နိုင်ငံခြားရင်းနှီးမြှုပ်နှံမှုဖြင့် ဆောင်ရွက်နေသည့် ရန်ကုန်တိုင်းဒေသကြီးအတွင်းရှိ စက်ရုံတစ်ရုံအား တွေ့ရစဉ်(ဓာတ်ပုံ-ပြည့်ဖြိုးအောင်)

၂၀၁၈ ခုနှစ် ဧပြီလတွင် မြန်မာနိုင်ငံသို့ နိုင်ငံခြားရင်းနှီးမြှုပ်နှံမှု ဒေါ်လာ ၄၇ သန်း ကျော်သာ ဝင်ရောက်ခဲ့ပြီး စက်မှုကဏ္ဍတွင် ဒေါ်လာ ၂၁ သန်းကျော်ဖြင့် အများဆုံးရင်း နှီးမြှုပ်နှံထားကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနက ထုတ်ပြန်ထားသည့် နိုင်ငံခြားရင်းနှီး မြှုပ်နှံမှုဆိုင်ရာစာရင်းများအရ သိရသည်။ ၂၀၁၇ ခုနှစ် ဧပြီလတွင်မူ နိုင်ငံခြားရင်းနှီးမြှုပ်နှံမှုပမာဏ ဒေါ်လာ သန်း ၆၅၀ ကျော်ဝင်ရောက်ခဲ့ သဖြင့် ၂၀၁၈ ခုနှစ် ဧပြီလတွင် နိုင်ငံခြားရင်းနှီးမြှုပ်နှံမှုဝင် ရောက်မှုပမာဏမှာ ယခင်နှစ်ထက်ပမာဏ  များစွာလျော့ကျခဲ့ကြောင်း သိရသည်။

ဧပြီလတွင် စက်မှုကဏ္ဍသို့ နိုင်ငံခြားရင်းနှီးမြှုပ်နှံမှု ဒေါ်လာ ၂၁ ဒသမ ၅၃၉ သန်း၊ ဟိုတယ်နှင့် ခရီးသွားကဏ္ဍသို့ နိုင်ငံခြားရင်းနှီးမြှုပ်နှံမှုဒေါ်လာ ၀ ဒသမ ၃ သန်း၊ အိမ်ရာအဆောက်အအုံကဏ္ဍသို့ နိုင်ငံခြားရင်းနှီးမြှုပ်နှံမှုဒေါ်လာ ၂ ဒသမ ၈၈၀ သန်း၊  စက်မှုဇုန်တည်ဆောက်မှုကဏ္ဍသို့ နိုင်ငံခြားရင်းနှီးမြှုပ်နှံမှု ဒေါ်လာ ၅ ဒသမ ၃၃၀ သန်း၊ အခြားဝန်ဆောင်မှုကဏ္ဍသို့ နိုင်ငံခြားရင်းနှီးမြှုပ်နှံမှု ဒေါ်လာ ၁၇ ဒသမ ၀၅၀ သန်း၊ စုစုပေါင်းနိုင်ငံခြားရင်းနှီးမြှုပ်နှံမှု ဒေါ်လာ ၄၇ ဒသမ ၀၉၉ သန်း ဝင်ရောက်ခဲ့သည်။

၂၀၁၇ ခုနှစ် ဧပြီလတွင် မြန်မာနိုင်ငံသို့ နိုင်ငံခြားရင်းနှီးမြှုပ်နှံမှုဒေါ်လာသန်း ၆၅၀ ကျော်ဝင်ရောက်ခဲ့ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၏ နိုင်ငံခြားရင်းနှီးမြှုပ်နှံမှုဆိုင်ရာ စာရင်းများအရ သိရသည်။

၂၀၁၇ ခုနှစ် မတ်လအထိ မြန်မာနိုင်ငံတွင် ရင်းနှီးမြှုပ်နှံခွင့်ပြုထားသည့် နိုင်ငံခြား ရင်းနှီးမြှုပ်နံှမှုပမာဏ စုစုပေါင်းမှာ ဒေါ်လာ ၇၀၃၅၀ ဒသမ ၈၉၅ သန်းရှိပြီး ဧပြီလကုန်တွင် မြန်မာနိုင်ငံရှိ နိုင်ငံခြားရင်းနှီးမြှုပ်နံှမှု ပမာဏစုစုပေါင်းမှာ ဒေါ်လာ ၇၁၀၀၇ ဒသမ ၁၇၂ သန်းရှိသဖြင့် ဧပြီလတစ်လတည်းတွင် နိုင်ငံခြားရင်းနှီးမြှုပ်နှံမှု ဒေါ်လာ ၆၅၆ ဒသမ ၂၇၇ သန်း ဝင်ရောက်ခဲ့ခြင်းဖြစ်ကြောင်း သိရသည်။

၁၉၈၈-၈၉ ဘဏ္ဍာနှစ်မှ ၂၀၁၈ ခုနှစ် ဧပြီလအထိ ခွင့်ပြုပေးခဲ့သည့် နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၇၆ ဘီလျံကျော် တွင် တရုတ်နိုင်ငံက ပမာဏအများဆုံးရင်းနှီးမြှုပ်နှံထားပြီး စင်ကာပူက ဒုတိယအများဆုံး ရင်းနှီးမြှုပ်နှံထားကြောင်း သိရသည်။ ကဏ္ဍအလိုက်ရင်းနှီးမြှုပ်နှံမှုတွင် ရေနံနှင့် သဘာဝဓာတ်ငွေ့ကဏ္ဍတွင် အများဆုံးဖြစ်ပြီး စွမ်းအင်ကဏ္ဍတွင် ဒုတိယအများဆုံး ရင်းနှီးမြှုပ်နှံကြကြောင်း သိရသည်။