးယူထားခြင်းဖြစ်ပြီး လက်ရှိတွင် ကျပ် ၆၈ ဘီလျံ သုံးထားပြီးဖြစ်ကြောင်း ပြည်ထောင်စုဝန်ကြီးက ပြောကြားသည်။

ထိုပြင် ကမ္ဘာ့ဘဏ်မှချေးယူရာတွင် ဝန်ဆောင်ခအဖြစ် ယခုနှစ်အထိ ဒေါ်လာ ရှစ်သိန်းခန့်ပေးရကြောင်း၊ ထိုသို့ ဒေါ်လာများပြန်ပေးနေရခြင်းကို ဝန်ထမ်းများအနေဖြင့် သိစေချင်ကြောင်းနှင့် အလကားရသည့် ပိုက်ဆံမဟုတ်သည်ကို ဝန်ထမ်းများသိစေချင်ကြောင်း ပြည်ထောင်စုဝန်ကြီး ဒေါက်တာမြင့်ထွေးက ဆက်လက်ပြောကြားသည်။

ကျန်းမာရေးနှင့် အားကစားဝန်ကြီးဌာနအနေဖြင့် ကမ္ဘာ့ဘဏ်ချေးငွေဖြင့် ကဏ္ဍ (၁) ပဏာမ ကျန်းမာရေးစောင့်ရှောက်မှုလုပ်ငန်းများ အားဖြည့်ဆောင်ရွက်ခြင်း၊ ကဏ္ဍ (၂) အဖြစ် စနစ်အားဖြည့်ခြင်း၊ စွမ်းဆောင်ရည်မြှင့်တင်ခြင်းနှင့် စီမံချက်လုပ်ငန်းများ စီမံခန့်ခွဲခြင်းနှင့် ကဏ္ဍ (၃) သဘာဝဘေးနှင့် ပြည်သူ့ကျန်းမာရေး အရေးပေါ်အခြေအနေ တုံ့ပြန်ဆောင်ရွက်ခြင်းများအတွက် သုံးစွဲကြောင်း ဝန်ကြီးက ပြောကြားသည်။

ကဏ္ဍ (၁) နှင့် ကဏ္ဍ (၂) အတွက် လေးနှစ်စာဘဏ္ဍာငွေ လျာထားချက်သည် စုစုပေါင်း အမေရိကန်ဒေါ်လာ သန်း ၁၀၀ ဖြစ်ပြီး ချေးငွေရယူသုံးစွဲမှုသည် ကျပ်သန်း ၆၈၀၈၈ ဒသမ ၃၁၈ ကြောင်းနှင့် တိုင်းဒေသကြီး /ပြည်နယ်ကျန်းမာရေးဦးစီးဌာနများ၊ မြို့နယ်ကျန်းမာရေးဦးစီးဌာနများ၊ မြို့နယ်ဆေးရုံများ၊ တိုက်နယ်ဆေးရုံများ၊ ဒေသန္တရကျန်းမာရေးဌာနများ၊ တိုက်နယ်ကျန်းမာရေးဌာနများ၊ ကျေးလက်ကျန်းမာရေးဌာနများ၊ ကျေးလက်ကျန်းမာရေးဌာနခွဲများ၊ မိခင်နှင့်ကလေး ကျန်းမာရေးဌာနများနှင့် ကျောင်းကျန်းမာရေးဌာနများသို့ ကဏ္ဍ (၁) ဖြစ်သည့် ပဏာမကျန်းမာ ရေးစောင့်ရှောက်မှုလုပ်ငန်းများ အားဖြည့် ဆောင်ရွက်ရန် ရန်ပုံငွေ ခွဲဝေချထားပေးကြောင်း သိရသည်။