ဥပဒေအရာရှိများသည် မိမိတို့၏ တရားစွဲနှင့် အမှုလိုက်လုပ်ငန်း တာဝန်များကို မျှတသော တရားစီရင်ရေးဆိုင်ရာ စံနှုန်းများနှင့်အညီ လိုက်နာဆောင်ရွက်ပြီး နစ်နာသူနှင့် စွပ်စွဲခံရသူများအတွက် တရားမျှတမှုရရှိအောင် ကြိုးပမ်းဆောင်ရွက်ရန် ပြည်ထောင်စုရှေ့နေချုပ် ပြောကြား

ဥပဒေအရာရှိများသည် မိမိတို့၏ တရားစွဲနှင့် အမှုလိုက်လုပ်ငန်း တာဝန်များကို မျှတသော တရားစီရင်ရေးဆိုင်ရာ စံနှုန်းများနှင့်အညီ လိုက်နာဆောင်ရွက်ပြီး နစ်နာသူနှင့် စွပ်စွဲခံရသူများအတွက် တရားမျှတမှုရရှိအောင် ကြိုးပမ်းဆောင်ရွက်ရန် ပြည်ထောင်စုရှေ့နေချုပ် ပြောကြား
Published 26 May 2018

ဥပဒေအရာရှိများသည် မိမိတို့၏ တရားစွဲနှင့် အမှုလိုက်လုပ်ငန်းတာဝန်များကို မျှတသော တရားစီရင်ရေးဆိုင်ရာ စံနှုန်းများနှင့်အညီ လိုက်နာဆောင်ရွက်ပြီး နစ်နာသူနှင့် စွပ်စွဲခံရသူများအတွက် တရားမျှတမှုရရှိအောင် ကြိုးပမ်းဆောင်ရွက်သွားရန် ပြည်ထောင်စု ရှေ့နေချုပ် ဦးထွန်းထွန်းဦးက မေ ၂၅ ရက်တွင် ကျင်းပသည့် မျှတသောတရားစီရင်ရေးဆိုင်ရာ စံနှုန်းများစာအုပ် မိတ်ဆက်ခြင်းအခမ်းအနားတွင် ပြောကြားသည်။

“ပြည်ထောင်စုရှေ့နေချုပ်ရုံးဟာ ဥပဒေပြုရေး၊ အုပ်ချုပ်ရေး၊ တရားစီရင်ရေးကဏ္ဍ သုံးရပ်စလုံးတွင် ပါဝင်ဆောင်ရွက်နေရတဲ့ ဥပဒေဆိုင်ရာ အဖွဲ့အစည်းတစ်ခုဖြစ်တာကြောင့် ဥပဒေအရာရှိတွေဟာ မိမိတို့ရဲ့ တရားစွဲနဲ့ အမှုလိုက်လုပ်ငန်းတာဝန်များကို မျှတသော တရားစီရင်ရေးဆိုင်ရာစံနှုန်းများနဲ့အညီ လိုက်နာဆောင်ရွက်ပြီး နစ်နာသူနဲ့ စွပ်စွဲသူများအတွက် တရားမျှတမှုရရှိအောင် ကြိုးပမ်းဆောင်ရွက်ကြဖို့ တိုက်တွန်းမှာကြားလိုပါတယ်” ဟု ဦးထွန်းထွန်းဦးက ပြောကြားသည်။

မြန်မာနိုင်ငံသည် ဒီမိုကရေစီအသွင်ကူးပြောင်းရေး၊ တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးတို့အတွက် အလေးထားဆောင်ရွက်နေကြောင်း၊ အသွင်ကူးပြောင်းမှုလုပ်ငန်းစဉ်များတွင် တရားဥပဒေစိုးမိုးရေးသည် အရေးကြီးသည့် အခန်းကဏ္ဍတစ်ရပ်အနေဖြင့် ပါဝင်ကြောင်း၊ တရားဥပဒေစိုးမိုးရေးသည် ပြည်သူများ၏ ဘေးကင်းလုံခြုံရေးနှင့် အခြေခံ အခွင့်အရေးများရရှိရန်အတွက် အုတ်မြစ်တစ်ခု ဖြစ်ပြီး နိုင်ငံဖွံ့ဖြိုးတိုးတက်ရေးအတွက် အဓိကကျကြောင်း ဦးထွန်းထွန်းဦးက ဆိုသည်။

