သက်ငယ်မုဒိမ်းမှုများနှင့်ပတ်သက်၍ ရဲစခန်း၌အမှုဖွင့်ရာတွင် မလွယ်ကူကြောင်းနှင့် ရဲဝန်ထမ်းများကိုယ်တိုင် ငွေကြေးဖြင့် ညှိနှိုင်းမှုများပြုလုပ်နေသည်ကို တွေ့ရကြောင်း ပြည်သူ့လွှတ်တော်ကိုယ်စားလှယ် ပြောကြား

သက်ငယ်မုဒိမ်းမှုများနှင့်ပတ်သက်၍ ရဲစခန်း၌အမှုဖွင့်ရာတွင် မလွယ်ကူကြောင်းနှင့် ရဲဝန်ထမ်းများကိုယ်တိုင် ငွေကြေးဖြင့် ညှိနှိုင်းမှုများပြုလုပ်နေသည်ကို တွေ့ရကြောင်း ပြည်သူ့လွှတ်တော်ကိုယ်စားလှယ် ပြောကြား
Published 26 May 2018

သက်ငယ်မုဒိမ်းမှု သေဒဏ်ပေးရေးအတွက် ဥပဒေပြဋ္ဌာန်းပေးရန် တောင်းဆိုလှုပ်ရှားမှုတစ်ခု ၂၀၁၈ ခုနှစ် ဖေဖော်ဝါရီလအတွင်းက သာကေတမြို့နယ်တွင် ပြုလုပ်နေသည်ကို တွေ့ရစဉ်

သက်ငယ်မုဒိမ်းအမှုများနှင့်ပတ်သက်၍ ရဲစခန်း၌ အမှုဖွင့်ရာတွင် မလွယ်ကူကြောင်းနှင့် ရဲဝန်ထမ်းများကိုယ်တိုင် ငွေကြေးဖြင့် ညှိနှိုင်းမှုများပြုလုပ်နေသည်ကို တွေ့ရကြောင်း မရမ်းကုန်းမဲဆန္ဒနယ် ပြည်သူ့လွှတ်တော် ကိုယ်စားလှယ် ဒေါက်တာမေဝင်းမြင့်က ပြောကြားသည်။

နေပြည်တော်၌ မေ ၂၅ ရက်က ပြုလုပ်သည့် ပြည်သူ့လွှတ်တော် အဋ္ဌမပုံမှန်အစည်းအဝေး သတ္တမနေ့တွင် ဒေါက်တာမေဝင်းမြင့် မေးမြန်းသည့် သက်ငယ်မုဒိမ်းမှု ကျူးလွန်သူများအား ထိရောက်ပြင်းထန်စွာ အမြန်ဆုံး အပြစ်ပေးနိုင်ရေးနှင့် သက်ငယ်မုဒိမ်းမှုလျော့ကျရေး မည်သို့သော အစီအစဉ်များဖြင့် အရေးယူဆောင်ရွက်နေသည်ကို သိလိုခြင်းနှင့် စပ်လျဉ်းသည့်မေးခွန်းနှင့်ပတ်သက်၍ လွှတ်တော်အပြီးတွင် မီဒီယာများအား အထက်ပါအတိုင်း ပြောကြားခဲ့ခြင်း ဖြစ်သည်။

“တချို့ဆိုရင် ရဲစခန်းမှာ အမှုဖွင့်ရတာလေ လွယ်လွယ်ကူကူ မဟုတ်ဘူး။ ဒါတွေရှိသေးတယ်။ တချို့ကျတော့ ရဲတွေကိုယ်တိုင်က ညှိကြပါ ညှိကြပါဆိုပြီး လုပ်တယ်။ တရားခံကို ညှိခိုင်းတာပေါ့။ တရားခံက ငွေသုံးပြီးတော့။  ဒါတွေကလည်း မဖြစ်သင့်ဘူး။ တချို့ရဲစခန်းတွေမှာ မိန်းကလေးတွေကို လူသူအရှေ့မှာ စစ်မေးတာတွေက မသင့်တော်ဘူး။ စစ်မေးတဲ့ စကားလုံးတွေက ညစ်ညမ်းတယ်။ ပြင်းထန်တယ်။ မိန်းကလေးတွေက အများရှေ့မှာ ဖြေနေရတဲ့အခါကျတော့ ရဲစခန်းကို မသွားချင်ကြတော့ဘူး။ ဒါတွေက ရဲကျင့်ဝတ်နဲ့ မညီတာတွေက အများကြီးပြင်ဖို့လိုပါတယ်” ဟု ဒေါက်တာမေဝင်းမြင့်က ပြောကြားသည်။

ထို့ပြင် သက်ငယ်မုဒိမ်းမှုများဖြစ်သည့်အခါ အာဏာရှိသော ပုဂ္ဂိုလ်များက ကျူးလွန်ခံမိသားစုများကို ငွေကြေးဖြင့်ဖြားယောင်းပြီး တရားမစွဲဆိုနိုင်ရန် ဆောင်ရွက်ပေးသူများကို ဥပဒေနှင့်အညီ အရေးယူဆောင်ရွက် သင့်သကဲ့သို့ ပြုကျင့်ခံရသော မိသားစုအသိုင်းအဝိုင်းမှ အားငယ်စိတ်ပျက်လာစေရန်၊ အမှုကို မတိုင်ကြားရန်၊ အမှုကိုပေါ့လျော့စေရန် တရားစွဲအဖွဲ့များက ဆောင်ရွက်နေမှုများကိုလည်း တင်းတင်းကြပ်ကြပ် လမ်းညွှန်မှုများ လုပ်ဆောင်ရန်လိုအပ်ကြောင်း အုတ်တွင်းမဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်ချိုချိုက ပြောကြားသည်။

