ဘင်္ဂလားဒေ့ရှ်နိုင်ငံဘက်မှ ပြန်လည်ဝင်ရောက်လာသူများအား ကျန်းမာရေးစောင့်ရှောက်မှုပေးနိုင်ရန် ပြန်လည်လက်ခံရေးစခန်းများအပြင် ကြားစခန်းများ၌ပါ ဆေးပေးခန်းများ ပြင်ဆင်ထား

ဘင်္ဂလားဒေ့ရှ်နိုင်ငံဘက်မှ ပြန်လည်ဝင်ရောက်လာသူများအား ကျန်းမာရေးစောင့်ရှောက်မှုပေးနိုင်ရန် ပြန်လည်လက်ခံရေးစခန်းများအပြင် ကြားစခန်းများ၌ပါ ဆေးပေးခန်းများ ပြင်ဆင်ထား
Published 24 May 2018

ရခိုင်ပြည်နယ်အတွင်း ကျန်းမာရေးစောင့်ရှောက်မှုပေးနေသည့် ကျန်းမာရေးဝန်ထမ်းများအား တွေ့ရစဉ်

ဘင်္ဂလားဒေ့ရှ်နိုင်ငံဘက်မှ ပြန်လည်ဝင်ရောက်လာသူများအား ကျန်းမာရေးစောင့် ရှောက်မှုပေးနိုင်ရန် ပြန်လည်လက်ခံရေးစခန်းများအပြင် ကြားစခန်းများတွင်ပါ ဆေးပေးခန်းများ ပြင်ဆင်ဆောင်ရွက်လျက်ရှိကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။

ပြည်ထောင်စုအစိုးရနှင့် ရခိုင်ပြည်နယ် အစိုးရတို့အနေဖြင့် ရခိုင်ပြည်နယ်အတွင်း နေထိုင်လျက်ရှိသော လူ့အဖွဲ့အစည်းများအား ဘာသာရေး၊ လူမျိုးရေး၊ ကျား/မဆိုင်ရာ သို့မဟုတ် နိုင်ငံသားဖြစ်တည်မှုတို့အပေါ် အခြေခံသည့် ခွဲခြားမှုများကို မပြုလုပ်ဘဲ ထိုအဖွဲ့အစည်းများအားလုံး တူညီသော ကျန်းမာရေးဆိုင်ရာ ဆေးကုသခွင့်များ တစ်ပြေးညီ ရရှိရန် လုပ်ဆောင်ပေးလျက်ရှိကြောင်း သိရသည်။

ဝန်ကြီးဌာနအနေဖြင့် ဆေးရုံများအားလုံး၌ မည်သည့်လူမျိုးဖြစ်စေ၊ မည်သည့်ဘာသာကိုးကွယ်သည်ဖြစ်စေ၊ ကျား/မဖြစ်စေ၊ မည်သည့် နိုင်ငံသားဖြစ်စေ ဆေးကုသခွင့်ရရှိရေးအတွက် ဆောင်ရွက်လျက်ရှိပြီး ထိုသို့ ဆက်လက်ဆောင်ရွက်နိုင်ရေးအတွက် ဆေးရုံများနှင့် ကျန်းမာရေးဌာနများအားလုံးသို့ ညွှန်ကြားချက်များ ထပ်မံထုတ်ပြန်သွားရန်ရှိကြောင်းနှင့် ရွေ့လျားဆေးအဖွဲ့များဖြင့် ဆေးကုသပေးခြင်းနှင့် ပြည်သူ့ကျန်းမာရေး စောင့်ရှောက်မှုလုပ်ငန်းများ (ကာကွယ်ဆေး ထိုးနှံပေးခြင်း၊ အာဟာရစောင့်ရှောက်မှုပေးခြင်း၊ မိခင်နှင့် ကလေးကျန်းမာရေးစောင့် ရှောက်မှုလုပ်ငန်းများ စသည့်လုပ်ငန်းများ) ဆောင်ရွက်ရာ၌လည်း ခွဲခြားမှုမျိုးမရှိစေရေးအတွက် ဆောင်ရွက်ထားပြီး ပြည်နယ်၊ ခရိုင်၊ မြို့နယ်နှင့် အောက်ခြေအဆင့်များအားလုံး သို့ ညွှန်ကြားချက်များ ထုတ်ပြန်ထားကြောင်း သိရသည်။

