<

ဧရာဝတီတိုင်းအတွင်းရှိ လယ်ယာမြေအားလုံးကို အစိုးရအဖွဲ့၏ ကြီးကြပ်မှုဖြင့် မြေနမူနာကောက်ယူလျက် မြေဆီလွှာအာဟာရ ဓာတ်စစ်ဆေးမှု ပြုလုပ်

ဧရာဝတီတိုင်းဒေသကြီးအတွင်းရှိ လယ်ယာမြေအားလုံးကို ပထမဆုံးအကြိမ်အဖြစ် လယ်ယာမြေများတွင် မြေနမူနာများ ကောက်ယူလျက် မြေဆီလွှာအာဟာရဓာတ် အခမဲ့ စမ်းသပ်စစ်ဆေးပေးခြင်းကို ဧရာဝတီတိုင်းဒေသကြီးအစိုးရမှ တိုင်းဒေသကြီး ရန်ပုံငွေဖြင့် ပြုလုပ်ဆောင်ရွက်လျက်ရှိသည်။

ဧရာဝတီတိုင်းဒေသကြီးအတွင်းရှိ လယ်ယာမြေဧကအားလုံးအား ဧက ၅၀ လျှင် နမူနာအကွက်တစ်ခု သတ်မှတ်ကာ မြေနမူ နာများရယူလျက် မြေဆီလွှာအဟာဓာတ် စစ်ဆေးပေးခြင်း လိုအပ်သည့် အာဟာရဓာတ်များဖြင့် မြေဆီလွှာပြုပြင်နိုင်ရေးအတွက် နည်းပညာဖြန့်ဖြူးပေးခြင်းကို ၂၀၁၈ ခုနှစ် မတ်လမှ စတင်ကာ ဆောင်ရွက်လျက်ရှိ ကြောင်း၊ မြေနမူနာရယူရန် သတ်မှတ်ထားသည့် နေရာပေါင်းမှာ ပုသိမ်ခရိုင်တွင် ၃၄၄၀ ကွက်၊ ဟင်္သာတခရိုင်တွင် ၂၅၆၀ ကွက်၊ မြောင်း မြခရိုင်တွင် ၂၄၆၀ ကွက်၊ လပွတ္တာခရိုင်တွင် ၂၆၄၀ ကွက်၊ မအူပင်ခရိုင်တွင် ၁၂၂၀ ကွက်၊ ဖျာပုံခရိုင်တွင် ၃၆၈၀ ကွက်ရှိပြီး ယနေ့အချိန်ထိ မြေနမူနာပေါင်း ၁၂၃၁၄ ကွက်ကို ရယူပြီးဖြစ်ကာ နမူနာပေါင်း ၈၈၂၉ ခု ဓာတ်ခွဲစမ်း သပ်စစ်ဆေးခဲ့ပြီးဖြစ်ကြောင်း ဧရာဝတီတိုင်းဒေသကြီး စိုက်ပျိုးရေးဦးစီးဌာနမှ သိရသည်။

“ဧရာဝတီတိုင်းမှာ ရေတော်မိုးတော် လယ်ဧက ၂၇ သိန်းကျော်ရှိတယ်၊ အဲဒီ ၂၇ သိန်းမှာ မြေဆီလွှာအဟာရ ဓာတ်စစ်ဆေးမှုကို တိုင်းဒေသအစိုးရ ဘတ်ဂျက်နဲ့ကို ဆောင်ရွက်နေပါတယ်၊ ၂၇ သိန်းကို ဧက ၅၀ မှာ ကျွန်တော်တို့ နမူနာတစ်ခုယူပြီးတော့၊ နမူနာ တစ်ခုယူတယ်ဆိုတာက နမူနာတစ်ခုယူဖို့ ကျင်းပေါင်း ၂၀ တူးရပါတယ်၊ ဧရိယာဧက ၅၀ အတွင်းမှာ ကန့်လန့်ဖြတ် ကြက်ခြေခတ် ပုံစံဖြစ်ဖြစ်၊ ဇက်ပုံစံပဲဖြစ်ဖြစ် အဲဒီလိုမျိုးနဲ့  နမူနာကျင်းပေါင်း ၂၀ တူးရပါတယ်၊ အဲဒီလို တူးပြီးတော့ ရလာတဲ့ နမူနာကို စနစ်တကျ ယူပြီးတော့ စစ်ရပါတယ်၊ အဲဒီတော့ ဧက ၅၀ ကို နမူနာတစ်ခုယူပြီးတော့ နမူနာပေါင်း ၅၄၀၀၀ ကျော်လောက် နမူနာယူဖို့ရှိပါတယ်။ အခု မိုးမကျခင် ကာလကလေးကို နမူနာ ပေါင်း ၁၆၀၀၀ ယူဖို့ လျာထားချက်ရှိပါတယ်၊ အဲဒီ လျာထားချက်မှာ လက်ရှိကျွန်တော်တို့ ၁၂၀၀၀ ကျော်လောက် ယူပြီးပါပြီ၊ မိုးမရွာသေးဘူးဆိုရင်တော့ လျာထားချက်ပြည့်မီအောင် ဆောင်ရွက်သွားမှာဖြစ်ပါတယ်၊ မိုးရွာရင်တော့ လုပ်ငန်းတွေ ရပ်သွားမှာ ဖြစ်ပါတယ်၊ မြေနမူနာယူပြီးတဲ့အခါမှာ ကျွန်တော်တို့ စံကို တိုင်းပါပါတယ်။ ဒီချဉ်ငန်ဓာတ်နဲ့ နိုက်ထရိုဂျင် ပါဝင်မှုသိတဲ့အခါမှာ လယ်သမားတွေကို မြေချဉ်နေလို့ရှိရင် ထုံးဘယ်လောက်ထည့်ရမယ် နည်းလမ်းပေးမှာ ဖြစ်ပါတယ်။ ဒါက လယ်သမားတိုင်း လယ်သမားတိုင်းကို ထောက်ခံချက်လေးတွေ ပေးသွားပြီးတော့ တစ်ခါတည်း လက်ကမ်းစာစောင်လေးတွေ ပညာပေးသွားမှာ ဖြစ်ပါတယ်” ဟု ဧရာဝတီတိုင်းဒေသကြီး စိုက်ပျိုးရေးဦးစီးဌာန ဒုတိယတိုင်းဒေသကြီး ဦးစီးမှူး ဦးဌေးလွင်ကဆိုသည်။

May 23, 2018














Copy Protected by Chetan's WP-Copyprotect.