မေ ၂၅ ရက်ကပြုလုပ်သည့် ပြည်သူ့လွှတ်တော်အစည်းအဝေးတွင် မရမ်းကုန်း မဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါက်တာမေဝင်းမြင့်နှင့် အုတ်တွင်း မဲဆန္ဒနယ် ပြည်သူ့လွှတ်တော်ကိုယ်စား လှယ်ဒေါ်ချိုချိုတို့က သက်ငယ်မုဒိမ်းမှုနှင့် ပတ်သက်၍ မေးခွန်းများ မေးမြန်းခဲ့ကြခြင်းဖြစ်ပြီး မေးခွန်းများကို ပြည်ထဲရေးဝန်ကြီးဌာနနှင့် ပြည်ထောင်စု တရားလွှတ်တော်ချုပ်ရုံးတို့က တပေါင်းတည်း ပြန်လည်ဖြေကြားခဲ့ကြခြင်း ဖြစ်သည်။

မြန်မာနိုင်ငံရဲတပ်ဖွဲ့ ဌာနချုပ်အနေဖြင့် သက်ငယ်မုဒိမ်းဖြစ်ပွားမှုအပေါ် သုံးသပ်ပြီး အမှုများ လျော့နည်းကျဆင်းရေးအတွက် စီမံချက်များ ရေးဆွဲဆောင်ရွက်ခြင်း၊ အသိပညာပေး ဟောပြောမှုများဆောင်ရွက်ခြင်း၊ ညစ်ညမ်းဗီဒီယိုခွေများအား ဖျက်ဆီးခြင်း၊ ဖြစ်ပွားလာသော အမှုများကို ထိရောက်သော အပြစ်ဒဏ်ရရှိရေးအတွက် သက်သေခံ အထောက်အထားခိုင်လုံစွာဖြင့် ဥပဒေနှင့်အညီ တရားစွဲတင်ပို့ခြင်း၊ တရားရုံးမှ ချမှတ်သည့် ပြစ်ဒဏ်နှင့် စပ်လျဉ်းပြီး ပြစ်မှုပြစ်ဒဏ်မျှတမှု မရှိသော အမှုများကိုစိစစ်ပြီး အယူခံ ပြင်ဆင်မှုများတက်ရောက်ရန်တို့ကို အလေးထားဆောင်ရွက်ရန် တိုင်းဒေသကြီးနှင့် ပြည်နယ်ရဲတပ်ဖွဲ့များကို ညွှန်ကြားဆောင်ရွက်ထားကြောင်း ပြည်ထဲရေးဝန်ကြီးဌာနက ဒုတိယဝန်ကြီး ဗိုလ်ချုပ်အောင်စိုးက ပြန်လည်ဖြေကြားရာတွင် ပြောကြားခဲ့သည်။

ထို့ပြင် သက်ငယ်မုဒိမ်းမှု လျော့နည်းကျဆင်းရေး ကြိုတင်ကာကွယ်သည့် အနေဖြင့် ကာမရာဂ စိတ်ကြွစေသည့် ညစ်ညမ်းကားများ ပြသရောင်းချသည့် ဗီဒီယိုရုံ၊ ဗီဒီယို အခွေအငှားဆိုင်များကိုလည်း ဥပဒေနှင့်အညီ ဝင်ရောက်ဖမ်းဆီးခြင်း၊ လိုင်စင်မဲ့အရက်ချက် လုပ်ရောင်းချသူများ၊ မူးယစ်ဆေးဝါးရောင်း ဝယ်သုံးစွဲသူများကိုလည်း ဖော်ထုတ်အရေးယူခြင်း၊ မိန်းကလေးငယ်များကို ကာယိန္ဒြေပျက်ပြားအောင် နှောင့်ယှက်သူများကို အရေးယူခြင်း၊ ကာမရာဂစိတ်နှိုးကြွစေသော ဆေးဝါးများ ရောင်းချသူများကိုလည်း ဥပဒေနှင့်အညီ ဖော်ထုတ်ဖမ်းဆီးအရေးယူဆောင်ရွက်လျက်ရှိကြောင်း ဆက်လက်ပြောကြားသည်။

မြန်မာနိုင်ငံတွင် မုဒိန်းမှု ဖြစ်ပွားမှုအနေဖြင့် ၂၀၁၆ ခုနှစ်မှ ၂၀၁၈ ခုနှစ် ဖေဖော်ဝါရီ အထိ ၂၇၃၄ မှုဖြစ်ပွားခဲ့ရာ သက်ငယ်မုဒိမ်းမှု ၁၇၁၉မှု ဖြစ်ပွားခဲ့ကြောင်း၊ ထိုသို့ စစ်ဆေးတွေ့ရှိချက်များအရ သက်ငယ်မုဒိန်းမှု ဖြစ်ပွားမှုရာခိုင်နှုန်းသည် ၂၀၁၆ ခုနှစ်တွင် ၆၁ ရာခိုင်နှုန်း၊ ၂၀၁၇ ခုနှစ်တွင် ၆၄ ရာခိုင်နှုန်းနှင့် ၂၀၁၈ ခုနှစ် ဇန်နဝါရီလမှ ဖေဖော်ဝါရီလအ ထိ ၆၆ ရာခိုင်နှုန်းဖြစ်ပွားခဲ့ပြီး နှစ်အလိုက် ဖြစ်ပွားမှု ရာခိုင်နှုန်း မြင့်မားလာကြောင်း တွေ့ရှိရသည်ဟု ပြည်ထဲရေးဒုတိယဝန်ကြီးက ပြောကြားသည်။

 

Most Read

Most Recent