ထိုလူ့အဖွဲ့အစည်းများအားလုံး တူညီသောကျန်းမာရေးဆိုင်ရာ ဆေးကုသခံယူခွင့် များရှိသည်ဟူသောအချက်ကို အများပြည်သူ သိရှိကြစေရန်အတွက် ရပ်ကွက်/ ကျေးရွာများအတွင်းရှိ ကျန်းမာရေးလုပ်သားများနှင့် စေတနာ့ဝန်ထမ်းများအား အသိပေးသွားမည်ဖြစ်ပြီး ရပ်ကွက်/ ကျေးရွာများအတွင်းရှိ ဆေးကုသမှုလိုအပ်သော ပြည်သူများအားလုံးအား ခွဲခြား မှုမရှိဘဲ ဆေးရုံ၊ ဆေးခန်းများသို့  လာရောက်ပြသစေရေးအတွက် ရပ်ကွက်ကျေးရွာ များအတွင်း အသိပေးခြင်းများကို ဆောင်ရွက်ပေးလျက်ရှိကြောင်း သိရသည်။

ကျန်းမာရေးနှင့် အားကစားဝန်ကြီးဌာန အနေဖြင့် ပြန်လည်လက်ခံရေးစခန်းများ (တောင်ပြိုလက်ဝဲနှင့် ငါးခူရ)နှင့် ယာယီပြန်လည်နေရာချထားမည့် ဒါးကြီးဇားကျေးရွာတို့၌ ကျန်းမာရေးစောင့်ရှောက်မှုလုပ်ငန်းများ ဆောင်ရွက်ရန်အတွက် လိုအပ်သော ဆေးအဖွဲ့များကို ဖွဲ့စည်းထားကြောင်းနှင့် ဆေးအဖွဲ့များကို အဆင့်ဆင့်ဖွဲ့စည်းထားပြီးဖြစ်ရာ နယ်စပ်ဝင်ထွက်ပေါက်ဆေးခန်းအဖွဲ့ ဝင်များအနေဖြင့် ကျန်းမာရေးစစ်ဆေးခြင်းနှင့် ကူးစက်ရောဂါစောင့်ကြပ်ကြည့်ရှုခြင်း၊ သာမန်နေမကောင်းသူများအား ဆေးကုသပေးခြင်း၊ ဆေးရုံသို့ လွှဲပြောင်းရန်လိုအပ်သည့် လူနာများအား အရေးပေါ်ဆေးကုသပေး၍ လွှဲပြောင်းပေးခြင်း၊ ကိုယ်ဝန်ဆောင် စောင့်ရှောက်မှုပေးခြင်း၊ ကလေးငယ်များအား ပိုလီယိုနှင့် ဝက်သက်ကာကွယ်ဆေးများ ထိုးနှံတိုက်ကျွေးခြင်းများကို လုပ်ဆောင်ပေးလျက်ရှိကြောင်း သိရသည်။

‘ရခိုင်ပြည်နယ်အတွင်းသို့ ပြန်လည်ဝင်ရောက်လာသည့်လူထုအား ပြန်လည်လက်ခံခြင်းနှင့် ပြန်လည်နေရာချထားခြင်းများ၌ ကျန်းမာရေးစောင့်ရှောက်မှုပေးခြင်းစီမံချက်’  ကို ရေးဆွဲထားပြီး စီမံချက်ပါလုပ်ငန်းများ အောင်မြင်စွာဆောင်ရွက်နိုင်ရန် လိုအပ်သော ရန်ပုံငွေ ရရှိထောက်ပံ့ပေးနိုင်ရေးအတွက် ကျန်းမာရေးနှင့် အားကစားဝန်ကြီးဌာန အနေဖြင့် စီစဉ်လုပ်ဆောင်ပေးလျက်ရှိကြောင်း သိရသည်။

Most Read

Most Recent