၎င်းက “တရားဥပဒေစိုးမိုးရေးနဲ့ ပြည်သူများရဲ့ လူမှုစီးပွားဘ၀ တိုးတက်မြင့်မားရေးဟာ ပြည်ထောင်စုအစိုးရ၏ဦးစားပေး ရည်မှန်းချက်ပန်းတိုင်တစ်ရပ်ဖြစ်ပြီး ထို့အတူ မြန်မာနိုင်ငံနဲ့ မြန်မာပြည်သူတွေ အေးချမ်းသာယာစွာ နေထိုင်နိုင်ပြီး ဖွံ့ဖြိုးတိုးတက်ဖို့ ဆောင်ရွက်တဲ့နေရာမှာ တရားဥပဒေစိုးမိုးရေး နဲ့ တရားမျှတမှုရရှိရေးဟာ အရေးကြီးဆုံးဖြစ်နေတာကို တွေ့မြင်ရမှာပါ။ တရားဥပဒေစိုးမိုးရေးဆိုင်ရာ ပေါင်းစပ်ညှိနှိုင်းရေးညီလာခံမှာလည်း နိုင်ငံတော်၏အတိုင်ပင်ခံပုဂ္ဂိုလ်က လမ်းညွှန်မှာကြားခဲ့ပါတယ်” ဟု ဆက်လက် ပြောကြားသည်။

မျှတသော တရားစီရင်ရေးဆိုင်ရာစံနှုန်းများအား မြန်မာနိုင်ငံ၏ ဖွံ့စည်းပုံအခြေခံဥပဒေ၊ ပြဋ္ဌာန်းဥပဒေများနှင့် တရားရုံးဆုံးဖြတ်ချက်များအပေါ် အခြေခံထားပြီး အပြည်ပြည်ဆိုင်ရာ Fair Trials စံနှုန်းများနှင့် ကိုက်ညီမှု ရှိစေရန် ပြုစုထားကြောင်း သိရသည်။

“ဥပဒေအရာရှိများအနေနဲ့ မျှတသော တရားစီရင်ရေးဆိုင်ရာ စံနှုန်းများကို လေ့လာကျင့်သုံးခြင်းဖြင့် တရားစွဲနဲ့ အမှုလိုက်ဆိုင်ရာလုပ်ငန်းများကို ထိရောက်ကောင်းမွန်စွာ ဆောင်ရွက်နိုင်ခြင်း၊ လူပုဂ္ဂိုလ်တစ်ဦးချင်းစီရဲ့ အခွင့်အရေးကို ဥပဒေနဲ့အညီ ကာကွယ်စောင့် ရှောက်မှုပေးနိုင်ခြင်း၊ တရားစီရင်ရေးစနစ်အပေါ် အများပြည်သူ ယုံကြည်ကိုးစားမှုရှိလာခြင်းတို့အပေါ် အကျိုးသက်ရောက်စေမှာဖြစ်ပါတယ်။ နစ်နာသူများနဲ့ စွပ်စွဲခံရသူများအတွက် တရားမျှတမှုရရှိရေးကို ဆောင်ကြဉ်းပေး နိုင်မှာဖြစ်သလို မျှတတဲ့ တရားစီရင်ရေးစနစ် ဖြစ်ထွန်းအောင်မြင်ရေးကိုလည်း များစွာ အထောက်အကူပြုနိုင်မှာဖြစ်ပါတယ်” ဟု ပြည်ထောင်စုရှေ့နေချုပ် ဦးထွန်းထွန်းဦးက ပြောကြားသည်။

အဆိုပါစံနှုန်းများသည် တရားစီရင်ရေး ဆိုင်ရာ တန်ဖိုးများဖြစ်သည့် လွတ်လပ်မှု၊ ဘက်မလိုက်မှု၊ သမာသမတ်ကျမှုနှင့် တရား မျှတမှုတို့ကို အထောက်အကူဖြစ်စေမည်ဖြစ် ကြောင်း ဦးထွန်းထွန်းဦးက ဆိုသည်။

မျှတသောတရားစီရင်ရေးဆိုင်ရာစံနှုန်း တွင် ဥပဒေ၏ရှေ့မှောက်တွင် တန်းတူညီမျှမှု ရှိခြင်းနှင့် ဥပဒေအရ ညီမျှစွာဆက်ဆံခြင်း၊ နောက်ကြောင်းပြန် အာဏာသက်ရောက်မှု မရှိစေရေး၊ အပြစ်မရှိဟုမှတ်ယူခြင်းနှင့် သံသယအကျိုးခံစားခွင့်၊ ညှဉ်းပန်းနှိပ်စက်မှု နှင့် ဂုဏ်သိက္ခာညှိုးနွမ်းစေသည့် ဆက်ဆံမှု များမှကာကွယ်ခြင်း၊ မတရားဖမ်းဆီးချုပ်နှောင် မှုမှ ကာကွယ်ခြင်း၊ ဝန်ခံထွက်ဆိုခြင်းမပြုဘဲ နှုတ်ဆိတ်နေခွင့်၊ ဥပဒေအကြံÓဏ်ရယူခွင့် နှင့် စကားပြန်နှင့် ဘာသာပြန်အကူအညီရယူ ခွင့် စသည့်အချက်များပါဝင်ကြောင်း သိရ သည်။

Most Read

Most Recent